ಸೋಂಕಿತರಿಗೆ ನೀಡುವ ರೋಗಿ ಸಂಖ್ಯೆ ದೈನಂದಿನ ಬುಲೆಟಿನ್‌ನಲ್ಲಿ ಬರಲು ನಾಲ್ಕು ದಿನ ಬೇಕು!

Team Udayavani, Aug 26, 2020, 6:02 AM IST

ಸಾಂದರ್ಭಿಕ ಚಿತ್ರ

ಮಹಾನಗರ: ಕೋವಿಡ್ ತಪಾಸಣೆಗೆ ಒಳಪಟ್ಟ ವ್ಯಕ್ತಿಗೆ ಸೋಂಕು ಇರುವುದು ದೃಢಪಟ್ಟು ಫಲಿತಾಂಶ ಪಾಸಿಟಿವ್‌ ಬಂದಲ್ಲಿ ಆ ವ್ಯಕ್ತಿಗೆ ಅದೇ ದಿನ ಅಥವಾ ಮರುದಿನ ರಾಜ್ಯ ಸರಕಾರದ “ಆಪ್ತ ಮಿತ್ರ’ ಸಹಾಯವಾಣಿ ಕಚೇರಿಯಿಂದ ಮಾಹಿತಿ ಲಭಿಸುತ್ತದೆ ಹಾಗೂ ರೋಗಿಸಂಖ್ಯೆ ಕೂಡ ತಿಳಿಸಲಾಗುತ್ತದೆ.

ಆದರೆ ಕೆಲವೊಂದು ಸಂದರ್ಭಗಳಲ್ಲಿ ರೋಗಿಸಂಖ್ಯೆ ಆಯಾ ಜಿಲ್ಲೆಯ ಕೋವಿಡ್ ವರದಿಯ ಬುಲೆಟಿನ್‌ನಲ್ಲಿ ನಮೂದಾಗಲು ಕೆಲವು ದಿನಗಳೇ ಬೇಕಾಗುತ್ತಿದ್ದು, ಇದು ಅನೇಕ ಸಂಶಯಗಳಿಗೆ ಎಡೆ ಮಾಡಿಕೊಡುತ್ತದೆ.  ಇದು ಜಿಲ್ಲಾ ಮಟ್ಟದಲ್ಲಿ ಪ್ರತಿ ದಿನ ಸಂಜೆ ಹೊತ್ತು ಪ್ರಕಟಿಸಲಾಗುವ ಕೋವಿಡ್ ರೋಗಿಗಳ (ಪಾಸಿಟಿವ್‌) ಅಂಕಿಸಂಖ್ಯೆ ಎಷ್ಟು ಸರಿ ಎಂಬ ಪ್ರಶ್ನೆಯನ್ನು ಹುಟ್ಟು ಹಾಕುತ್ತಿದೆ. ಅಲ್ಲದೇ ಸೋಂಕಿತರ ಸಂಖ್ಯೆಯನ್ನು ಆಯಾ ದಿನದಂದೇ ತೋರಿಸುವ ಬದಲು ದಿನವಾರು ಹಂಚಿಕೆ ಮಾಡಿ ಬುಲೆಟಿನ್‌ನಲ್ಲಿ ಪ್ರದರ್ಶಿಸಲಾಗುತ್ತಿದೆಯೇ ಎಂಬ ಸಂದೇಹಕ್ಕೆ ಕಾರಣವಾಗುತ್ತಿದೆ.

ಒಂದು ನಿದರ್ಶನ
ಮಂಗಳೂರಿನಲ್ಲಿ ಇತ್ತೀಚೆಗೆ ಕೋವಿಡ್ ತಪಾಸಣೆಗೆ ಒಳಗಾದ ವ್ಯಕ್ತಿಗೆ ಫಲಿತಾಂಶ ಪಾಸಿಟಿವ್‌ ಬಂದು ಪೇಶಿಯಂಟ್‌ ನಂಬರ್‌ ಅದೇ ದಿನ ನೀಡಲಾಗಿದೆ. ಆದರೆ ಈ ನಂಬರ್‌ ಜಿಲ್ಲೆಯ ಕೋವಿಡ್ ವರದಿಯ ಬುಲೆಟಿನ್‌ನಲ್ಲಿ ಸೇರ್ಪಡೆಯಾಗಲು ಬರೊಬ್ಬರಿ 4 ದಿನ ತಗಲಿದೆ!

