ಬಂಟ್ವಾಳ: ಅಜ್ಜಿ ಮನೆಗೆಂದು ಹೋದ ತಾಯಿ, ಮಗ ನಾಪತ್ತೆ

Team Udayavani, May 18, 2022, 7:29 PM IST

ಬಂಟ್ವಾಳ: ಬೆಳ್ತಂಗಡಿಯಿಂದ ಅರಳದಲ್ಲಿರುವ ತವರು ಮನೆಗೆ ಬಂದಿರುವ ಮಹಿಳೆಯೋರ್ವರು ತನ್ನ ಪುತ್ರನೊಂದಿಗೆ ಅಜ್ಜಿ ಮನೆಗೆ ಹೋಗುವುದಾಗಿ ಹೇಳಿ ಹೋಗಿದ್ದು ಅಲ್ಲಿಗೂ ಹೋಗದೆ, ತವರು ಮನೆಗೂ ಬಾರದೆ ನಾಪತ್ತೆಯಾಗಿದ್ದಾರೆ.

ಪುತ್ರಿ ಹಾಗೂ ಮೊಮ್ಮಗ ನಾಪತ್ತೆಯಾಗಿರುವ ಕುರಿತು ಅರಳ ನಿವಾಸಿ ಮೋನಪ್ಪ ಸಪಲ್ಯ ಅವರು ದೂರು ನೀಡಿದ್ದಾರೆ.

ಮೇ 7ರಂದು ಪುತ್ರಿ ಆಶಾಲತಾ (25) ಹಾಗೂ ಅವರ ಇಬ್ಬರು ಮಕ್ಕಳಾದ ಮಾನ್ಯಾ ಮತ್ತು ಆಕೇಶನೊಂದಿಗೆ ಬೆಳ್ತಂಗಡಿಯಿಂದ ತನ್ನ ಮನೆಯಾದ ಅರಳಕ್ಕೆ ಬಂದಿರುತ್ತಾರೆ.

ಮೇ 14ರಂದು ಬೆಳಗ್ಗೆ ಮೋನಪ್ಪ ಅವರು ನೀರುಮಾರ್ಗಕ್ಕೆ ಹೋಗಿರುವ ವೇಳೆ 11.30ರ ಸುಮಾರಿಗೆ ಬಾಡಿಗೆ ರಿಕ್ಷಾದಲ್ಲಿ ಆಶಾಲತಾ ಅವರು ತನ್ನ ತಾಯಿ ಪಾರಿಜಾತಾ ಹಾಗೂ ಇಬ್ಬರು ಮಕ್ಕಳೊಂದಿಗೆ ಅಜ್ಜಿ ಮನೆಗೆ ತೆರಳಿದ್ದಾರೆೆ.

ಇದನ್ನೂ ಓದಿ:ಮಲ್ಪೆ: ಆಟೋರಿಕ್ಷಾ- ಟ್ಯಾಂಕರ್‌ ಢಿಕ್ಕಿ: ವಿದೇಶಿ ದಂಪತಿ ಸಹಿತ ಮೂವರಿಗೆ ಗಂಭೀರ ಗಾಯ

ಆಟೋ ರಿಕ್ಷಾ ಸಜೀಪಮುನ್ನೂರಿನ ನಗ್ರಿಗೆ ತಲುಪುತ್ತಿದ್ದಂತೆ ಆಶಾಲತಾ ಅವರು ತಾಯಿ ಹಾಗೂ ಪುತ್ರಿ ಮಾನ್ಯಾಳನ್ನು ಮತ್ತೆ ಅರಳಕ್ಕೆ ಹೋಗುವಂತೆ ಹೇಳಿ ತಾನು ಪುತ್ರನೊಂದಿಗೆ ಅಲ್ಲೇ ಸಮೀಪದಲ್ಲಿರುವ ಅಜ್ಜಿ ಮನೆಗೆ ನಡೆದುಕೊಂಡು ಹೋಗುವುದಾಗಿ ಹೇಳಿ ರಿಕ್ಷಾದಿಂದ ಇಳಿದಿದ್ದಾರೆ.

ಈ ವಿಚಾರವನ್ನು ಸಂಜೆ ಪತ್ನಿ ಪಾರಿಜಾತಾ ಅವರು ಗಂಡ ಮೋನಪ್ಪ ಅವರ ಬಳಿ ತಿಳಿಸಿದ್ದು, ಅವರು ಮತ್ತೆ ಕರೆದುಕೊಂಡು ಬರುವಂತೆ ತಿಳಿಸಿದ್ದಾರೆ.

ಹೀಗಾಗಿ ಪಾರಿಜಾತಾ ಅವರು ಮೇ 15ರಂದು ತವರು ಮನೆಗೆ ಬಂದು ತಂದೆ-ತಾಯಿಯರಲ್ಲಿ ವಿಚಾರಿಸಿದಾಗ ಆಕೆ ಮನೆಗೆ ಬಂದಿಲ್ಲ ಎಂದು ತಿಳಿಸಿದ್ದಾರೆ.