ಪ್ಲಾಸ್ಟಿಕ್‌ ನಿಷೇಧ ಜಾಗೃತಿ ಆಂದೋಲನಕ್ಕೆ ಚಾಲನೆ

ಪುತ್ತೂರು ಸಂತೆಯಲ್ಲಿ ಶಾಸಕ ಮಠಂದೂರು ಅವರಿಂದ ಬಟ್ಟೆಯ ಚೀಲ ವಿತರಣೆ

Team Udayavani, Sep 17, 2019, 5:00 AM IST

ಪುತ್ತೂರು: ಪ್ರಧಾನಿ ನರೇಂದ್ರ ಮೋದಿಯವರ ಜನ್ಮದಿನದ ಹಿನ್ನೆಲೆಯಲ್ಲಿ ಬಿಜೆಪಿ ವತಿಯಿಂದ ಪ್ಲಾಸ್ಟಿಕ್‌ ನಿಷೇಧ ಜನಜಾಗೃತಿ ಆಂದೋಲನ ಹಮ್ಮಿ ಕೊಳ್ಳಲಾಗಿದ್ದು, ಪುತ್ತೂರು ಬಿಜೆಪಿ ವತಿ ಯಿಂದ ಸೋಮವಾರ ಸಂತೆಯಲ್ಲಿ ಶಾಸಕ ಸಂಜೀವ ಮಠಂದೂರು ನೇತೃತ್ವದಲ್ಲಿ ವಿಶೇಷ ರೀತಿಯಲ್ಲಿ ಜಾಗೃತಿ ಮೂಡಿಸಲಾಯಿತು.

ಬೆಳಗ್ಗೆ ಸಂತೆ ನಡೆಯುವ ಸ್ಥಳಕ್ಕೆ ಆಗಮಿಸಿದ ಬಿಜೆಪಿ ಮುಖಂಡರು, ಪದಾಧಿಕಾರಿಗಳು ಬಟ್ಟೆ ಕೈ ಚೀಲವನ್ನು ಗ್ರಾಹಕರಿಗೆ ವಿತರಿಸುವ ಮೂಲಕ ಜಾಗೃತಿ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು. ಸ್ವತಃ ಶಾಸಕರೇ ಗ್ರಾಹಕರಿಗೆ ಬಟ್ಟೆಯ ಕೈಚೀಲ ವಿತರಿಸಿದರು.

ಶಾಸಕ ಮಠಂದೂರು ಮಾತನಾಡಿ, ಪ್ಲಾಸ್ಟಿಕ್‌ನ ಪಿಡುಗನ್ನು ತೊಡೆದು ಹಾಕ ದಿದ್ದರೆ ಭವಿಷ್ಯದಲ್ಲಿ ಪ್ರಕೃತಿಗೆ ದೊಡ್ಡ ಮಟ್ಟದ ಅಪಾಯವಿದೆ. ಪುತ್ತೂರು ನಗರ ಸಭೆಯ ವತಿಯಿಂದಲೂ ಪ್ಲಾಸ್ಟಿಕ್‌ ಮುಕ್ತ ಸುಂದರ, ಸ್ವತ್ಛ ನಗರ ನಿರ್ಮಾಣಕ್ಕೆ ಕ್ರಮ ಕೈಗೊಳ್ಳಲಾಗುತ್ತಿದೆ. ಸುಂದರ ಭಾರತ ನಿರ್ಮಾಣದ ಕನಸು ಹೊತ್ತಿರುವ ಪ್ರಧಾನಿ ನರೇಂದ್ರ ಮೋದಿ ಅವರ ಜನ್ಮದಿನವನ್ನು ಪ್ಲಾಸ್ಟಿಕ್‌ ನಿಷೇಧ ಜನಜಾಗೃತಿ ಆಂದೋಲನ ರೂಪದಲ್ಲಿ ನಡೆಸಲು ನಿರ್ಧರಿಸಲಾಗಿದೆ ಎಂದರು.

