ಪೈಪ್‌ಲೈನ್‌ಗೆ ಹಾನಿ; ನಗರದ 8 ವಾರ್ಡ್‌ಗಳಲ್ಲಿ ನೀರಿಲ್ಲ!

Team Udayavani, Mar 29, 2022, 11:05 AM IST

ಲಾಲ್‌ಬಾಗ್‌: ಗೈಲ್‌ ಗ್ಯಾಸ್‌ ಲೈನ್‌ ಕಾಮಗಾರಿ ಕದ್ರಿಯ ಸಿಟಿ ಆಸ್ಪತ್ರೆ ಬಳಿಯ ಪ್ರಮುಖ ಪೈಪ್‌ಲೈನ್‌ಗೆ ಹಾನಿ ಉಂಟಾಗಿದ್ದು, ನಗರ ಸುಮಾರು 8 ವಾರ್ಡ್ ಗಳಲ್ಲಿ ನೀರು ಸರಬರಾಜು ವ್ಯವಸ್ಥೆಯಲ್ಲಿ ವ್ಯತ್ಯಯ ಉಂಟಾಗಿದೆ.

ನಗರದ ಹಲವು ಕಡೆಗಳಲ್ಲಿ ಗೈಲ್‌ ಸಂಸ್ಥೆಯು ಗ್ಯಾಸ್‌ ಲೈನ್‌ ಕಾಮಗಾರಿ ನಡೆಸುತ್ತಿದೆ. ಅದರಂತೆ ನಗರದ ಸಿಟಿ ಆಸ್ಪತ್ರೆ ಬಳಿ ರವಿವಾರ ಸಂಜೆ ವೇಳೆಗೆ ಪೈಪ್‌ ಲೈನ್‌ ಕಾಮಗಾರಿ ನಡೆಯುತ್ತಿತ್ತು. ಈ ವೇಳೆ 450 ಎಂ.ಎಂ. ಕಬ್ಬಿಣದ ಪೈಪ್‌ಲೈನ್‌ಗೆ ಹಾನಿಯಾಗಿದ್ದು, ಈ ಪೈಪ್‌ಲೈನ್‌ ನಗರದ ಬೆಂದೂರ್‌ವೆಲ್‌ ಪಂಪ್‌ಹೌಸ್‌ನಿಂದ ಲಾಲ್‌ ಬಾಗ್‌ನ ಕರಾವಳಿ ಪಂಪ್‌ಹೌಸ್‌ಗೆ ಸಂಪರ್ಕ ಕಲ್ಪಿಸುತ್ತದೆ. ಅಲ್ಲಿಂದ ಚಿಲಿಂಬಿ ಪಂಪ್‌ ಹೌಸ್‌, ಬೋಳೂರು, ಉರ್ವ, ಚಿಲಿಂಬಿ, ಅಶೋಕ ನಗರ, ಬೊಕ್ಕಪಟ್ಣ, ಮಣ್ಣಗುಡ್ಡೆ  ಸಹಿತ ಸುಮಾರು 8 ವಾರ್ಡ್‌ಗಳಲ್ಲಿ ನೀರಿನ ಸರಬರಾಜಿನಲ್ಲಿ ವ್ಯತ್ಯಯ ಉಂಟಾಗಿದೆ.

ಮಾಜಿ ಮೇಯರ್‌ ಶಶಿಧರ ಹೆಗ್ಡೆ ಅವರು ‘ಉದಯವಾಣಿ ಸುದಿನ’ ಕ್ಕೆ ಪ್ರತಿಕ್ರಿಯಿಸಿ, ಗೈಲ್‌ ಸಂಸ್ಥೆಯು ಈ ಭಾಗದಲ್ಲಿ ಅವೈಜ್ಞಾನಿಕ ಕಾಮಗಾರಿ ನಡೆಸುತ್ತಿದೆ. ರವಿವಾರ ಸಂಜೆ ಪೈಪ್‌ಲೈನ್‌ಗೆ ಹಾನಿ ಉಂಟಾದರೂ, ದುರಸ್ತಿ ಕಾಮಗಾರಿ ಆರಂಭಗೊಂಡದ್ದು, ಸೋಮವಾರ ಮಧ್ಯಾಹ್ನ ವೇಳೆಗೆ. ಪೈಪ್‌ಲೈನ್‌ ಹಾಳಾದ ಕೂಡಲೇ ದುರಸ್ತಿ ಮಾಡಲಿಲ್ಲ. ಗೈಲ್‌ ಸಂಸ್ಥೆಯು ಕಾಮಗಾರಿಗೆಂದು ನಗರದ ಅಲ್ಲಲ್ಲಿ ಗುಂಡಿ ಮಾಡಿದ್ದು, ಇನ್ನೇನು ಮಳೆಗಾಲ ಆರಂಭವಾಗಲಿದೆ. ತತ್‌ಕ್ಷಣ ಈ ಕುರಿತು ಗಮನಹರಿಸಬೇಕು’ ಎಂದು ಆಗ್ರಹಿಸಿದ್ದಾರೆ.

ಮೇಯರ್‌ ಪ್ರೇಮಾನಂದ ಶೆಟ್ಟಿ ಅವರು ಪ್ರತಿಕ್ರಿಯಿಸಿ, ‘ಗೈಲ್‌ ಕಾಮಗಾರಿ ವೇಳೆ ನೀರಿನ ಪೈಪ್‌ ಒಡೆದಿದ್ದು, ಸಮಸ್ಯೆ ಉಂಟಾಗಿದೆ. ಸದ್ಯ ದುರಸ್ತಿ ಕಾಮಗಾರಿ ನಡೆಯುತ್ತಿದ್ದು, ಮಂಗಳವಾರ ಸರಿಯಾಗುವ ನಿರೀಕ್ಷೆ ಇದೆ. ಈ ಕುರಿತು ಗೈಲ್‌ ಮತ್ತು ಪಾಲಿಕೆ ಅಧಿಕಾರಿಗಳ ಜೊತೆ ಮಾತನಾಡಿದ್ದೇನೆ’ ಎನ್ನುತ್ತಾರೆ.