ಸಚಿವ ಸ್ಥಾನ: ಅಂಗಾರರಿಗೆ ಕೈಕೊಟ್ಟ ನಾಯಕರು

ಸುಳ್ಯ: ವಿಧಾನಸಭಾ ಕ್ಷೇತ್ರ ರಚನೆಗೊಂಡು 57 ವರ್ಷಗಳ ಬಳಿಕ ಮೊದಲ ಬಾರಿಗೆ ಸುಳ್ಯದಿಂದ ಚುನಾಯಿತಗೊಂಡ ಶಾಸಕರೋರ್ವರು ಸಚಿವ ಸ್ಥಾನ ಪಡೆಯುತ್ತಾರೆ ಎನ್ನುವ ಬೆಟ್ಟದಷ್ಟಿದ್ದ ನಿರೀಕ್ಷೆ ಮತೊಮ್ಮೆ ಹುಸಿಯಾಗಿದೆ.

ಯಡಿಯೂರಪ್ಪ ಸರಕಾರದ ಮೊದಲ ಹಂತದ ಸಚಿವ ಸಂಪುಟ ರಚನೆಯಲ್ಲಿ ಸುಳ್ಯ ಶಾಸಕ ಎಸ್‌. ಅಂಗಾರ ಅವರಿಗೆ ಸಚಿವ ಸ್ಥಾನ ದೊರೆತು ಮಂಗಳವಾರ ಪ್ರಮಾಣವಚನ ಸ್ವೀಕರಿಸಲಿದ್ದಾರೆ ಎನ್ನುವುದು ಖಚಿತವಾಗಿ ಸೋಮವಾರವೇ ಪಕ್ಷದ ಮುಖಂಡರು, ಕುಟುಂಬಸ್ಥರು ಬೆಂಗಳೂರಿಗೆ ತೆರಳಿದ್ದರು. ಆದರೆ ರಾತ್ರೊರಾತ್ರಿ ನಡೆದ ಬೆಳವಣಿಗೆಯಿಂದ ಮಂಗಳವಾರ ರಾಜ್ಯಪಾಲರಿಗೆ ಸಲ್ಲಿಸಲಾದ ಪಟ್ಟಿಯಲ್ಲಿ ಅಂಗಾರ ಅವರ ಹೆಸರಿಲ್ಲದೆ ತಾಲೂಕಿನಲ್ಲಿ ತೀವ್ರ ನಿರಾಸೆ ಉಂಟಾಯಿತು.

ಎರಡನೇ ಬಾರಿ ಅವಕಾಶ ವಂಚಿತ

ಆರು ಬಾರಿ ಚುನಾಯಿತರಾಗಿರುವ ಎಸ್‌. ಅಂಗಾರ ಅವಿಭಜಿತ ಜಿಲ್ಲೆಯ ಹಿರಿಯ ಶಾಸಕ. ಹೀಗಾಗಿ ಈ ಬಾರಿ ಸಚಿವರಾಗುವುದು ನಿಶ್ಚಿತ ಎನ್ನಲಾಗಿತ್ತು. 2008ರಲ್ಲಿ ಅಂಗಾರ ಅವರಿಗೆ ಅವಕಾಶ ನೀಡಬೇಕು ಎಂದು ಸುಳ್ಯದಿಂದ ನಿಯೋಗದ ಮೂಲಕ ಆಗ್ರಹಿಸಿದ್ದರೂ ಸಿಕ್ಕಿರಲಿಲ್ಲ. ಎರಡನೇ ಬಾರಿಯೂ ಅವಕಾಶ ವಂಚಿತರಾಗಿರುವುದು ಪಕ್ಷದ ಕಾರ್ಯಕರ್ತರ ಅಸಮಾಧಾನಕ್ಕೆ ಕಾರಣವಾಗಿದೆ.

