ಪಾಕೆಟ್‌ ಮನಿ ಸಂತ್ರಸ್ತರಿಗೆ ಕೊಟ್ಟ ವಿದ್ಯಾರ್ಥಿನಿ!

Team Udayavani, Sep 2, 2018, 2:21 PM IST

ಪುತ್ತೂರು: ವಿವೇಕಾನಂದ ಕನ್ನಡ ಮಾಧ್ಯಮ ಶಾಲೆಯ 5ನೇ ತರಗತಿ ವಿದ್ಯಾರ್ಥಿನಿ ಪಲ್ಲವಿ ಕೊಡಗು ಜಿಲ್ಲೆಯ ಸಂತ್ರಸ್ತರ ನೋವಿಗೆ ಸ್ಪಂದಿಸುವ ಮೂಲಕ ಹೃದಯ ವೈಶಾಲ್ಯ ಮೆರೆದಿದ್ದಾಳೆ. ತನ್ನ ತಾತ, ಅಜ್ಜಿ, ಅತ್ತೆ, ಮಾವ, ಹಿರಿಯರೆಲ್ಲ ನೀಡಿದ್ದ 1,102 ರೂ. ಪಾಕೆಟ್‌ ಮನಿಯನ್ನು ಕೂಡಿಟ್ಟಿದ್ದ ಪಲ್ಲವಿ, ಈ ಹಣವನ್ನು ದೇಣಿಗೆ ನೀಡಿದ್ದಾಳೆ. ಶಾಲೆಯಲ್ಲಿ ಶಿಕ್ಷಕರ ಮೂಲಕ ಕೊಡಗಿನ ಪ್ರಾಕೃತಿಕ ವಿಕೋಪಗಳ ಸಂತ್ರಸ್ತರ ನೋವುಗಳನ್ನು ಅರಿತಿದ್ದ ಪಲ್ಲವಿ, ತಾನು ಕೂಡಿಟ್ಟಿದ್ದ ಹಣವನ್ನು ವಿವೇಕಾನಂದ ವಿದ್ಯಾವರ್ಧಕ ಸಂಘದ ಉಪಾಧ್ಯಕ್ಷೆ ಡಾ| ಸುಧಾ ರಾವ್‌ ಅವರಿಗೆ ಹಸ್ತಾಂತರಿಸಿದ್ದಾಳೆ.

ಪಲ್ಲವಿ ನೀಡಿದ ನಾಣ್ಯಗಳ ಪೊಟ್ಟಣ ಸ್ವೀಕರಿಸಿದ ಡಾ| ಸುಧಾ ರಾವ್‌ ಮಾತನಾಡಿ, ಈ ಶಾಲೆ ಮತ್ತು ಮನೆಯವರು ನೀಡಿದ ಸಂಸ್ಕಾರ ಸಾರ್ಥಕತೆಯನ್ನು ಸಾರುತ್ತಿದೆ. ಪಲ್ಲವಿ ನಮಗೆಲ್ಲರಿಗೂ ಮಾದರಿಯಾಗಲಿ ಎಂದು ಹಾರೈಸಿದರು. ಪಲ್ಲವಿ ವೀರಭದ್ರಪ್ಪ ಮತ್ತು ಶರಣಮ್ಮ ದಂಪತಿಯ ಪುತ್ರಿ.