‘ಸಿನೆಮಾಗಳ ಗುಣಮಟ್ಟಕ್ಕೆ ಪ್ರಾಶಸ್ತ್ಯ ನೀಡಿ’

Team Udayavani, Mar 26, 2018, 2:45 PM IST

ಮಹಾನಗರ: ಸಿನೆಮಾಗಳ ಅಂಕಿಸಂಖ್ಯೆಗಿಂತ ಹೆಚ್ಚಾಗಿ ಗುಣಮಟ್ಟಕ್ಕೆ ಹೆಚ್ಚಿನ ಪ್ರಾಶಸ್ತ್ಯ ನೀಡಬೇಕು ಎಂದು
ಸಂಗೀತ ನಿರ್ದೇಶಕ ಗುರುಕಿರಣ್‌ ಹೇಳಿದರು.

ನಗರದ ಕರಾವಳಿ ಮೈದಾನದಲ್ಲಿ ಇತ್ತೀಚೆಗೆ ನಡೆದ ರೆಡ್‌ ಎಫ್‌.ಎಂ. ತುಳು ಚಲನಚಿತ್ರ ಪ್ರಶಸ್ತಿ ಪ್ರದಾನ ಕಾರ್ಯ
ಕ್ರಮವನ್ನು ಉದ್ಘಾಟಿಸಿ ಮಾತನಾಡಿದ ಅವರು, ಕನ್ನಡ ಚಲನಚಿತ್ರದಂತೆಯೇ ತುಳು ಚಿತ್ರರಂಗ ಕೂಡ ಬೆಳೆಯುತ್ತಿದೆ. ತುಳು ಚಿತ್ರದ ಕಲಾವಿದರು ಕನ್ನಡ ಚಲನ ಚಿತ್ರ ಕ್ಷೇತ್ರದಲ್ಲಿಯೂ ಮಿಂಚುತ್ತಿದ್ದಾರೆ. ಇದು ತುಳುನಾಡಿಗೆ ಹೆಮ್ಮೆಯ ಸಂಗತಿ ಎಂದು ತಿಳಿಸಿದರು.

ಸ್ಥಳೀಯ ಪ್ರತಿಭೆಗಳಿಗೆ ಅವಕಾಶ
ನಿರ್ದೇಶಕ, ನಟ ಋಶಭ್‌ ಶೆಟ್ಟಿ ಮಾತನಾಡಿ, ಆರು ವರ್ಷಗಳಲ್ಲಿ ತುಳು ಚಲನಚಿತ್ರ ಕ್ಷೇತ್ರ ಗಮನಾರ್ಹ ಬೆಳವಣಿಗೆ ಕಂಡಿದೆ. ಸ್ಥಳೀಯ ಪ್ರತಿಭೆಗಳಿಗೆ ತುಳು ಚಲನಚಿತ್ರ ವೇದಿಕೆ ನೀಡುತ್ತಿದೆ ಎಂದರು.

24 ವಿಭಾಗಗಳಲ್ಲಿ ಪ್ರಶಸ್ತಿ
ಕಾರ್ಯಕ್ರಮದಲ್ಲಿ ಒಟ್ಟು 24 ವಿಭಾಗಗಳಲ್ಲಿ ಪ್ರಶಸ್ತಿ ನೀಡಲಾಗಿದ್ದು, ಉತ್ತಮ ಚಲನಚಿತ್ರ ಪ್ರಶಸ್ತಿ ಪಿಲಿಬೈಲು
ಯಮುನಕ್ಕ ಚಿತ್ರದ ಪಾಲಾಯಿತು. ಉತ್ತಮ ನಟ ಪ್ರಶಸ್ತಿ ಪಿಲಿಬೈಲು ಯಮುನಕ್ಕ ಚಿತ್ರ ನಟನೆಗೆ ಪೃಥ್ವಿ ಅಂಬರ್‌ ಪಡೆದರೆ, ಪವಿತ್ರ ಚಲನಚಿತ್ರದ ನಟನೆಗೆ ಚಿರಶ್ರೀ ಅಂಚನ್‌ ಅವರು ಉತ್ತಮ ನಟಿ ಪ್ರಶಸ್ತಿ ಪಡೆದರು. ಜೂರಿ ಸ್ಪೆಷಲ್‌ ಅವಾರ್ಡ್‌ ನವೀನ್‌ ಡಿ. ಪಡೀಲ್‌, ಜೀವಮಾನ ಸಾಧನೆ ಪ್ರಶಸ್ತಿ- ಎಂ.ಕೆ. ಸೀತಾರಾಮ ಕುಲಾಲ್‌ ಅವರಿಗೆ ಲಭಿಸಿತು.

