Bantwal ಬಾಲಕಿಗೆ ಕಿರುಕುಳ ಪ್ರಕರಣ: ಪೋಕ್ಸೋ ಪ್ರಕರಣ ದಾಖಲು

Team Udayavani, Aug 14, 2023, 9:00 PM IST

ಬಂಟ್ವಾಳ: ಶಾಲೆ ಮುಗಿಸಿ ಆಟೋ ರಿಕ್ಷಾದಿಂದ ಇಳಿದು ಮನೆಗೆ ತೆರಳುತ್ತಿದ್ದ ಅಪ್ರಾಪ್ತ ಬಾಲಕಿಯೋರ್ವಳ ಕೈ ಹಿಡಿದು ಎಳೆದು ಕಿರುಕುಳ ನೀಡಿದ ಪ್ರಕರಣ ಸರಪಾಡಿಯಲ್ಲಿ ನಡೆದಿದ್ದು, ಆರೋಪಿಯ ವಿರುದ್ಧ ಬಂಟ್ವಾಳ ಗ್ರಾಮಾಂತರ ಪೊಲೀಸ್‌ ಠಾಣೆಯಲ್ಲಿ ಪೋಕ್ಸೋ ಪ್ರಕರಣ ದಾಖಲಾಗಿದೆ.

ಸರಪಾಡಿ ಗ್ರಾಮದ ಕುಧ್ಕುಂಜ ನಿವಾಸಿ ಸುಕೇಶ್‌ ಯಾನೆ ಸಿಕೇಶ ಪ್ರಕರಣ ಆರೋಪಿಯಾಗಿದ್ದಾನೆ. ಬಾಲಕಿಯು ಪ್ರತಿನಿತ್ಯ ಶಾಲೆ ಮುಗಿಸಿ ಇತರ ವಿದ್ಯಾರ್ಥಿಗಳ ಜತೆ ಆಟೋದಲ್ಲಿ ಮನೆಗೆ ಆಗಮಿಸುತ್ತಿದ್ದು, ಅದರಂತೆ ಆ. 12ರಂದು ಕೂಡ ಆಕೆಯ ಮನೆಯ ಬಳಿ ಆಟೋ ಚಾಲಕ ಇಳಿಸಿದ್ದಾನೆ.

ಅಲ್ಲೇ ಪಕ್ಕದಲ್ಲಿ ಆರೋಪಿಯು ಕುಳಿತ್ತಿದ್ದು, ಅದನ್ನು ಸ್ಥಳೀಯರು ಕಂಡಿದ್ದಾರೆ. ಬಾಲಕಿಯ ಕೈ ಹಿಡಿದು ಎಳೆಯುತ್ತಿದ್ದಂತೆ ಆರೋಪಿಯು ಸ್ಥಳೀಯರ ಕೈಗೆ ಸಿಕ್ಕಿ ಬಿದ್ದಿದ್ದಾರೆ. ಆರೋಪಿ ಈ ಹಿಂದೆಯೂ ಇದೇ ರೀತಿ ಕಿರುಕುಳ ನೀಡಿ ಸಿಕ್ಕಿ ಬಿದ್ದು, ಸಾರ್ವಜನಿಕರಿಂದ ಗೂಸಾ ತಿಂದಿದ್ದ ಎನ್ನಲಾಗಿದೆ. ಆರೋಪಿಯನ್ನು ಬಂಧಿಸಿರುವ ಪೊಲೀಸರು ಪೋಕ್ಸೋ ಪ್ರಕರಣ ದಾಖಲಿಸಿದ್ದಾರೆ.