ವರ್ತಕರಲ್ಲಿ ಮನವಿ
ಸಂತೆಯಲ್ಲಿ ಗ್ರಾಹಕರು ಪ್ಲಾಸ್ಟಿಕ್‌ ಚೀಲಗಳಲ್ಲಿ ತರಕಾರಿ ತುಂಬಿಸಿಕೊಂಡು ಹೋಗುತ್ತಿರುವುದನ್ನು ಗಮನಿಸಿದ ಬಿಜೆಪಿ ಕಾರ್ಯಕರ್ತರು ಹಾಗೂ ಶಾಸಕರು, ಅವರಿಗೆಲ್ಲ ಬಟ್ಟೆಯ ಕೈಚೀಲ ವಿತರಿಸಿದರು. ಪ್ಲಾಸ್ಟಿಕ್‌ ಚೀಲಗಳಲ್ಲಿ ತುಂಬಿಸಿದ್ದ ತರಕಾರಿ ವಸ್ತುಗಳನ್ನು ತೆಗೆಸಿ ಬಟ್ಟೆಯ ಚೀಲಗಳಿಗೆ ತುಂಬಿಸಿ ನೀಡಲಾಯಿತು. ಪ್ಲಾಸ್ಟಿಕ್‌ ಚೀಲಗಳನ್ನು ನಗರಸಭೆ ಸ್ವತ್ಛತಾ ಸಿಬಂದಿಗೆ ಒಪ್ಪಿಸಲಾಯಿತು. ಪ್ಲಾಸ್ಟಿಕ್‌ ಕೈಚೀಲಗಳನ್ನು ವಿತರಿಸದಂತೆ ಸಂತೆ ವರ್ತಕರಲ್ಲೂ ವಿನಂತಿಸಲಾಯಿತು.

ಕೇವಲ ಅರ್ಧ ಗಂಟೆಯಲ್ಲಿ 500 ಚೀಲಗಳನ್ನು ವಿತರಿಸಲಾಯಿತು. ಮುಳಿಯ ಜುವೆಲರ್, ಸಂಜೀವ ಶೆಟ್ಟಿ ವಸ್ತ್ರ ಮಳಿಗೆ, ಜಿ.ಎಲ್‌. ಆಚಾರ್ಯ ಜುವೆಲರ್, ಪಾಪ್ಯುಲರ್‌ ಸ್ವೀಟ್ಸ್‌, ಮಂಗಲ್‌ ಸ್ಟೋರ್‌, ನಾರಾಯಣ ನಾಯ್ಕ ಮತ್ತು ಆರ್‌.ಎಚ್‌. ಸೆಂಟರ್‌ನವರು ಈ ಬಟ್ಟೆ ಕೈಚೀಲಗಳನ್ನು ನೀಡಿ ಸಹಕರಿಸಿದರು.

ಪಕ್ಷದ ನಗರ ಮಂಡಲ ಅಧ್ಯಕ್ಷ ಜೀವಂಧರ ಜೈನ್‌, ನಗರ ಮಂಡಲ ಪ್ರಧಾನ ಕಾರ್ಯದರ್ಶಿ ರಾಮದಾಸ್‌ ಹಾರಾಡಿ ಹಾಗೂ ಗೌರಿ ಬನ್ನೂರು, ಬಿಜೆಪಿ ಮುಖಂಡರಾದ ಚಂದ್ರಶೇಖರ ರಾವ್‌ ಬಪ್ಪಳಿಗೆ, ಆರ್‌.ಸಿ. ನಾರಾಯಣ್‌, ಎಪಿಎಂಸಿ ಮಾಜಿ ಅಧ್ಯಕ್ಷ ಬೂಡಿಯಾರ್‌ ರಾಧಾಕೃಷ್ಣ ರೈ, ಬಿಜೆಪಿಯ ನಗರಸಭಾ ಸದಸ್ಯರು, ಮುಖಂಡರು, ಕಾರ್ಯಕರ್ತರು ಉಪಸ್ಥಿತರಿದ್ದರು.

ಪ್ಲಾಸ್ಟಿಕ್‌ ಮುಕ್ತ ಆಶಯ
ವಾರದ ಸಂತೆಗೆ ಗ್ರಾಹಕರು ಪ್ಲಾಸ್ಟಿಕ್‌ ಕೈಚೀಲ ತರುತ್ತಾರೆ. ಸಂತೆಯಿಂದ ನಿರ್ಗಮಿಸುವಾಗಲೂ ಪ್ಲಾಸ್ಟಿಕ್‌ ಚೀಲದಲ್ಲಿ ತರಕಾರಿ ಒಯ್ಯುತ್ತಾರೆ. ಈ ಅಭ್ಯಾಸ ನಿಲ್ಲಬೇಕೆಂಬ ಆಶಯದಿಂದ ಮೊದಲಿಗೆ ಇಲ್ಲಿಯೇ ಚಾಲನೆ ನೀಡಲಾಗಿದೆ. ಮುಂದಿನ ವಾರದ ಸಂತೆ ಸಂಪೂರ್ಣ ಪ್ಲಾಸ್ಟಿಕ್‌ ಮುಕ್ತವಾಗುವ ಆಶಯವನ್ನು ಹೊಂದಿದ್ದೇವೆ ಎಂದು ಸಂಜೀವ ಮಠಂದೂರು ಹೇಳಿದರು.