ಕೃಷ್ಣಾಪುರದಲ್ಲಿ ಜನ ಮೆಚ್ಚಿದ ಪಾರ್ಕ್‌ 

Team Udayavani, Sep 13, 2018, 2:33 PM IST

ಕೃಷ್ಣಾಪುರ: ಕೃಷ್ಣಾಪುರ 7 ಬ್ಲಾಕ್‌ನಲ್ಲಿ ಸುಂದರ ಪಾರ್ಕ್‌ ನಿರ್ಮಾಣ ಮಾಡಲಾಗುತ್ತಿದ್ದು, ಜನರ ಗಮನ ಸೆಳೆಯುತ್ತಿದೆ. ಉರ್ದು ಸರಕಾರಿ ಪ್ರಾಥಮಿಕ ಶಾಲೆಯ ಪಕ್ಕದಲ್ಲೇ ಸುಮಾರು ಮುಕ್ಕಾಲು ಎಕ್ರೆ ಪ್ರದೇಶದಲ್ಲಿರುವ ಈ ಪಾರ್ಕ್‌ ನಿರ್ಮಾಣಕ್ಕೆ 80 ಲಕ್ಷ ರೂ. ವೆಚ್ಚ ತಗುಲಿದೆ. ವಾಕಿಂಗ್‌ ಟ್ರ್ಯಾಕ್‌, ಮಕ್ಕಳ ಆಟದ ಮೈದಾನ, ಉಯ್ನಾಲೆ ಮತ್ತಿತರ ಆಟದ ವಸ್ತುಗಳಿವೆ. ಇನ್ನು ದೊಡ್ಡವರ ದೈಹಿಕ ಕಸರತ್ತಿಗೆ ಸೈಕ್ಲಿಂಗ್‌ ವ್ಯವಸ್ಥೆ ಮಾಡಲಾಗಿದೆ. ಹಿರಿಯರಿಗೆ ಕಿರಿಯರಿಗೆ ಕುಳಿತುಕೊಳ್ಳಲು ಆಸನದ ವ್ಯವಸ್ಥೆ ಇಲ್ಲಿದೆ. ತಂಪಿನ ಅನುಭವಕ್ಕಾಗಿ ವಿವಿಧ ಜಾತಿಯ ಸಸಿಗಳನ್ನು ನೆಡಲಾಗಿದೆ.

ಸುಸಜ್ಜಿತ ಪಾರ್ಕ್‌
ಕುಳಿತುಕೊಳ್ಳಲು ಹಾಕಿದ ಗೋಪುರ ಹಾಗೂ ವೃತ್ತಾಕಾರದ ಫೌಂಟೇನ್‌ ಗಮನ ಸೆಳೆಯುತ್ತದೆ. ಈ ಹಿಂದೆ ಕೇವಲ ವಾಕಿಂಗ್‌ ಟ್ರ್ಯಾಕ್ ನಿರ್ಮಿಸಿ ಇಂಟರ್‌ ಲಾಕ್‌ ಅಳವಡಿಸಿ ಬಿಡಲಾಗಿತ್ತು. ಇದೀಗ ಸುಸಜ್ಜಿತ ಪಾರ್ಕ್‌ ನಿರ್ಮಿಸಲಾಗಿದೆ. ಒಳ ಹೋಗುವಲ್ಲಿ ದ್ವಾರ ಹಾಗೂ ಸುತ್ತಲೂ ಭದ್ರತೆಗಾಗಿ ಗೋಡೆ ನಿರ್ಮಿಸಿ ಪಾರ್ಕ್‌ ಹಾಳಾಗದಂತೆ ಯೋಜನೆ ರೂಪಿಸಲಾಗಿದೆ.

ಅನುದಾನ ಹೇಗೆ?
ಅಮೃತ್‌ ಯೋಜನೆಯಡಿ ಇದಕ್ಕೆ 58 ಲಕ್ಷ ರೂ. ಬಿಡುಗಡೆಯಾಗಿದ್ದು, ಉಳಿದಂತೆ ಪಾಲಿಕೆಯ ಎಸ್‌ಎಫ್‌ಸಿ ಯೋಜನೆಯಡಿ 24 ಲಕ್ಷ ರೂ. ಒಳಾಂಗಣ, ಅದರಲ್ಲಿ ಎಲ್‌ಇಡಿ ಲೈಟ್‌ ವ್ಯವಸ್ಥೆಗಾಗಿ ಎನ್‌ಎಂಪಿಟಿ 7 ಲಕ್ಷ ರೂ. ನೀಡಿದೆ. ಉಳಿದಂತೆ ಇನ್ನೂ ಮಕ್ಕಳ ಆಟದ ವ್ಯವಸ್ಥೆ, ಓಪನ್‌ ಜಿಮ್‌ ಸ್ಥಾಪಿಸಲು ಅನುದಾನದ ಅಗತ್ಯವಿದ್ದು, ದಾನಿಗಳ ಹುಡುಕಾಟ ನಡೆದಿದೆ.

ಮತ್ತಷ್ಟು ಅಭಿವೃದ್ಧಿಗೆ ಚಿಂತನೆ
ನನ್ನ ವಾರ್ಡ್‌ನಲ್ಲಿ ಪಾರ್ಕ್‌ ನಿರ್ಮಾಣಕ್ಕೆ ಉತ್ತಮ ಸ್ಥಳ ಆಯ್ಕೆ ಮಾಡಲಾಗಿದೆ. 75 ಸೆಂಟ್ಸ್‌ ಜಾಗದಲ್ಲಿ ನಿರ್ಮಿಸಿ ಮಕ್ಕಳಿಂದ ಹಿಡಿದು ಹಿರಿಯರವರೆಗೆ ಈ ಪಾರ್ಕ್‌ ಉಪಯೋಗವಾಗುತ್ತದೆ. ಇಲ್ಲಿ ಬೆಲೆ ಬಾಳುವ ಜಿಮ್‌ ಉಪಕರಣ, ಉಯ್ನಾಲೆ ಮತ್ತಿತರ ವ್ಯವಸ್ಥೆಯಿದ್ದು ಹಾಳುಗೆಡವದಂತೆ ಎಲ್ಲರೂ ಮುತುವರ್ಜಿ ವಹಿಸಬೇಕು. ಈ ಪಾರ್ಕನ್ನು ಮತ್ತಷ್ಟು ಅಭಿವೃದ್ಧಿ ಪಡಿಸಲು ಚಿಂತಿಸಿದ್ದೇವೆ.
– ತಿಲಕ್‌ರಾಜ್‌,ಕೃಷ್ಣಾಪುರ ವಾರ್ಡ್‌ ಕಾರ್ಪೊರೇಟರ್‌