ಮಂಗಳೂರು ಜಂಕ್ಷನ್‌-ಯಶವಂತಪುರ ರೈಲು ಸೆಂಟ್ರಲ್‌ಗೆ ವಿಸ್ತರಿಸಲು ಆಗ್ರಹ

Team Udayavani, Apr 26, 2017, 10:39 AM IST

ಮಂಗಳೂರು : ಇತ್ತೀಚೆಗೆ ಆರಂಭವಾಗಿರುವ ಮಂಗಳೂರು ಜಂಕ್ಷನ್‌- ಯಶವಂತಪುರ ರೈಲನ್ನು (ನಂ. 16575/ 16576) ಮಂಗಳೂರು ಸೆಂಟ್ರಲ್‌ಗೆ ವಿಸ್ತರಿ ಸುವಂತೆ ಪಾಲಾ^ಟ್‌ ವಿಭಾಗ ರೈಲ್ವೇ ಬಳಕೆದಾರರ ಸಲಹಾ ಸಮಿತಿ ಸದಸ್ಯ ಹನುಮಂತ ಕಾಮತ್‌ ಆಗ್ರಹಿಸಿದ್ದಾರೆ. 

ಬಳಕೆದಾರರ ಸಲಹಾ ಸಮಿತಿ ಸಭೆ ಪಾಲಾ^ಟ್‌ನಲ್ಲಿ ಎ. 27ರಂದು ಜರಗಲಿದ್ದು, ಈ ವಿಭಾಗದಲ್ಲಿ ಮಂಗಳೂರಿಗೆ ಸಂಬಂಧಿಸಿದ ಪ್ರಮುಖ ರೈಲು ಬೇಡಿಕೆಗಳ ಬಗ್ಗೆ ಚರ್ಚೆ ನಡೆಯಲಿದೆ. ಈನೆಲೆಯಲ್ಲಿ ಪಾಲಾ^ಟ್‌ ವಿಭಾಗ ರೈಲ್ವೇ ಬಳಕೆದಾರರ ಸಭೆ ಮಹತ್ವ ಪಡೆದುಕೊಂಡಿದೆ. 

ಡೆಮು ವೇಳಾಪಟ್ಟಿ ಪರಿಷ್ಕರಣೆ ಮಂಗಳೂರು- ಕಾರವಾರ ನಡುವೆ ಪ್ರಸ್ತುತ ಸಂಚರಿಸುತ್ತಿರುವ ಡೆಮು ರೈಲಿನ ವೇಳಾಪಟ್ಟಿ ಪರಿಷ್ಕರಿಸಿ ಪ್ರಯಾಣಿಕರಿಗೆ ಹೆಚ್ಚು ಉಪಯೋಗವಾಗುವಂತೆ ಮಾಡಬೇಕು ಎಂದು ಆಗ್ರಹಿಸಲಾಗಿದೆ. ಉದ್ಯೋಗಿ, ವ್ಯಾಪಾರಿ, ವಿದ್ಯಾರ್ಥಿಗಳು ಹಾಗೂ ಸಾರ್ವಜನಿಕರು ಸೇರಿ
ದಂತೆ ಹೆಚ್ಚಿನ ಸಂಖ್ಯೆಯಲ್ಲಿ ಮಂಗಳೂರು-ಉಡುಪಿ-ಕಾರವಾರ ಮಾರ್ಗದಲ್ಲಿ ಪ್ರಯಾಣಿಕರಿದ್ದಾರೆ. ಆದರೆ ಪ್ರಸ್ತುತ ಈ ರೈಲು ಮಂಗಳೂರು ಸೆಂಟ್ರಲ್‌ನಿಂದ ಅಪರಾಹ್ನ 3ಕ್ಕೆ ಹೊರಡುತ್ತಿದ್ದು, ಇದರಿಂದ ಹೆಚ್ಚಿನ ಪ್ರಯೋಜನವಾಗುತ್ತಿಲ್ಲ. ಸಂಜೆ 4ರ ಬಳಿಕ ಅದರಲ್ಲೂ ಸಂಜೆ 5.30ರ ಬಳಿಕ ಈ ರೈಲು ಹೊರಟರೆ ಹೆಚ್ಚಿನ ಜನರಿಗೆ ಪ್ರಯೋಜನವಾಗಲಿದೆ. ಆದುದರಿಂದ ಇದನ್ನು ಪರಿಶೀಲಿಸಿ ಕೊಂಕಣ ರೈಲ್ವೇಗೆ ಜಾರಿಗೊಳಿಸಲು ಶಿಫಾರಸು ಮಾಡಬೇಕು ಎಂದು ಕಾಮತ್‌ ಸಲಹೆ ಮಾಡಿದ್ದಾರೆ.

ಮಂಗಳೂರು ಸೆಂಟ್ರಲ್‌-ಮಂಗಳೂರು ಜಂಕ್ಷನ್‌ ನಡುವೆ 1 ಕಿ.ಮೀ. ಮಾರ್ಗ ಹಳಿ ದ್ವಿಗುಣಗೊಳಿಸಲು ಬಾಕಿ ಇದೆ. ಇದರಿಂದ ರೈಲು ಆಗಮನ, ನಿರ್ಗಮನದಲ್ಲಿ ವಿಳಂಬವಾಗುತ್ತಿದೆ. ಆದುದರಿಂದ ಬಾಕಿ ಉಳಿದಿರುವ ಮಾರ್ಗದಲ್ಲಿ ಹಳಿ ದ್ವಿಗುಣಗೊಳಿಸಬೇಕು ಎಂದರು.