ಅಣೆಕಟ್ಟು ದುರಸ್ತಿ ಕಾಮಗಾರಿ ಬಹುತೇಕ ಪೂರ್ಣ

Team Udayavani, May 21, 2020, 5:51 AM IST

ಮುಂಡಾಜೆ: ಬೆಳ್ತಂಗಡಿ ತಾ|ನ ಕಲ್ಮಂಜ ಗ್ರಾ.ಪಂ. ವ್ಯಾಪ್ತಿಯ ನಿಡಿಗಲ್‌ ಎಂಬಲ್ಲಿ ನೇತ್ರಾವತಿ ನದಿಗೆ ಕಾಯರ್ತೋಡಿ ವಾಳ್ಯಸ್ಥರು ಕಟ್ಟುವ ಕೃಷಿ ನೀರಿನ ಕಟ್ಟದ ಅಣೆಕಟ್ಟು ಹಾಗೂ ನೀರು ಹರಿಯುವ ಕಾಲುವೆಗಳು ಕಳೆದ ಮಳೆಗಾಲದ ಭೀಕರ ಪ್ರವಾಹಕ್ಕೆ ಕೊಚ್ಚಿಕೊಂಡು ಹೋಗಿದ್ದವು. ಸುಮಾರು 125 ಮೀ. ಉದ್ದದ ನೀರಿನ ಕಾಲುವೆ ಸಂಪೂರ್ಣ ಕೊಚ್ಚಿ ಹೋಗಿತ್ತು.

ಈ ವರ್ಷ ಬೇಸಗೆಯಲ್ಲಿ ಕಾಯರ್ತೋಡಿ ವಾಳ್ಯಸ್ಥರು ನೀರಿನ ಕಟ್ಟ ಹಾಕಿದ್ದರೂ ಕಾಲುವೆ ಇಲ್ಲದ ಕಾರಣ ಕೃಷಿಗೆ ನೀರು ಹರಿಸಲು ಸಾಧ್ಯವಾಗಿರಲಿಲ್ಲ. ಇದರಿಂದ ಈ ಪ್ರದೇಶದ ಕೃಷಿಕರಿಗೆ ನೀರಿನ ಸಮಸ್ಯೆ ತೀವ್ರವಾಗಿತ್ತು.

ಬೆಳ್ತಂಗಡಿ ಶಾಸಕ ಹರೀಶ್‌ ಪೂಂಜಾ ಪ್ರಯತ್ನದ ಫಲವಾಗಿ ಅಣೆಕಟ್ಟು ಹಾಗೂ ನೀರಿನ ಕಾಲುವೆ ದುರಸ್ತಿಗೆ ಸಣ್ಣ ನೀರಾವರಿ ಇಲಾಖೆಯಿಂದ 48 ಲಕ್ಷ ರೂ. ಕಾಮಗಾರಿಗೆ ಅನುದಾನ ಬಿಡುಗಡೆಗೊಂಡಿತ್ತು. ಇದೀಗ ನೀರಿನ ಅಣೆಕಟ್ಟು ಮತ್ತು ಕಾಲುವೆ ಕೆಲಸ ಬಹುತೇಕ ಪೂರ್ಣಗೊಂಡಿದೆ. ಇನ್ನು ಕಾಯರ್ತೋಡಿಗೆ ನೀರು ಹರಿಸುವ ಕಾಲುವೆಯ ಗೇಟ್‌ ದುರಸ್ತಿಯ ಕಾಮಗಾರಿ ಮಾತ್ರ ಉಳಿದಿದೆ, ಅದು ಕೂಡ ಸದ್ಯವೇ ಪೂರ್ಣಗೊಳ್ಳಲಿದೆ.