ಆಲಂಕಾರು: ಹೊಸ 108 ಆ್ಯಂಬುಲೆನ್ಸ್ ನಿಯೋಜನೆ

Team Udayavani, Oct 13, 2018, 2:49 PM IST

ಆಲಂಕಾರು: ಕಳೆದ ಕೆಲವು ವರ್ಷಗಳಿಂದ ಆಲಂಕಾರಿನಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದ ಹಳೆಯ 108 ಆ್ಯಂಬುಲೆನ್ಸ್‌ ವಾಹನವನ್ನು ಹಿಂಪಡೆದುಕೊಂಡು ಆಧುನಿಕ ಸೌಲಭ್ಯವುಳ್ಳ 108 ಆ್ಯಂಬುಲೆನ್ಸ್‌ ಅನ್ನು ಆಲಂಕಾರಿಗೆ ಕರ್ತವ್ಯಕ್ಕೆ ನಿಯೋಜಿಸಲಾಗಿದೆ.

ಕಳೆದ ಕೆಲವು ದಿನಗಳ ಹಿಂದೆ ದುರಸ್ತಿಗೆಂದು ತೆರಳಿದ್ದ 108 ಆ್ಯಂಬುಲೆನ್ಸ್‌ ಸುಮಾರು 25 ದಿನಗಳವರೆಗೆ ಕಾಣೆಯಾಗಿತ್ತು. ಈ ಸಂದರ್ಭದಲ್ಲಿ ಜನತೆ ತುರ್ತು ಸೇವೆಗಳಿಗಾಗಿ ಖಾಸಗಿ ವಾಹನದ ಮೊರೆ ಹೋಗಬೇಕಾದ ಪ್ರಸಂಗ ಎದುರಾಗಿತ್ತು. ಆಲಂಕಾರಿನ 108 ವಾಹನವನ್ನು ಮತ್ತೆ ಆಲಂಕಾರಿಗೆ ಕರೆಸುವ ಹಿನ್ನೆಲೆಯಲ್ಲಿ ಗ್ರಾಮದ ಜನತೆ ಪ್ರತಿಭಟನೆಗೂ ಸಿದ್ಧತೆ ನಡೆಸಿಕೊಂಡಿದ್ದರು.

ಈ ಬಗ್ಗೆ ಉದಯವಾಣಿ ‘ಸುದಿನ’ದಲ್ಲಿ ಸಚಿತ್ರ ವರದಿಯನ್ನೂ ಪ್ರಕಟಿಸಲಾಗಿತ್ತು. ಈ ಬಗ್ಗೆ ಸಂಬಂಧಪಟ್ಟ ಇಲಾಖೆಯ ಜಿಲ್ಲಾ ಉಸ್ತುವಾರಿಯವರು ಶೀಘ್ರವೇ ಆಲಂಕಾರಿಗೆ ಹೊಸ ವಾಹನದ ವ್ಯವಸ್ಥೆ ಮಾಡುವುದಾಗಿ ಭರವಸೆ ನೀಡಿದ್ದರು. ನುಡಿದಂತೆ ನಡೆದ ಅಧಿಕಾರಿಗಳು ನೂತನ 108 ವಾಹನದ ವ್ಯವಸ್ಥೆಯನ್ನು ಮಾಡಿದ್ದು, ಗುರುವಾರದಿಂದ ಅಧಿಕೃತವಾಗಿ ಕರ್ತವ್ಯಕ್ಕೆ ಚಾಲನೆ ಸಿಕ್ಕಿದೆ.

ವಾಹನದ ಇಎಂಟಿ ಜ್ಯೋತಿಪ್ರಕಾಶ್‌ ಪತ್ರಿಕೆಯೊಂದಿಗೆ ಮಾತನಾಡಿ, ನೂತನ ವಾಹನವು ಅತ್ಯಾಧುನಿಕ ಸೌಲಭ್ಯವನ್ನು ಹೊಂದಿದ್ದು, ಎಲ್ಲ ತುರ್ತು ಚಿಕಿತ್ಸೆಗಳಿಗೆ ಸಂಪೂರ್ಣ ಸಜ್ಜಾಗಿದೆ. ಸಾರ್ವಜನಿಕರು ಇದರ ಸದುಪಯೋಗ ಪಡೆದುಕೊಳ್ಳಬೇಕು ಎಂದವರು ತಿಳಿಸಿದ್ದಾರೆ. ವಾಹನ ಚಾಲಕ ಸತೀಶ್‌ ಉಪಸ್ಥಿತರಿದ್ದರು.