ಉಳಿದಂತೆ ಉತ್ತಮ ಸಹ ನಟಿ- ವಿನಯ ಪ್ರಸಾದ್‌, ಉತ್ತಮ ಸಹ ನಟ-ಸುರೇಶ್‌ ರೈ, ಉತ್ತಮ ಬಾಲ ನಟಿ-ಪೂರ್ವಿ, ಉತ್ತಮ ನಿರ್ದೇಶಕ- ಸೂರಜ್‌ ಕೆ. ಶೆಟ್ಟಿ, ಉತ್ತಮ ಕಥೆ- ಅನಂತರಾಮ್‌ ಎರ್ಮಾಳ್‌, ಉತ್ತಮ ಚಿತ್ರಕಥೆ-ಸೂರ್ಯ ಮೆನನ್‌, ಉತ್ತಮ ಸಂಭಾಷಣೆ- ಸುಂದರ ರೈ ಮಂದಾರ, ಉತ್ತಮ ಸಾಹಸ-ಕೌರವ ವೆಂಕಟೇಶ್‌, ಬೆಸ್ಟ್‌ ಬ್ಯಾಗ್ರೌಂಡ್‌ ಸ್ಕೋರ್‌-ಎಸ್‌.ಪಿ. ಚಂದ್ರಕಾಂತ್‌, ಉತ್ತಮ ಛಾಯಾಗ್ರಹಣ- ಸಂತೋಷ್‌ ರೈ ಪಾತಾಜೆ, ಉತ್ತಮ ಸಂಕಲನ- ಅಕ್ಷಯ್‌ ಮೆಹ್ತಾ, ಉತ್ತಮ ನೃತ್ಯ ಸಂಯೋಜನೆ-ಅಶೋಕ್‌ ರಾಜ್‌, ಉತ್ತಮ ಕಲಾನಿರ್ದೇಶನ- ಬಾಬೂ ಖಾನ್‌, ಉತ್ತಮ ಸಾಹಿತ್ಯ-ರಂಜಿತ್‌ ಸುವರ್ಣ, ಉತ್ತಮ ಸಂಗೀತ- ಕಿಶೋರ್‌ ಕುಮಾರ್‌ ಶೆಟ್ಟಿ, ಉತ್ತಮ ಗಾಯಕ-ಪಟ್ಲ ಸತೀಶ್‌ ಶೆಟ್ಟಿ, ಉತ್ತಮ ಗಾಯಕಿ- ಮೇಘನಾ ಕುಲಕರ್ಣಿ, ಉತ್ತಮ ಹಾಸ್ಯ ನಟ- ವಿಸ್ಮಯ ವಿನಾಯಕ್‌, ಉತ್ತಮ ಖಳನಟ ಪ್ರಶಸ್ತಿ-ಮನೋಜ್‌ ಪುತ್ತೂರು ಪಡೆದುಕೊಂಡರು. ಮಾಜಿ ಸಚಿವ ಕೃಷ್ಣ ಜೆ. ಪಾಲೆಮಾರ್‌, ಮುಕುಂದ್‌ ಕಾಮತ್‌, ರೆಡ್‌ ಎಫ್‌.ಎಂ. ಎಂಡಿ ಸುರೇಶ್‌ ಗಣೇಶನ್‌, ನಿಶಾನ್‌ ಶೇಟ್‌, ಮಾರ್ಟಿನ್‌ ಪೌಲ್‌ ಮೊದಲಾ ದವರಿದ್ದರು. ವಿಜೆ ವಿನಿತ್‌ ಮತ್ತು ಸೌಜನ್ಯಾ ಹೆಗ್ಡೆ ನಿರೂಪಿಸಿದರು.

ದಿನದಿಂದ ದಿನಕ್ಕೆ ತುಳು ಪ್ರಜ್ವಲನ
ಆಳ್ವಾಸ್‌ ಸಮೂಹ ಶಿಕ್ಷಣ ಸಂಸ್ಥೆ ಅಧ್ಯಕ್ಷ ಡಾ| ಮೋಹನ್‌ ಆಳ್ವ ಮಾತನಾಡಿ, 47 ವರ್ಷಗಳಲ್ಲಿ ಸುಮಾರು 80ಕ್ಕೂ ಹೆಚ್ಚಿನ ತುಳು ಚಲನಚಿತ್ರಗಳು ತೆರೆ ಕಂಡಿವೆ. ಅನೇಕ ಭಾಷೆಗಳು ಅವನತಿ ಕಾಣುತ್ತಿರುವ ಈ ಸಂದರ್ಭದಲ್ಲಿ ತುಳು ದಿನದಿಂದ ದಿನಕ್ಕೆ ಪ್ರಜ್ವಲಿಸುತ್ತಿದೆ ಎಂದರು.