Kadri: ಬೃಹತ್‌ ಗಾತ್ರದ ಚಿಟ್ಟೆ, ಜೀರುಂಡೆ !

Team Udayavani, Dec 26, 2024, 1:09 PM IST

ಕದ್ರಿ: ಚಿಟ್ಟೆ, ಚೇಳು, ಜೀರುಂಡೆ, ಒಂಟೆ ಹುಳಗಳನ್ನು ನೀವು ನೋಡಿರಬಹುದು. ಆದರೆ, ಇವುಗಳನ್ನು ರೋಬೊಟಿಕ್‌ ಸ್ವರೂಪದಲ್ಲಿ ನೋಡಿರುವವರು ಕಡಿಮೆ ಮಂದಿ. ಒಂದು ವೇಳೆ ರೋಬೊಟಿಕ್‌ ಆಗಿ ಇವುಗಳನ್ನು ನೋಡಬೇಕಾದರೆ ಮಂಗಳೂರಿನ ಕದ್ರಿ ಪಾರ್ಕ್‌ನಲ್ಲಿ ನಡೆಯುತ್ತಿರುವ ಅಪರೂಪದ ‘ರೋಬೊಟಿಕ್‌ ಬಟರ್‌ಫ್ಲೈ ಶೋ’ ವೀಕ್ಷಿಸಬಹುದು!

ಕರಾವಳಿ ಉತ್ಸವದ ಹಿನ್ನೆಲೆಯಲ್ಲಿ ಮಂಗಳೂರಿನಲ್ಲಿ ನಡೆಯುತ್ತಿರುವ ಪ್ರಥಮ ರೋಬೋಟಿಕ್‌ ಬಟರ್‌ಫ್ಲೈ ಶೋ ಇದು. ಜ.19ವರೆಗೂ ಇದು ಇರಲಿದೆ. ಸಂಜೆ 4ರಿಂದ ರಾತ್ರಿ 9ರವರೆಗೆ ಪ್ರದರ್ಶನವಿರಲಿದೆ. ಪ್ರವೇಶ ಶುಲ್ಕ 50 ರೂ. ಶಾಲಾ ಮಕ್ಕಳಿಗೆ ಶೇ.50 ರಿಯಾಯಿತಿ ದರವಿದೆ. ಈಗಿನ ಪೀಳಿಗೆಗೆ ಒಂದೇ ಸೂರಿನಡಿ ಮಿಡತೆ, ಡ್ರಾಗನ್‌ಫ್ಲೈ , ಹಾರುವ ಇರುವೆ, ಅಲೇಟ್ಸ್‌, ಚೇಳು, ಹರ್ಕ್ಯಲಸ್‌ ಜೀರುಂಡೆ, ಕಣಜ, ಒಂಟೆಹುಳು, ಜೇನು ಹುಳು ಸಹಿತ ಎಲ್ಲ ಚಿಟ್ಟೆಗಳನ್ನು ನೋಡುವ ಅವಕಾಶವಿದೆ. ಮಕ್ಕಳಿಗೆ ಅರಿವು ನೀಡಲು ಇದೊಂದು ಸುವರ್ಣ ಅವಕಾಶ.

ಮಕ್ಕಳಿಗೆ, ಯುವ ಜನತೆಗೆ ಹಾಗೂ ಪ್ರದರ್ಶನಕ್ಕೆ ಭೇಟಿ ಕೊಡುವ ನಾಗರಿಕರಿಗೆ ವಿವಿಧ ಆಕರ್ಷಣೆಯ ರೋಬೊಟಿಕ್‌ ಮಾದರಿಯಲ್ಲಿ ಶೋ ಏರ್ಪಾಡು ಮಾಡಲಾಗಿದೆ. ಇದರಲ್ಲಿ ಹಲವು ಜಾತಿಯ ಚಿಟ್ಟೆಗಳನ್ನು ರೋಬೊಟಿಕ್‌ ಮಾದರಿಯಲ್ಲಿ ತೋರಿಸಲಾಗಿದೆ. ಬೆಳಕಿನ ಸಿಂಗಾರವಿದೆ. ಕಲಿಕೆಗೆ ಹೊಸ ಅವಕಾಶವೂ ಇಲ್ಲಿದೆ.