ಮಡಪ್ಪಾಡಿ: ನಿರೀಕ್ಷೆಗಳ ತವರೂರು

Team Udayavani, Dec 18, 2019, 4:07 AM IST

ಸುಳ್ಯ: ತಾಲೂಕಿನ ಎರಡನೇ ಅತಿ ದೊಡ್ಡ ಗ್ರಾಮ ಮಡಪ್ಪಾಡಿ ತನ್ನ ವ್ಯಾಪ್ತಿಯಷ್ಟೇ ವಿಸ್ತಾರವಾದ ಸಮಸ್ಯೆಗಳನ್ನು ಕೂಡ ಮಡಿಲೊಳಗೆ ತುಂಬಿಕೊಂಡಿದೆ. ರಸ್ತೆ ಅವ್ಯವಸ್ಥೆ, ನೆಟ್‌ವರ್ಕ್‌ ಸಮಸ್ಯೆ, ಅಡಿಕೆಗೆ ಹಳದಿ ರೋಗ, ನಕ್ಸಲ್‌ ಬಾಧಿತ ಹೀಗೆ ಹತ್ತಾರು ಸವಾಲುಗಳೊಂದಿಗೆ ದಿನದೂಡುವ ಸ್ಥಿತಿ ಇಲ್ಲಿನವರದ್ದು. 1987ರಲ್ಲಿ ಕುಗ್ರಾಮ ಎಂಬ ಹಣೆಪಟ್ಟಿ ಹೊಂದಿದ್ದ ಈ ಊರು ಕಾಲ ಕ್ರಮೇಣ ಅಭಿವೃದ್ಧಿಗೆ ಒಗ್ಗಿಕೊಂಡರೂ ನಿರೀಕ್ಷಿತ ವೇಗ ಪಡೆದುಕೊಂಡಿಲ್ಲ ಅನ್ನುವುದಕ್ಕೆ ಗ್ರಾಮದ ಸಮಸ್ಯೆಗಳ ಪಟ್ಟಿಯೇ ಸಾಕ್ಷಿ.

ಮಡಪ್ಪಾಡಿ ಗ್ರಾಮ
ಶೇ. 83.43ರಷ್ಟು ಹಸುರು ಸಂಪತ್ತು ಆವೃತವಾಗಿರುವ ಈ ಗ್ರಾಮ ತಾಲೂಕಿನ ಎರಡನೆ ಅತಿ ದೊಡ್ಡ ಗ್ರಾಮ ಎಂಬ ಹೆಗ್ಗಳಿಕೆ ಹೊಂದಿದೆ. 5559.39 ಹೆಕ್ಟೇರ್‌ ವಿಸ್ತೀರ್ಣದ ಗ್ರಾಮದಲ್ಲಿ 4648.70 ಹೆಕ್ಟೇರ್‌ ಅರಣ್ಯವೇ ತುಂಬಿಕೊಂಡಿದೆ. ದೇವಚಳ್ಳ, ಮರ್ಕಂಜ, ಕೊಲ್ಲಮೊಗ್ರು ಗ್ರಾಮ ಸುತ್ತಲಿಂದ ಆವರಿಸಿಕೊಂಡಿವೆ. 2011ರ ಜನಗಣತಿ ಪ್ರಕಾರ ಇಲ್ಲಿ 1,757 ಜನಸಂಖ್ಯೆ ಇದೆ. ಮಡಪ್ಪಾಡಿ, ಬಲ್ಕಜೆ, ಹಾಡಿಕಲ್ಲಿನಲ್ಲಿ ಪ್ರಾಥಮಿಕ ಶಾಲೆ, ಎರಡು ಅಂಗನವಾಡಿ ಕೇಂದ್ರಗಳಿವೆ. ಗ್ರಾ.ಪಂ. ಕಚೇರಿ, ಸಹಕಾರಿ ಸಂಘ ಮೊದಲಾದ ಕೇಂದ್ರಗಳು ಇಲ್ಲಿವೆ. ಮಾಯಿಲಕೋಟೆ ಎಂಬ ಚಾರಣ ಸ್ಥಳವೂ ಇಲ್ಲಿದೆ. ಅಡಿಕೆ ಕೃಷಿ ಇಲ್ಲಿನ ಜನರ ಪ್ರಮುಖ ಆರ್ಥಿಕ ಬೆನ್ನೆಲುಬು. ದೇವಸ್ಥಾನ ಇಲ್ಲದಿದ್ದರೂ ದೈವಸ್ಥಾನವೇ ಇಲ್ಲಿನ ಭಕ್ತಿಯ ಕೇಂದ್ರ.

