Mangaluru: ಕಾಂಕ್ರೀಟ್‌ ರಸ್ತೆಯ ನಡುವೆ ಹಣ್ಣಿನ ಫ‌ಸಲು!

Team Udayavani, Dec 17, 2024, 3:04 PM IST

ಬಾವುಟಗುಡ್ಡೆ: ಕಾಂಕ್ರೀಟ್‌ ರಸ್ತೆ, ಇಂಟರ್‌ಲಾಕ್‌ನ ಫ‌ುಟ್‌ಪಾತ್‌ಗಳ ನಿರ್ಮಾಣದ ಭರಾಟೆಯಲ್ಲಿ ನಗರದ ಗಿಡ, ಮರಗಳಿಗೆ ಅವಕಾಶವಿಲ್ಲ ಎಂಬಂತಹ ಈ ಸಂದರ್ಭದಲ್ಲಿ ಮಾದರಿಯೆನಿಸುವಂತಹ ಹಣ್ಣಿನ ಗಿಡಗಳು ಬಾವುಟಗುಡ್ಡೆಯ ಮುಖ್ಯ ರಸ್ತೆಯಲ್ಲಿ ನಳನಳಿಸುತ್ತಿವೆ, ಮಾತ್ರವಲ್ಲ ಹಣ್ಣು ಬಿಟ್ಟಿರುವ ಗಿಡಗಳು ಆಕರ್ಷಣೆಗೆ ಕಾರಣವಾಗಿವೆ.

ಬಾವುಟಗುಡ್ಡೆ ಸಮೀಪದ ಮೂಲ್ಕಿ ಸುಂದರರಾಮ ಶೆಟ್ಟಿ ಮುಖ್ಯರಸ್ತೆಯ ಅಂಚಿನಲ್ಲಿ (ಮಾಹೆ ಮುಂಭಾಗ) ನೆಟ್ಟಿರುವ ಧಾರೆಪುಳಿ, ಬಿಂಪುಳಿ, ಜಂಬೂ ನೇರಳೆಯ ಗಿಡಗಳಲ್ಲಿ ಈಗ ಹಣ್ಣುಗಳು ಬೆಳೆಯ ಲಾರಂಭಿಸಿವೆ. ಲಭ್ಯ ಸೀಮಿತ ಜಾಗದಲ್ಲಿ ಅತ್ತ ಫ‌ುಟ್‌ಪಾತ್‌, ಇತ್ತ ಕಾಂಕ್ರೀಟ್‌ ರಸ್ತೆಯ ನಡುವೆ ಸೊಂಪಾಗಿ ಬೆಳೆದಿರುವ ಈ ಗಿಡಗಳು ಆಳೆತ್ತರಕ್ಕೆ ಬೆಳೆಯುವ ಮೊದಲೇ ಹಣ್ಣುಗಳನ್ನು ತುಂಬಿಸಿಕೊಳ್ಳುತ್ತಿದ್ದು ದಾರಿ ಹೋಕರನ್ನು ಆಕರ್ಷಿಸುತ್ತಿದೆ.

ವರ್ಷದ ಹಿಂದೆ ನೆಟ್ಟ ಗಿಡ
ಮಂಗಳೂರು ಸ್ಮಾರ್ಟ್‌ ಸಿಟಿ ಯೋಜನೆ ಯವರ ಸಲಹೆಯಂತೆ ಪರಿಸರ ಪ್ರೇಮಿ ಮಾಧವ ಉಳ್ಳಾಲ ಅವರು ಪ್ರಾಯೋಜ ಕರೋರ್ವರ ನೆರವಿನಲ್ಲಿ ಈ ಗಿಡಗಳನ್ನು ನೆಟ್ಟು ಪೋಷಿಸಿಕೊಂಡು ಬಂದಿದ್ದಾರೆ. ಕಳೆದ ಮಳೆಗಾಲದ ಕೊನೆಯ ಹಂತದಲ್ಲಿ ಈ ಗಿಡಗಳನ್ನು ನೆಡಲಾಗಿತ್ತು. ಬಳಿಕ ಬೇಸಗೆಯಲ್ಲಿ ವಾರಕ್ಕೊಮ್ಮೆ ನೀರುಣಿಸುತ್ತಿದ್ದರು. ಈಗ ಕೆಲವು ಗಿಡಗಳು ಹೂ ಬಿಟ್ಟಿವೆ, ಇನ್ನು ಕೆಲವು ಹಣ್ಣುಗಳಿಂದ ಕಂಗೊಳಿಸುತ್ತಿವೆ. ಇಲ್ಲಿ ಬೆಟ್ಟದ ನೆಲ್ಲಿ, ಸಿಹಿ ನೆಲ್ಲಿ, 3 ವಿಧದ ಜಂಬೂ ನೇರಳೆ, ಜಾರಿಗೆ ಸೇರಿದಂತೆ 15 ಗಿಡಗಳಿವೆ.

‘ಹಣ್ಣುಗಳ ನಗರ’ ಪರಿಕಲ್ಪನೆ
ಈಗಾಗಲೇ ಕೆಲವು ಗಿಡಗಳಲ್ಲಿ ಹಣ್ಣಾಗಿದೆ. 1 ತಿಂಗಳಲ್ಲಿ ಜಂಬೂ ನೇರಳೆಯೂ ಆಗಲಿದೆ. ಈ ಗಿಡಗಳು ತೀರಾ ಎತ್ತರಕ್ಕೆ ಬೆಳೆಯದೆಯೇ ಫ‌ಲ ನೀಡುತ್ತಿವೆ. ಅಕ್ಕಪಕ್ಕದ ಅಂಗಡಿಯವರಿಗಾಗಲಿ, ಫ‌ುಟ್‌ಪಾತ್‌ನಲ್ಲಿ ಸಂಚರಿಸುವವರಿಗಾಗಲಿ ಅಥವಾ ವಾಹನಗಳಿಗಾಗಲಿ ತೊಂದರೆಯಾಗುವುದಿಲ್ಲ. ಇಂತಹ ಪ್ರಯತ್ನ ಫ‌ಲ ನೀಡಿದಾಗ ಖುಷಿಯಾಗುತ್ತದೆ. ಪ್ರೋತ್ಸಾಹ ದೊರೆತರೆ ನಗರದ ಇತರ ಕಡೆಗಳಲ್ಲಿಯೂ ಇದೇ ರೀತಿ ಲಭ್ಯವಿರುವ ಜಾಗದಲ್ಲಿ ಇಂತಹುದೇ ಗಿಡಗಳನ್ನು ಬೆಳೆಸಬಹುದು. ಮಂಗಳೂರನ್ನು ಹಣ್ಣುಗಳ ನಗರವನ್ನಾಗಿಸುವ ಉದ್ದೇಶದಿಂದ ನಡೆಯುತ್ತಿರುವ ಈ ಕೆಲಸಗಳಿಗೆ ಪ್ರೋತ್ಸಾಹದ ಅಗತ್ಯವಿದೆ ಎನ್ನುತ್ತಾರೆ ಮಾಧವ ಉಳ್ಳಾಲ ಅವರು.