ವ್ಯಕ್ತಿಯೋರ್ವರಿಗೆ ಇತ್ತೀಚೆಗೆ ಪ್ರಾಥಮಿಕ ಆರೋಗ್ಯ ಕೇಂದ್ರದಲ್ಲಿ ಕೋವಿಡ್ ತಪಾಸಣೆ (ಆ್ಯಂಟಿಜೆನ್‌ ಟೆಸ್ಟ್‌) ನಡೆದಿತ್ತು. ಅದೇ ದಿನ ರಾತ್ರಿ ಅವರಿಗೆ ಬೆಂಗಳೂರಿನ ಆಪ್ತಮಿತ್ರ ಸಹಾಯವಾಣಿ ಕಚೇರಿಯಿಂದ ಕರೆ ಮಾಡಿ ವರದಿ ಪಾಸಿಟಿವ್‌ ಎಂಬ ಮಾಹಿತಿ ಲಭಿಸಿದೆ. ಜತೆಗೆ ರೋಗಿ ಸಂಖ್ಯೆಯನ್ನೂ ತಿಳಿಸಲಾಗಿದೆ. ಆದರೆ ಆ ವ್ಯಕ್ತಿಗೆ ನೀಡಿರುವ ರೋಗಿ ಸಂಖ್ಯೆ ಜಿಲ್ಲೆಯ ಬುಲೆಟಿನ್‌ನಲ್ಲಿ ನಾಲ್ಕು ದಿನಗಳ ಬಳಿಕ ಸೇರ್ಪಡೆಗೊಂಡಿತ್ತು. ಆದರೆ ವಿಶೇಷ ಎಂದರೆ ಅವರ ಕುಟುಂಬದ ಇನ್ನೋರ್ವ ಸದಸ್ಯರಿಗೆ ಪಾಸಿಟಿವ್‌ ಬಂದ ಕಾರಣ ನೀಡಲಾದ ರೋಗಿಸಂಖ್ಯೆ ಮರು ದಿನದ ಬುಲೆಟಿನ್‌ನಲ್ಲಿ ನಮೂದಾಗಿದೆ. ಇಂತಹ ಎಡವಟ್ಟು ಯಾಕಾಗುತ್ತದೆ ಎನ್ನುವುದು ವಿಚಿತ್ರ. ಈಗಾಗಲೇ ಕೋವಿಡ್ ತಪಾಸಣೆ, ವರದಿ ಇತ್ಯಾದಿ ವಿಷಯಗಳ ಕುರಿತಂತೆ ಜನರಲ್ಲಿ ಸಾಕಷ್ಟು ಅನುಮಾನಗಳಿದ್ದು, ಇಂತಹ ಎಡವಟ್ಟಿನ ಪ್ರಕರಣಗಳು ಸಾರ್ವಜನಿಕ ವಲಯದಲ್ಲಿ ಸಂಶಯ ಮತ್ತು ಗೊಂದಲಗಳು ಮತ್ತಷ್ಟು ಜಾಸ್ತಿಯಾಗಲು ಕಾರಣವಾಗುತ್ತಿವೆ.

ಅಂಕಿ-ಅಂಶಗಳ ನಿಖರತೆ ಅಗತ್ಯ
ಸಾಮಾನ್ಯವಾಗಿ ಕೋವಿಡ್ ತಪಾಸಣೆಗೆ ಒಳಪಟ್ಟ ವ್ಯಕ್ತಿಯ ವರದಿ ಪಾಸಿಟಿವ್‌ ಬಂದಲ್ಲಿ ಮರು ದಿನವೇ ಜಿಲ್ಲೆಯ ಸೋಂಕಿತರ ಪಟ್ಟಿಯಲ್ಲಿ ಸೇರ್ಪಡೆಗೊಂಡು ಜಿಲ್ಲಾ ಬುಲೆಟಿನ್‌ನಲ್ಲಿ ಆತನ ಪೇಶಿಯಂಟ್‌ ನಂಬರ್‌ ನಮೂದಾಗುತ್ತದೆ. ಅಲ್ಲದೆ ಅಂಕಿ-ಅಂಶಗಳ ನಿಖರತೆಯನ್ನು ಕಾಯ್ದುಕೊಂಡು ಬರ ಬೇಕಾದರೆ ಮರುದಿನದ ಬುಲೆಟಿನ್‌ನಲ್ಲಿ ಅದು ನಮೂದಾಗಲೇಬೇಕು. ಆದರೆ ಕೆಲವೊಂದು ಪ್ರಕರಣಗಳಲ್ಲಿ ಹಾಗಾಗುತ್ತಿಲ್ಲ ಎನ್ನುವುದು ವಾಸ್ತವ.

ಡೇಟಾ ಎಂಟ್ರಿಯಲ್ಲಾಗುವ ವಿಳಂಬ ಸಾಧ್ಯತೆ
ಇತ್ತೀಚಿನ ದಿನಗಳಲ್ಲಿ ಕೋವಿಡ್ ಸೋಂಕಿತರ ಪ್ರಕರಣಗಳು ಹೆಚ್ಚುತ್ತಲೇ ಇವೆ. ಇದರಿಂದಾಗಿ ಆರೋಗ್ಯ ಇಲಾಖೆಯ ಮೇಲೆ ಕೆಲಸದ ಹೊರೆ ಜಾಸ್ತಿ ಆಗುತ್ತಿದೆ. ಡೇಟಾ ಎಂಟ್ರಿ ಮಾಡುವಲ್ಲಿ ವಿಳಂಬ ಆಗುವುದರಿಂದ ಈ ರೀತಿಯ ಎಡವಟ್ಟುಗಳು ಆಗುವ ಸಾಧ್ಯತೆ ಇದೆ.
– ರಾಮಚಂದ್ರ ಬಾಯರಿ, ದ.ಕ. ಜಿಲ್ಲಾ ಆರೋಗ್ಯ ಅಧಿಕಾರಿ.