Helmet ಧರಿಸದೆ ಬಂದ ಬೈಕ್‌ ಸವಾರ; ಬೈಕ್‌ಗೆ ಲಾಕ್‌ ಹಾಕಿದ ಟ್ರಾಫಿಕ್‌ ಪೊಲೀಸರು

Team Udayavani, Jan 14, 2024, 12:32 AM IST

ಬಂಟ್ವಾಳ: ಸವಾರನೋರ್ವ ಹೆಲ್ಮೆಟ್‌ ಧರಿಸದೆ ಬೈಕ್‌ ಚಲಾಯಿಸುತ್ತಿದ್ದಾಗ ನಿಲ್ಲಿಸಲು ಸಂಚಾರ ಪೊಲೀಸರು ಹೇಳಿದರೂ ನಿಲ್ಲಿಸಿಲ್ಲ ಎಂದು ಆತನನ್ನು ಹಿಂಬಾಲಿಸಿಕೊಂಡು ಬಂದು ಬೈಕ್‌ಗೆ ಲಾಕ್‌ ಹಾಕಿದ ಘಟನೆ ಬಂಟ್ವಾಳದಲ್ಲಿ ಶನಿವಾರ ಸಂಭವಿಸಿದೆ.

ಬಂಟ್ವಾಳ ಟ್ರಾಫಿಕ್‌ ಎಎಸ್‌ಐ ಜನಾರ್ದನ ಹಾಗೂ ಟ್ರಾಫಿಕ್‌ ಸಿಬಂದಿ ಮೆಕ್ಯಾನಿಕ್‌ ಭಾಸ್ಕರ ಅವರ ಬೈಕ್‌ ಅನ್ನು ಹಿಂಬಾಲಿಸಿಕೊಂಡು ಬಂದಿದ್ದರು. ಅವರು ರಿಪೇರಿಗೆ ಬಂದಿದ್ದ ಬೈಕನ್ನು ಟೆಸ್ಟ್‌ ರೈಡ್‌ ಮಾಡುತ್ತಿದ್ದರು. ಆ ಬಳಿಕ ತಾ.ಪಂ.ಬಳಿ ಇದ್ದ ಬೈಕ್‌ನ ಚಕ್ರಕ್ಕೆ ಪೊಲೀಸರು ಲಾಕ್‌ ಹಾಕಿದ್ದರು. ಪೊಲೀಸರ ಈ ಕ್ರಮವನ್ನು ಸಾರ್ವಜನಿಕರು ಪ್ರಶ್ನಿಸಿದಗ ಇಬ್ಬರ ನಡುವೆ ವಾಗ್ವಾದ ನಡೆಯಿತು.

ಸಾಕಷ್ಟು ಹೊತ್ತು ವಾಗ್ವಾದ ನಡೆದು ಬೈಕಿನ ಲಾಕ್‌ ತೆಗೆದ ಬಳಿಕ ಪರಿಸ್ಥಿತಿ ತಣ್ಣಗಾಯಿತು. ನೀವು ಸಣ್ಣ ವಾಹನಗಳನ್ನು ಹಿಂಬಾಲಿಸಿಕೊಂಡು ಬರುತ್ತೀರಿ, ಆದರೆ ಟ್ರಾಫಿಕ್‌ ರೂಲ್ಸ್‌ ಬ್ರೇಕ್‌ ಮಾಡುವ ಪ್ರಭಾವಿಗಳ ವಾಹನಗಳನ್ನು ಏನೂ ಮಾಡುವುದಿಲ್ಲ, ಬಿ.ಸಿ.ರೋಡು ಬಸ್‌ ನಿಲ್ದಾಣದಲ್ಲಿ ಹಲವು ದಿನಗಳಿಂದ ಕಳ್ಳತನ ನಡೆಯುತ್ತಿದ್ದರೂ, ಅವರ ಪತ್ತೆಗೆ ಗಂಭೀರ ಪ್ರಯತ್ನ ನಡೆಸುತ್ತಿಲ್ಲ ಎಂದು ಸಾರ್ವಜನಿಕರು ಆರೋಪಿಸಿದರು.