ರಸ್ತೆ, ನೆಟ್ ವರ್ಕ್ ಸಮಸ್ಯೆ
ಮುಖ್ಯವಾಗಿ ಇಲ್ಲಿ ದೂರವಾಣಿ ಮತ್ತು ಇಂಟರ್‌ನೆಟ್‌ ನೆಟ್ ವರ್ಕ್ ಸಮಸ್ಯೆ ಇದೆ. ಬಿಎಸ್ಸೆನ್ನೆಲ್‌ ಟವರ್‌ ಇದೆಯಾದರೂ ವಿದ್ಯುತ್‌ ಕೈ-ಕೊಟ್ಟರೆ ಅದು ಸ್ತಬ್ಧವಾಗುತ್ತದೆ. ಹೀಗಾಗಿ ದೂರವಾಣಿ ಜತೆಗೆ ಇಂಟರ್‌ನೆಟ್‌ ಸೌಲಭ್ಯಕ್ಕೆ ಇಲ್ಲಿ ನಿತ್ಯವೂ ಪರದಾಟವಿದೆ. ಗ್ರಾ.ಪಂ. ಕಚೇರಿ, ಪಡಿತರ ಅಂಗಡಿ, ಶಾಲೆಗಳಲ್ಲಿ ಇಂಟರ್‌ನೆಟ್‌ ಸಿಗದೆ ಜನರಿಗೆ ಅಗತ್ಯ ಕೆಲಸಗಳು ಆಗುತ್ತಿಲ್ಲ. ಅಲ್ಲದೆ ಗ್ರಾಮದಿಂದ ಹೊರಗಿರುವ ಜನರಿಗೆ ಅಗತ್ಯ ಸಂದರ್ಭ ಮನೆ ಮಂದಿಯನ್ನು ಸಂಪರ್ಕಿಸಲು ನೆಟ್ ವರ್ಕ್ ಅಡ್ಡಿ ಆಗುತ್ತಿದೆ.

ಗ್ರಾಮದ ಹಲವೆಡೆ ಸರ್ವಋತು ಸಂಪರ್ಕ ರಸ್ತೆಯ ಬೇಡಿಕೆ ಇದೆ. ತೀರಾ ದುರ್ಗಮ ರಸ್ತೆ ಆಗಿರುವ ಕೋಟೆಗುಡ್ಡೆ ಸಹಿತ ಹಲವೆಡೆ ಸಂಚಾರ ತ್ರಾಸದ ಸಂಗತಿ. ಕೆಲವೆಡೆ ಜೀಪು ಬಿಟ್ಟರೆ ಬೇರೆ ವಾಹನ ಸಂಚರಿಸದಷ್ಟು ರಸ್ತೆ ಹದಗೆಟ್ಟಿದೆ. ಮಲೆಕುಡಿಯ ಕುಟುಂಬಗಳು ಹೆಚ್ಚಾಗಿರುವ ಎಳುವೆ ಎಂಬ ಪ್ರದೇಶ ಸಂಪರ್ಕಕಕ್ಕೆ ಸೇತುವೆ ಇಲ್ಲದ ಕಾರಣ ಮಳೆಗಾಲದಲ್ಲಿ ಇಲ್ಲಿ ದ್ವೀಪದಂತಹ ಸ್ಥಿತಿ ಉಂಟಾಗುತ್ತದೆ. ಕಳೆದ ವರ್ಷ ನಕ್ಸಲ್‌ ತಂಡವೊಂದು ಭೇಟಿ ನೀಡಿದ್ದಕ್ಕೆ ಊರು ಸುದ್ದಿ ಪಡೆದಿತ್ತು. ಇಂತಹ ಹತ್ತಾರು ಸಮಸ್ಯೆಗಳು ಗ್ರಾಮದಲ್ಲಿವೆ. ಮುಖ್ಯವಾಗಿ ಇಲ್ಲಿನ ರಸ್ತೆ, ಸೇತುವೆ, ಹಕ್ಕುಪತ್ರ ಕಲ್ಪಿಸಲು ಅರಣ್ಯ ಪ್ರದೇಶ ತೊಡಕಾಗಿದೆ. ಅರಣ್ಯ ಕಾಯಿದೆ ಪ್ರಕಾರ ಅರಣ್ಯ ಭೂಮಿಯಲ್ಲಿ ಅಭಿವೃದ್ಧಿ ಕೆಲಸ ಕೈಗೊಳ್ಳುವುದು ಸಲಿಸಲ್ಲ ಅನ್ನುತ್ತಾರೆ ಗ್ರಾಮದ ಕೆಲವು ನಿವಾಸಿಗಳು.

