ಕಡಬ ಸಿ.ಎ.ಬ್ಯಾಂಕ್‌ ಸಿಬಂದಿಗೆ ಸೋಂಕು ; ಬ್ಯಾಂಕ್‌, 9 ಮನೆ ಸೀಲ್‌ಡೌನ್‌

Team Udayavani, Jun 15, 2020, 8:46 AM IST

ಕಡಬ ತಹಶೀಲ್ದಾರ್‌ ಜಾನ್‌ ಪ್ರಕಾಶ್‌ ರೋಡ್ರಿಗಸ್‌ ಸೀಲ್‌ಡೌನ್‌ ಪ್ರದೇಶಕ್ಕೆ ಭೇಟಿ ನೀಡಿದರು.

ಕಡಬ: ಕಳೆದ ವಾರ ಕಡಬದ ಶಿಕ್ಷಕರೋರ್ವರಿಗೆ ಕೋವಿಡ್ ದೃಢಪಟ್ಟು ಬಳಿಕ ಅವರು ವೆನ್ಲಾಕ್‌ ಕೋವಿಡ್‌ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದು ಗುಣಮುಖರಾಗಿ ಆಸ್ಪತ್ರೆಯಿಂದ ಬಿಡುಗಡೆ ಆದ ಬೆನ್ನಲ್ಲೇ ರವಿವಾರ ಕ್ವಾರಂಟೈನ್‌ನಲ್ಲಿದ್ದ ಕಡಬ ಸಿ.ಎ.ಬ್ಯಾಂಕ್‌ನ ಸಿಬಂದಿಯೋರ್ವರಿಗೆ ಕೋವಿಡ್ ಸೋಂಕು ದೃಢಪಟ್ಟಿದೆ. ಸೋಂಕಿತ ಶಿಕ್ಷಕ ಸಿ.ಎ.ಬ್ಯಾಂಕ್‌ಗೆ ಭೇಟಿ ನೀಡಿದ್ದ ಹಿನ್ನೆಲೆಯಲ್ಲಿ ಬ್ಯಾಂಕ್‌ ಸಿಬಂದಿ ಹಾಗೂ ಕೆಲವು ನಿರ್ದೇಶಕರು ಸ್ವಯಂ ಕ್ವಾರಂಟೈನ್‌ನಲ್ಲಿದ್ದರು. ಈಗ ಸಿ.ಎ. ಬ್ಯಾಂಕ್‌ ಸಿಬಂದಿ ನೂಜಿಬಾಳ್ತಿಲದ ನಿವಾಸಿಗೆ ಕೋವಿಡ್ ದೃಢಪಟ್ಟಿದ್ದು ಅವರನ್ನು ವೆನ್ಲಾಕ್‌ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಈ ಹಿನ್ನೆಲೆಯಲ್ಲಿ ಅಧಿಕಾರಿಗಳು ಕೆಲವು ಅಂಗಡಿಗಳ ಸಹಿತ ಸಿ.ಎ.ಬ್ಯಾಂಕ್‌ ಸುತ್ತ 100 ಮೀ. ಪ್ರದೇಶ ಮತ್ತು ಕೋವಿಡ್ ಬಾಧಿತ ವ್ಯಕ್ತಿಯ ಮನೆ ಇರುವ ನೂಜಿಬಾಳ್ತಿಲ ಗ್ರಾಮದ ನಿಡ್ಡೋಡಿ ಪ್ರದೇಶದಲ್ಲಿ 5 ಮನೆಗಳನ್ನು ಸೀಲ್‌ಡೌನ್‌ ಮಾಡಿದ್ದಾರೆ. ಕಡಬ ತಹಶೀಲ್ದಾರ್‌ ಜಾನ್‌ ಪ್ರಕಾಶ್‌ ರೋಡ್ರಿಗಸ್‌, ಕಡಬ ಪಂ. ಅಭಿವೃದ್ಧಿ ಅಧಿಕಾರಿ ಚೆನ್ನಪ್ಪ ಗೌಡ ಮುಂತಾದವರು ಸೀಲ್‌ಡೌನ್‌ ಪ್ರಕ್ರಿಯೆ ವೇಳೆ ಹಾಜರಿದ್ದರು.