ಮಿನಿ ವಿಧಾನಸೌಧ: ವಿದ್ಯುತ್ ಕೈಕೊಟ್ಟು ಲಿಫ್ಟ್ ನಲ್ಲಿ ಸಿಕ್ಕಿಹಾಕಿಕೊಂಡ ಮಹಿಳಾ ಸಿಬ್ಬಂದಿ

Team Udayavani, Jun 16, 2020, 4:36 PM IST

ಬಂಟ್ವಾಳ: ಬಿ.ಸಿ.ರೋಡಿನಲ್ಲಿರುವ ಮಿನಿ ವಿಧಾನಸೌಧದ ಲಿಫ್ಟ್ ಸಂಚರಿಸುತ್ತಿದ್ದಾಗ ವಿದ್ಯುತ್ ಕೈಕೊಟ್ಟು ಬಂಟ್ವಾಳ ತಾಲೂಕು ಕಚೇರಿಯ ಸರ್ವೇ ಇಲಾಖೆಯ ಮಹಿಳಾ ಸಿಬಂದಿಯೊಬ್ಬರು ಸುಮಾರು ಅರ್ಧ ತಾಸುಗಳ ಕಾಲ ಲಿಫ್ಟ್ ನಲ್ಲೇ ಬಾಕಿಯಾದ ಘಟನೆ ಮಂಗಳವಾರ ನಡೆದಿದೆ.

ಮಿನಿ ವಿಧಾನಸೌಧದ ಎರಡನೇ ಮಹಡಿಯಲ್ಲಿ ಸರ್ವೇ ಇಲಾಖೆ ಕಾರ್ಯಾಚರಿಸುತ್ತಿದ್ದು, ಸಿಬ್ಬಂದಿ ಎಂದಿನಂತೆ ಬೆಳಗ್ಗೆ ಕಚೇರಿಗೆ ತೆರಳುವ ಸಂದರ್ಭದಲ್ಲಿ ಲಿಫ್ಟ್ ಬಳಸಿದ್ದಾರೆ. ಆದರೆ ಪ್ರತಿ ಮಂಗಳವಾರ ಬಂಟ್ವಾಳ ವ್ಯಾಪ್ತಿಯಲ್ಲಿ ವಿದ್ಯುತ್ ದುರಸ್ತಿಯ ದಿನವಾಗಿದ್ದು, ಹೀಗಾಗಿ ಎಂದಿನಂತೆ ವಿದ್ಯುತ್ ಕಡಿತಗೊಂಡಿದೆ.

ಸಾಮಾನ್ಯವಾಗಿ ವಿದ್ಯುತ್ ಕೈಕೊಟ್ಟ ಸ್ವಲ್ಪ ಸಮಯದ ಬಳಿಕ ಜನರೇಟರ್ ಆನ್ ಮಾಡಿದಾಗ ಲಿಫ್ಟ್ ಕಾರ್ಯಾಚರಿಸುತ್ತದೆ. ಆದರೆ ಅದಕ್ಕಿಂತ ಮೊದಲೇ ಲಿಫ್ಟ್ ನೊಳಗಿದ್ದ ಸಿಬಂದಿ ಬೇರೊಬ್ಬರಿಗೆ ಫೋನ್ ಮಾಡಿದ್ದು, ಆಗ ಅಲ್ಲಿದ್ದ ಸಾರ್ವಜನಿಕರು ಲಿಫ್ಟ್ ನ ಬಾಗಿಲನ್ನು ಬಲಪ್ರಯೋಗ ಮಾಡಿ ತೆಗೆಯಲು ಯತ್ನಿಸಿದಾಗ ಲಿಫ್ಟ್ ಕೆಟ್ಟು ಹೋಗಿದೆ.

ಹೀಗಾಗಿ ಸಿಬ್ಬಂದಿ ಸುಮಾರು ಅರ್ಧ ತಾಸುವರೆಗೆ ಲಿಫ್ಟ್ ನಲ್ಲೇ ಬಾಕಿಯಾಗಬೇಕಾಯಿತು. ಬಳಿಕ ಲಿಫ್ಟ್ ದುರಸ್ತಿ ಪಡಿಸುವ ನುರಿತ ಸಿಬ್ಬಂದಿ ಆಗಮಿಸಿ ದುರಸ್ತಿ ಮಾಡಿದ ಬಳಿಕ ಮಹಿಳಾ ಸಿಬ್ಬಂದಿ ಹೊರಬಂದರು. ಈ ಹಿಂದೆಯೂ ಲಿಫ್ಟ್ ಕೈಕೊಟ್ಟಿದ್ದ ಹಿನ್ನೆಲೆಯಲ್ಲಿ ತನಗೆ ಯಾವುದೇ ಹೆದರಿಕೆಯಾಗಿಲ್ಲ ಎಂದು ಸಿಬಂದಿ ತಿಳಿಸಿದ್ದಾರೆ.