ಮುಂಡಾಜೆ: ತೋಟಗಳಿಗೆ ಕಾಡಾನೆ ದಾಳಿ, ಹಾನಿ

Team Udayavani, May 25, 2020, 7:36 AM IST

ಕಾಡಾನೆಗಳ ದಾಳಿಗೆ ಅಡಿಕೆ ಬಾಳೆಗಿಡ ಸಹಿತ ಕೃಷಿ ಹಾನಿಯಾಗಿದೆ.

ಮುಂಡಾಜೆ: ಬೆಳ್ತಂಗಡಿ ತಾಲೂಕಿನ ಮುಂಡಾಜೆ ಗ್ರಾಮ ಪಂಚಾಯತ್‌ ವ್ಯಾಪ್ತಿಯ ಧುಂಬೆಟ್ಟು ಎಂಬಲ್ಲಿ ತೋಟಗಳಿಗೆ ಕಾಡಾನೆಗಳು ಶನಿವಾರ ತಡರಾತ್ರಿ ನುಗ್ಗಿವೆ. ಮರಿಯಾನೆ ಸಹಿತ ಮೂರು ಕಾಡಾನೆಗಳು ಕಂಡುಬಂದಿದ್ದು, ಕಜೆ ವೆಂಕಟೇಶ್ವರ ಭಟ್‌ ಅವರ 50ಕ್ಕಿಂತ ಹೆಚ್ಚು ಅಡಿಕೆ ಮರ, 5 ತೆಂಗಿನ ಮರ, 50 ಕೊಕ್ಕೋ ಗಿಡ, ಹಲವಾರು ಬಾಳೆಗಿಡ, ಕಾಳುಮೆಣಸಿನ ಬಳ್ಳಿ, ಸಚಿನ್‌ ಭಿಡೆಯವರ 75ಕ್ಕಿಂತ ಹೆಚ್ಚು ಬಾಳೆಗಿಡ, ಅಡಿಕೆ, ತೆಂಗು, ಕೊಕ್ಕೋ ಗಿಡಗಳನ್ನು ಧ್ವಂಸಗೈದಿವೆ. ಹಲವರ ತೋಟದ ಬೇಲಿಗಳಿಗೆ ಹಾನಿಯಾಗಿದೆ.

ರಾತ್ರಿ ಮನೆಗಳ ಸಮೀಪದವರೆಗೂ ಬಂದಿದ್ದ ಕಾಡಾನೆಗಳನ್ನು ಸ್ಥಳೀಯರಾದ ಜಯಾನಂದ, ಡೀಕಯ್ಯ, ರಮೇಶ, ಶೇಖರ, ಅಶೋಕ ಮೊದಲಾದವರು ದೊಂದಿ ಬೆಳಕು ತೋರಿಸಿ ಕಾಡಿಗೆ ಅಟ್ಟಿದ್ದಾರೆ. ಅರಣ್ಯ ಇಲಾಖೆ ಸಿಬಂದಿ ರವಿವಾರ ಹಾನಿಗೊಳಗಾದ ಸ್ಥಳಗಳಿಗೆ ಭೇಟಿ ನೀಡಿ ಪರಿಶೀಲಿಸಿದರು.