ಹಳದಿ ರೋಗದ ಭಾದೆ
ಅಡಿಕೆ ಕೃಷಿಯೇ ಇಲ್ಲಿನ ಜನರಿಗೆ ಆಧಾರ. ಈ ಕೃಷಿಗೆ ಕೆಲವು ವರ್ಷಗಳ ಹಿಂದೆ ಹಳದಿ ರೋಗ ವಕ್ಕರಿಸಿ ಜನರು ಪರ್ಯಾಯ ಉದ್ಯೋಗದತ್ತ ದೃಷ್ಟಿ ಹರಿಸಬೇಕಾದ ಸ್ಥಿತಿ ಉಂಟಾಗಿದೆ. ದಟ್ಟ ಕಾಡಿನಿಂದ ಕೃಷಿ ತೋಟಕ್ಕೆ ಆನೆ, ಮಂಗಗಳ ಕಾಟವೂ ಇದೆ. ವರ್ಷದ ಒಟ್ಟು ಫಸಲಿನಲ್ಲಿ ಹೆಚ್ಚಿನ ಪಾಲು ಕಾಡು ಪ್ರಾಣಿಗಳ ಪಾಲಾಗುತ್ತಿರುವ ಕಾರಣ ರೈತರ ಜೀವನಾಧರಕ್ಕೆ ಆತಂಕ ತಂದೊಡ್ಡಿದೆ.

ನಿರೀಕ್ಷೆ ಇದೆ
ದ.ಕ. ಜಿಲ್ಲೆ ಮತ್ತು ಸುಳ್ಯ ಕಾರ್ಯನಿರತ ಪತ್ರಕರ್ತರ ಸಂಘದ ಆಶ್ರಯದಲ್ಲಿ ಜನಪ್ರತಿನಿಧಿಗಳು ಮತ್ತು ಅಧಿಕಾರಿ ವರ್ಗದವರು ಜತೆಗೂಡಿ ಡಿ. 25ರಂದು ಈ ಊರಲ್ಲಿ ಗ್ರಾಮ ವಾಸ್ತವ್ಯ ಹಮ್ಮಿಕೊಂಡಿದ್ದಾರೆ. ಜನರೊಂದಿಗೆ ಸಂವಾದವು ಇದೆ. ಹೀಗಾಗಿ ಹಲವು ದಶಕಗಳ ಜಟಿಲ ಸಮಸ್ಯೆಗಳನ್ನು ಮುಂದಿಡಲು ಒಂದು ವೇದಿಕೆ ದೊರೆತಿದೆ. ಸಮಸ್ಯೆ ಬಗೆಹರಿಯುವ ಆಶಾವಾದವನ್ನು ಹೊಂದಿದ್ದೇವೆ.
-ಎಂ.ಡಿ. ವಿಜಯಕುಮಾರ್‌ಪ್ರಗತಿಪರ ಕೃಷಿಕ

ರಸ್ತೆ, ಸೇತುವೆ ಸಮಸ್ಯೆ
ಸೇವಾಜೆ – ಮಡಪ್ಪಾಡಿ – ಗುರುಪುರ ರಸ್ತೆ.
ಮಡಪ್ಪಾಡಿ- ಹಾಡಿಕಲ್ಲು ರಸ್ತೆ.
ಹಾಡಿಕಲ್ಲು- ನೂಜಾಲ- ಗಬಲಡ್ಕ ರಸ್ತೆ.
ಕೊಲ್ಲಮೊಗ್ರು ಜನವಸತಿ, ಆರೋಗ್ಯ ಕೇಂದ್ರ ಸಂಪರ್ಕ ರಸ್ತೆ
ಕೇವಳ – ಬಾಳೆಗುಡ್ಡೆ – ಶೀರಡ್ಕ ಸಂಪರ್ಕ ರಸ್ತೆ.
ಜೇಡಿಗುಂಡಿ – ಕಡ್ಯ – ಕೋಟೆಗುಡ್ಡೆ ರಸ್ತೆ.
ಮಡಪ್ಪಾಡಿ – ಶೀರಾಡಿ ರಸ್ತೆ.
ಹಾಡಿಕಲ್ಲು ಪ. ಪಂ. ಕಾಲನಿ ರಸ್ತೆ.
ಎಳುವೆ ಬಳಿ ಹೊಸ ಸೇತುವೆ.
ಪೂಂಬಾಡಿ, ಕಡ್ಯದ ಕುಧ್ಕುಳಿ, ದೋಣಿಪಳ್ಳ ತುಪ್ಪಟ ಸೇತುವೆ ದುರಸ್ತಿ.
ಕಂದಾಯ, ಆರೋಗ್ಯ ಸಮಸ್ಯೆ
ಕಾಡು ಆವರಿತ ಪ್ರದೇಶವಾಗಿರುವ ಕಾರಣ ಬಂದೂಕು ಡೆಪಾಸಿಟ್‌ನಿಂದ ವಿನಾಯಿತಿ ನೀಡುವುದು.
ಹಾಡಿಕಲ್ಲು ಶಾಲೆಗೆ ಪಹಣಿ ಪತ್ರ ಒದಗಿಸುವುದು.
 ಅಕ್ರಮ ಸಕ್ರಮ ಮತ್ತು 94ಸಿ ತ್ವರಿತ ವಿಲೇವಾರಿ.
ಸಂಚಾರ ಆರೋಗ್ಯ ಸೇವೆ ಒದಗಿಸುವುದು.

– ಕಿರಣ್‌ ಪ್ರಸಾದ್‌ ಕುಂಡಡ್ಕ