ಭದ್ರಕೋಟೆಯ ನಿರ್ಲಕ್ಷ್ಯ

ಸುಳ್ಯ ಬಿಜೆಪಿಯ ಭದ್ರಕೋಟೆ. ಸಂಘಟನೆ, ಪಕ್ಷ ನಿಷ್ಠೆ, ಶಿಸ್ತು ವಿಚಾರದಲ್ಲಿ ಎಲ್ಲ ಕ್ಷೇತ್ರಕ್ಕಿಂತಲೂ ಮುಂದಿದೆ. 2013ರಲ್ಲಿ ದ.ಕ. ಕ್ಷೇತ್ರದ 7 ವಿಧಾನಸಭಾ ಕ್ಷೇತ್ರಗಳಲ್ಲಿ ಹೀನಾಯ ಸೋಲು ಅನುಭವಿಸಿತ್ತಾದರೂ ಸುಳ್ಯದಲ್ಲಿ ಗೆಲುವು ಸಾಧಿಸಿ ತನ್ನ ಸಾಮರ್ಥ್ಯ ಸಾಬೀತುಪಡಿಸಿತ್ತು. ಗ್ರಾ.ಪಂ., ತಾ.ಪಂ., ಜಿ.ಪಂ., ಸೊಸೈಟಿ ಚುನಾವಣೆಯಲ್ಲಿಯೂ ಇಲ್ಲಿ ಬಿಜೆಪಿಯದ್ದೆ ಪಾರುಪತ್ಯ. ಕಳೆದ ಲೋಕಸಭೆ ಚುನಾವಣೆಯಲ್ಲಿಯೂ ಜಿಲ್ಲೆಯಲ್ಲಿ ಅತ್ಯಧಿಕ ಮುನ್ನಡೆ ಕೊಟ್ಟ ಕ್ಷೇತ್ರ ಇದಾಗಿತ್ತು. ಅಷ್ಟಾಗಿಯು ಬಿಜೆಪಿ ಹೈಕಮಾಂಡ್‌ ಸುಳ್ಯವನ್ನು ನಿರ್ಲಕ್ಷಿ ಸಿರುವುದು ಕಾರ್ಯಕರ್ತರ, ಮುಖಂಡರ ಅಸಮಾಧಾನಕ್ಕೆ ಕಾರಣವೆನಿಸಿದೆ.

ಕಾಣದ ‘ಕೈ’ವಾಡ

ಹೈಕಮಾಂಡ್‌ಗೆ ರವಾನಿಸಲಾದ ಸಂಭಾವ್ಯ ಸಚಿವರ ಪಟ್ಟಿಯಲ್ಲಿ ಅಂಗಾರ ಅವರ ಹೆಸರು ಇತ್ತು. ಸೋಮವಾರ ರಾತ್ರಿ ತನಕವೂ ಮಂಗಳವಾರ ಪ್ರಮಾಣ ವಚನಕ್ಕೆ ಹಾಜರಾಗಲು ಪಕ್ಷದಿಂದ ಮಾಹಿತಿ ನೀಡಲಾಗಿತ್ತು. ಸೋಮವಾರ ರಾತ್ರಿ ತನಕ ಎಸ್ಕಾರ್ಟ್‌ ಸಿಬಂದಿ ಶಾಸಕರಿಗೆ ಕರೆ ಮಾಡಿ ಬೆಳಗ್ಗೆ ಹೊರಡುವ ಸಮಯದ ಬಗ್ಗೆಯೂ ಮಾಹಿತಿ ಪಡೆದಿದ್ದರು. ಹೀಗಿದ್ದರೂ ತಡರಾತ್ರಿ ನಡೆದ ಲಾಬಿ ಪರಿಣಾಮ ಅಂಗಾರ ಅವರ ಹೆಸರು ಕೈಬಿಡಲಾಯಿತು ಎಂದು ವಿಶ್ಲೇಷಿಸಲಾಗಿದೆ.

