ಕಡಬ: ರಸ್ತೆ ಬದಿಯ ಜ್ಯೂಸ್‌ ಅಂಗಡಿಯಲ್ಲಿಟ್ಟ ಕಬ್ಬನ್ನು ತಿಂದ ಕಾಡಾನೆ; ವಿಡಿಯೋ ವೈರಲ್

Team Udayavani, May 29, 2022, 6:19 PM IST

ಕಡಬ: ಕಾಡಾನೆಯೊಂದು ರಸ್ತೆ ಬದಿಯ ಜ್ಯೂಸ್‌ ಅಂಗಡಿಯಲ್ಲಿ ಜ್ಯೂಸ್‌ ಮಾಡುವುದಕ್ಕಾಗಿ ಇರಿಸಿದ್ದ ಕಬ್ಬನ್ನು  ತಿಂದು ಹೋದ ಘಟನೆ ಗುಂಡ್ಯ-ಸುಬ್ರಹ್ಮಣ್ಯ ರಸ್ತೆಯ ಮಣಿಭಾಂಡದಲ್ಲಿ  ಶನಿವಾರ ತಡರಾತ್ರಿ ಸಂಭವಿಸಿದೆ.

ರಾಜ್ಯ ಹೆದ್ದಾರಿಯ ಮಣಿಭಾಂಡದಲ್ಲಿ  ದೇವುಪಾಲ್‌ ರಸ್ತೆಯ ಬಳಿ ಸ್ಥಳೀಯ ಸುರೇಶ್‌ ದೇವುಪಾಲ್‌ ಅವರು ನಡೆಸುತ್ತಿದ್ದ  ಜ್ಯೂಸ್‌ ಅಂಗಡಿಗೆ ಲಗ್ಗೆ ಇಟ್ಟ ಕಾಡಾನೆ ಜ್ಯೂಸ್‌ಗಾಗಿ ಇರಿಸಿದ್ದ ಕಬ್ಬು ಹಾಗೂ ಜ್ಯೂಸ್‌ ತೆಗೆದ ಬಳಿಕ ಉಳಿದಿದ್ದ ಕಬ್ಬಿನ ಜಲ್ಲೆಯನ್ನು  ಸ್ವಾಹಾ ಮಾಡಿದೆ. ಆದರೆ ಕಬ್ಬಿನ ಜ್ಯೂಸ್‌ ತೆಗೆಯುವ ಮೆಶಿನ್‌ಗೆ ಯಾವುದೇ ರೀತಿಯ ಹಾನಿ ಮಾಡಿಲ್ಲ ಎಂದು ಸ್ಥಳೀಯರು ತಿಳಿಸಿದ್ದಾರೆ.

ಆ ರಸ್ತೆಯಲ್ಲಿ  ರಾತ್ರಿ ವೇಳೆ  ಮನೆಗೆ ತೆರಳುತ್ತಿದ್ದ  ಸ್ಥಳೀಯ ವ್ಯಕ್ತಿಯೊಬ್ಬರು ಆನೆ ಜ್ಯೂಸ್‌ ಅಂಗಡಿಯಲ್ಲಿ ಇರಿಸಿದ್ದ  ಕಬ್ಬನ್ನು  ತಿನ್ನುತ್ತಿರುವ ದೃಶ್ಯವನ್ನು ತನ್ನ ಮೊಬೈಲ್‌ನಲ್ಲಿ ವಿಡಿಯೋ ಮಾಡಿದ್ದು, ಅದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ.