ಬಂಟ್ವಾಳ: ದಂಡ ಶುಲ್ಕವನ್ನು ಮರಳಿಸಿದ ಪೊಲೀಸರು.!

Team Udayavani, Mar 26, 2021, 6:06 PM IST

ಬಂಟ್ವಾಳ: ಖಾಸಗಿ ಕಾರೊಂದರಲ್ಲಿ ಚಾಲಕ ಸಮವಸ್ತ್ರ ಧರಿಸಿಲ್ಲ ಎಂದು ಪೊಲೀಸ್ ಸಿಬಂದಿಯೊಬ್ಬರು ದಂಡ ವಿಧಿಸಿ, ಬಳಿಕ ದ.ಕ.ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಯವರ ಸೂಚನೆಯಂತೆ ದಂಡ ಶುಲ್ಕವನ್ನು ಚಾಲಕನಿಗೆ ಮರಳಿಸಿದ ಘಟನೆ ಗುರುವಾರ ರಾತ್ರಿ ನಡೆದಿದೆ.

ಪಾಣೆಮಂಗಳೂರಿನ ಅನಿಲ್ ಕೋಲ್ಪೆ ಅವರು ತಮ್ಮ ಮಾರುತಿ ಆಮ್ನಿ ಕಾರಿನಲ್ಲಿ ತೆರಳುತ್ತಿದ್ದ ವೇಳೆ ಮಾ. 23 ರಂದು ತುಂಬೆ ಬಳಿಯ ರಾಮಲ್ ಕಟ್ಟೆಯಲ್ಲಿ ಹೆದ್ದಾರಿ ಗಸ್ತಿನಲ್ಲಿದ್ದ ಪೊಲೀಸರು ಅನಿಲ್ ಕೋಲ್ಪೆ ಅವರಿಗೆ ಸಮವಸ್ತ್ರ ಧರಿಸಿಲ್ಲ ಎಂದು ದಂಡ ವಿಧಿಸುತ್ತಾರೆ.

ಆದರೆ ಅವರ ಆಮ್ನಿ ಬಿಳಿ ಬೋರ್ಡಿನ ವಾಹನವಾಗಿದ್ದು, ಚಾಲಕ ಸಮವಸ್ತ್ರ ಧರಿಸಬೇಕಿಲ್ಲ. ಅನಿಲ್ ಅವರು ಮನೆಯಲ್ಲಿ ಈ ವಿಚಾರವನ್ನು ತಿಳಿಸಿದಾಗ ಅವರ ಪುತ್ರ ಅದನ್ನು ಮಾ. 25 ರಂದು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಯವರ ಗಮನಕ್ಕೆ ತರುತ್ತಾರೆ. ಅದೇ ದಿನ ರಾತ್ರಿ ಪೊಲೀಸ್ ಸಿಬಂದಿ ಅನಿಲ್ ಅವರನ್ನು ಪಾಣೆಮಂಗಳೂರಿಗೆ ಬರ ಹೇಳಿ ದಂಡ ಶುಲ್ಕವನ್ನು ಮರಳಿಸಿದ್ದಾರೆ.