ಸಂತ್ರಸ್ತರಿಗೆ ಶೀಘ್ರ ಪರಿಹಾರ ಒದಗಿಸಿ: ಜಿಲ್ಲಾಧಿಕಾರಿ

Team Udayavani, Jul 9, 2018, 12:19 PM IST

ಮೂಲ್ಕಿ: ಮಳೆಯಿಂದ ಹಾನಿಗೊಳ ಗೊಳಗಾದವರ ಎಲ್ಲ ವಿವರ, ಕಡತಗಳನ್ನು ತತ್‌ಕ್ಷಣ ಜಿಲ್ಲಾಧಿಕಾರಿಗಳ ಕಚೇರಿಗೆ ಕಳುಹಿಸಿ ಸಂತ್ರಸ್ತರಿಗೆ ಸರಕಾರದ ಪರಿಹಾರವನ್ನು ಆದಷ್ಟು ಶೀಘ್ರದಲ್ಲಿ ಒದಗಿಸುವಲ್ಲಿ ಕ್ರಮ ಜರಗಿಸುವಂತೆ ಜಿಲ್ಲಾಧಿಕಾರಿ ಶಶಿಕಾಂತ್‌ ಸೆಂಥಿಲ್‌ ಅವರು ಕಂದಾಯ ಇಲಾಖೆಯ ಅಧಿಕಾರಿಗಳಿಗೆ ಸೂಚನೆ ನೀಡಿದರು. ಅವರು ಎರಡು ದಿನಗಳ ಮಳೆಯಿಂದ ತತ್ತರಿಸಿದ ಮೂಲ್ಕಿ ವ್ಯಾಪ್ತಿಯ ಕಕ್ವ, ಮಾನಂಪಾಡಿ, ಮಟ್ಟು, ಕಡವಿನ ಬಾಗಿಲು, ಪಂಜ ಮುಂತಾದ ವಿವಿಧ ಪ್ರದೇಶಗಳಿಗೆ ರವಿವಾರ ಮಧ್ಯಾಹ್ನ ಭೇಟಿಯಿತ್ತರು.

ಅಧಿಕಾರಿಗಳಿಂದ ಮಾಹಿತಿ
ಹಾನಿಯ ವಿವರ ಹಾಗೂ ಘಟನೆಯ ತೀವ್ರತೆಯ ಬಗ್ಗೆ ಸ್ವತಃ ಕಂಡು ಸ್ಥಳೀಯರಿಂದ ಅಧಿಕಾರಿಗಳಿಂದ ಅವರು ಮಾಹಿತಿ ಪಡೆದರು. ವಿಶೇಷ ತಹಶೀಲ್ದಾರ್‌ ಮಾಣಿಕ್ಯ, ಮೂಲ್ಕಿ ನಗರ ಪಂಚಾಯತ್‌ ಮುಖ್ಯಾಧಿಕಾರಿ ಇಂದು ಎಂ., ಕಂದಾಯ ನೀರೀಕ್ಷಕ ದಿಲೀಪ್‌ ರೋಡ್‌ಕಾರ್‌, ಗ್ರಾಮ ಲೆಕ್ಕಾಧಿಕಾರಿಗಳಾದ ಪ್ರದೀಪ್‌ ಶೆಣೈ, ಮಂಜುನಾಥ್‌, ಸಂತೋಷ್‌ ಮತ್ತು ಸುನೀಲ್‌ ಕುಮಾರ್‌ ಮೊದಲಾದ ಅಧಿಕಾರಿಗಳು ಈ ಸಂದರ್ಭ ಉಪಸ್ಥಿತರಿದ್ದರು.