ಅಭಿವೃದ್ಧಿ ಹೆಸರಲ್ಲಿ ಮರ ಕಡಿಯದಿರಿ

Team Udayavani, Jul 15, 2018, 3:13 PM IST

ಆಧುನಿಕ ಜೀವನ ಶೈಲಿಗೆ ಪ್ರತಿಯೊಬ್ಬರು ಒಗ್ಗಿಕೊಂಡಾಗಿದೆ. ಕಣ್ಣಿಗೆ ಆಕರ್ಷವಾಗಿ ಕಾಣುವ ಜೀವನದ ಕಡೆಗೆ ಎಲ್ಲರ ಒಲವು. ಮಾಲ್‌, ಸಿನೆಮಾ ಎನ್ನುವ ಮಾಯಾಲೋಕದತ್ತ ಜನ ವಾಲಿಕೊಂಡಾಗಿದೆ. ಇದನ್ನು ಪ್ರಶ್ನಿಸುವ ಅಧಿಕಾರ ಯಾರಿಗೂ ಇಲ್ಲ. ಆದರೆ ನೈಸರ್ಗಿಕ ವಾತಾವರಣಕ್ಕೆ ಧಕ್ಕೆ ತರುವ ನಡೆಯ ಬಗ್ಗೆ ದನಿ ಎತ್ತುವವರ ಸಂಖ್ಯೆಯೂ ಕಡಿಮೆಯಾಗಿದೆ ಎಂದರೆ ಬೇಸರವಾಗುತ್ತದೆ.

ತಮ್ಮ ಸ್ವ ಹಿತಾಸಕ್ತಿಗಾಗಿ ಕಾಡುಗಳನ್ನು ಕಡಿದು ಕಟ್ಟಡಗಳನ್ನು ಕಟ್ಟುವ ಕೆಲಸವಾಗುತ್ತಿದೆ. ಇದರೊಂದಿಗೆ ಅಭಿವೃದ್ಧಿ ಹೆಸರಿನಲ್ಲಿ ಮರ ಕಡಿಯುವ ಸನ್ನಿವೇಶಗಳು ನಗರ ಪ್ರದೇಶಗಳಲ್ಲಿ ಹೆಚ್ಚುತ್ತಿದೆ. ಹೆಮ್ಮೆರವಾಗಿ ಬೆಳೆದ ಮರಗಳನ್ನು ಕಡಿಯುವುದು ಸುಲಭ. ಆದರೆ ಸಸಿ ನೆಟ್ಟು ಬೆಳೆಸುವುದು ಬಹಳ ಕಷ್ಟ ಎನ್ನುವ ಅಂಶ ಯಾರಿಗೂ ಮನದಟ್ಟಾಗುತ್ತಿಲ್ಲ.

ಗಿಡ, ಮರ, ಅರಣ್ಯ ನಾಶದಿಂದ ಪರಿಸರ ಹಾಗೂ ಸಮಾಜದ ಮೇಲೆ ವ್ಯತಿರಿಕ್ತ ಪರಿಣಾಮ ಉಂಟಾಗುತ್ತಿರುವುದು ಎಲ್ಲರ ಗಮನಕ್ಕೆ ಬಂದಿರಬಹುದು. ಪ್ರಕೃತಿ ತನ್ನ ಮೇಲೆ ನಿರಂತರವಾಗಿ ನಡೆಯುತ್ತಿರುವ ದಾಳಿಯನ್ನು ಕೃತಕ ನೆರೆ, ಸುನಾಮಿ ಮೊದಲಾದ ವಿಕೋಪಗಳ ಮೂಲಕ ತಿಳಿಸುತ್ತಿದೆ. ಆದರೆ ಜನರು ಪ್ರಕೃತಿಯ ಮೇಲಿನ ದಾಳಿಗಳನ್ನು ಮಂದುವರಿಸುತ್ತಿದ್ದಾರೆ. ಇತ್ತೀಚೆಗೆ ಮಂಗಳಾ ಸ್ಟೇಡಿಯಂ ಬಳಿ ವಾಲಿಬಾಲ್‌ ಆಡಲು ತೊಂದರೆಯಾಗುತ್ತದೆ ಎನ್ನುವ ಕಾರಣಕ್ಕೆ ಹಲವಾರು ಮರಗಳನ್ನು ಕಡಿಯಲಾಗಿತ್ತು. ಇದಕ್ಕೆ ಪರಿಸರವಾದಿಗಳು ವ್ಯಾಪಕ ವಿರೋಧ ವ್ಯಕ್ತಪಡಿಸಿದ್ದರು.

ನಗರ ಪ್ರದೇಶಗಳಲ್ಲಿ ಕೆಲವೇ ಕೆಲವು ಭಾಗಗಳಲ್ಲಿ ಮರಗಳಿವೆ. ಅದನ್ನು ವಿವಿಧ ಕಾಮಗಾರಿಗಳ ನೆಪದಲ್ಲಿ ಆಗಾಗ್ಗೆ ಕಡಿಯಲಾಗುತ್ತಿದೆ. ಇಂದು ಮರ ಕಡಿಯುವುತ್ತಿರುವ ಬಗ್ಗೆ ನಿರ್ಲಕ್ಷ್ಯ ತನಕ್ಕೆ ಮುಂದಿನ ದಿನಗಳಲ್ಲಿ ಬೆಲೆ ತೆರಬೇಕಾಗಬಹುದು ಎಂಬುದನ್ನು ಮರೆಯಬಾರದು. ವರ್ಷಕ್ಕೊಮ್ಮೆ ವನಮಹೋತ್ಸವ ನಡೆಸಿದರೆ ಸಾಲದು. ರಸ್ತೆ ಬದಿಯಲ್ಲಿ ನೆಟ್ಟ ಮರವನ್ನು ಸೂಕ್ತ ರೀತಿಯಲ್ಲಿ ನಿರ್ವಹಣೆ ಮಾಡಿಕೊಂಡು ಹೋಗುವ ಜವಾಬ್ದಾರಿಯೂ ಇದೆ. ಒಂದು ವೇಳೆ ಇಲಾಖೆಗೆ ಇದು ಕಷ್ಟವಾದರೆ ಸ್ಥಳೀಯ ಸಂಘಸಂಸ್ಥೆಗಳಿಗೆ ಈ ಜವಾಬ್ದಾರಿಯನ್ನು ಹಂಚಬಹುದು. ಉತ್ತಮ ರೀತಿಯಲ್ಲಿ ನಿರ್ವಹಣೆ ಮಾಡುವ ಸಂಸ್ಥೆಗಳಿಗೆ ಪ್ರೋತ್ಸಾಹಕ ಬಹುಮಾನ ನೀಡಿದರೆ ಕಾಡಿನ ಜತೆಗೆ ನಾಡಿನ ಅಭಿವೃದ್ಧಿಯೂ ಸಾಧ್ಯ.

 ಪ್ರಜ್ಞಾ ಶೆಟ್ಟಿ