ಮಲ್ಪೆ ಬಂದರು ರಸ್ತೆ: ಡಿವೈಡರ್‌ ತೆರವು; ಕಬ್ಬಿಣದ ಸರಳುಗಳಿಂದ ಅಪಘಾತಕ್ಕೆ ಆಹ್ವಾನ

Team Udayavani, Sep 12, 2022, 3:00 PM IST

ಮಲ್ಪೆ: ಮಲ್ಪೆ ಬಂದರಿನಿಂದ ಪಶ್ಚಿಮ ದಿಕ್ಕಿಗೆ ಹೋಗುವ ರಸ್ತೆಯ ಡಿವೈಡರ್‌ನ್ನು ತೆರವು ಮಾಡಲಾಗುತ್ತಿದ್ದು, ಡಿವೈಡರ್‌ ನಿರ್ಮಾಣ ವೇಳೆ ಹಾಕಲಾಗಿದ್ದ ಕಬ್ಬಿಣದ ಸರಳುಗಳನ್ನು ಅರ್ಧದಲ್ಲೇ ತುಂಡರಿಸಲಾಗಿದ್ದು ಈ ರಸ್ತೆಯಲ್ಲಿ ಸಂಚರಿಸುವ ವಾಹನ ಸವಾರರಿಗೆ ಅಪಾಯದ ಮುನ್ಸೂಚನೆ ನೀಡುತ್ತಿದೆ.

ಈ ರಸ್ತೆಯಲ್ಲಿ ಟೆಂಪೋ ಹಾಗೂ ದ್ವಿಚಕ್ರ ವಾಹನಗಳು ಸೇರಿದಂತೆ ಇತರ ನೂರಾರು ವಾಹನಗಳು ದಿನನಿತ್ಯ ಚಲಿಸುತ್ತದೆ. ರಸ್ತೆಯಲ್ಲಿ ಡಿವೈಡರ್‌ ತೆರವುಗೊಳಿಸುವ ವೇಳೆ ಅರ್ಧ ತುಂಡರಿಸಿ ಬಿಟ್ಟಿರುವ ಕಬ್ಬಿಣ ಸರಳುಗಳ ತುದಿಗಳು ರಸ್ತೆಯಲ್ಲಿ ಮೇಲ್ಮುಖವಾಗಿ ಗೋಚರಿಸುತ್ತಿದ್ದು, ಇದರಿಂದ ಈಗಾಗಲೇ ಹಲವು ವಾಹನಗಳ ಚಕ್ರಗಳು ಇದರ ಮೇಲೆ ಚಲಿಸಿ ಟಯರ್‌ ಪಂಕ್ಚರ್‌ ಆಗುತ್ತಿದೆ.

ಈ ಮಾರ್ಗದಲ್ಲಿ ಸಂಚರಿಸುವ ವಾಹನಗಳ ಚಕ್ರ ಪಂಕ್ಚರ್‌ ಆದರೆ ಅಪಘಾತ ಸಂಭವಿಸುವ ಸಾಧ್ಯತೆಗಳು ಹೆಚ್ಚಿವೆ. ಇದೀಗ ಕಬ್ಬಿಣದ ಸರಳಗಳು ಕಾಣುತ್ತಿರುವುದು ಸಾರ್ವಜನಿಕರ ಆಕ್ರೋಶಕ್ಕೂ ಕಾರಣವಾಗಿದೆ. ಈ ಬಗ್ಗೆ ಸಂಬಂಧ ಪಟ್ಟವರು ತತ್‌ಕ್ಷಣ ಕ್ರಮ ಕೈಗೊಳ್ಳಬೇಕು ಎಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.