ಉಳಿದ ಶಾಸಕರ ಮೌನ

ಅಂಗಾರ ಅವರಿಗೆ ಸಚಿವ ಸ್ಥಾನ ಕೈ ತಪ್ಪಿರುವ ಬಗ್ಗೆ ಜಿಲ್ಲಾಧ್ಯಕ್ಷರು ಭೇಟಿ ಮಾಡಿ ಸಮಾಧಾನದ ಮಾತುಗಳನ್ನಾಡಿರುವುದು ಬಿಟ್ಟರೆ, ಉಳಿದ ಶಾಸಕರು, ಮುಖಂಡರು, ಸಂಸದರು ಬಹಿರಂಗವಾಗಿ ಧ್ವನಿಯೆತ್ತಿಲ್ಲ ಎನ್ನುವ ಆಕ್ರೋಶದ ಕೂಗು ಕೇಳಿ ಬಂದಿದೆ.

ಜಿಲ್ಲಾಧ್ಯಕ್ಷರು ಗುರುವಾರ ಸಭೆ ಸೇರುವ ಬಗ್ಗೆ ತೀರ್ಮಾನಿಸುವ ಬದಲು ಜಿಲ್ಲೆಯ ಎಲ್ಲ ಶಾಸಕರು ತತ್‌ಕ್ಷಣ ನಿರ್ಧಾರ ಪ್ರಕಟಿಸಬೇಕಿತ್ತು ಎಂದು ಕೆಲ ಕಾರ್ಯಕರ್ತರು, ಮುಖಂಡರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಅಂಗಾರ ಅವರಿಗೆ ಸಚಿವ ಸ್ಥಾನ ನೀಡಬೇಕು ಎನ್ನುವ ವಿಷಯದಲ್ಲಿ ಸುಳ್ಯ ಹೊರತುಪಡಿಸಿ ಉಳಿದ ಕ್ಷೇತ್ರಗಳಿಂದ ಸಿಕ್ಕ ಬೆಂಬಲದ ಬಗ್ಗೆಯು ತೃಪ್ತಿ ಇಲ್ಲ ಎಂದು ಸುಳ್ಯ ಬಿಜೆಪಿಯ ಪ್ರಮುಖ ಮುಖಂಡರೊಬ್ಬರು ಅಸಮಾಧಾನ ತೋಡಿಕೊಂಡಿದ್ದಾರೆ.

ಬೇಸರವಾಗಿದೆ
ಸರಳ ಸಜ್ಜನಿಕೆಗೆ ಹೆಸರಾದ ಸುಳ್ಯದ ನಿಷ್ಠಾವಂತ ಶಾಸಕ ಎಸ್‌. ಅಂಗಾರ ಅವರಿಗೆ ಸಂಪುಟ ರಚನೆ ವೇಳೆ ಮಂತ್ರಿ ಸ್ಥಾನದಿಂದ ವಂಚಿತರನ್ನಾಗಿಸಿರುವುದು ನೋವಿನ ಸಂಗತಿ. ಯಾವ ಕಾರಣಕ್ಕೆ ಅವರಿಗೆ ಸಚಿವ ಪದವಿ ಕೈತಪ್ಪಿದೆ ಗೊತ್ತಿಲ್ಲ. ಮುಂದಿನ ಬಾರಿಯ ಸಂಪುಟ ಪುನಾರಚನೆ ವೇಳೆಗಾದರೂ ಅವರಿಗೆ ಅವಕಾಶ ನೀಡಿದಲ್ಲಿ ಒಳ್ಳೆಯದು.
– ಶ್ರೀ ವಿದ್ಯಾಪ್ರಸನ್ನತೀರ್ಥ ಸ್ವಾಮೀಜಿ, ಸಂಪುಟ ಶ್ರೀ ನರಸಿಂಹ ಸ್ವಾಮಿ ಮಠ, ಸುಬ್ರಹ್ಮಣ್ಯ