ಪೊಲೀಸ್‌ ಇಲಾಖೆಯ ಗೃಹರಕ್ಷಕರ ಭತ್ತೆ ಹೆಚ್ಚಳ

Team Udayavani, May 18, 2020, 5:54 AM IST

ಸಾಂದರ್ಭಿಕ ಚಿತ್ರ.

ಉಡುಪಿ: ಪೊಲೀಸ್‌ ಇಲಾಖೆಯಡಿ ಕರ್ತವ್ಯ ನಿರ್ವಹಿಸುತ್ತಿರುವ ಗೃಹರಕ್ಷಕದಳದ ಸಿಬಂದಿಯ ವೇತನ ಹೆಚ್ಚಳಕ್ಕೆ ರಾಜ್ಯ ಆರ್ಥಿಕ ಇಲಾಖೆಯಿಂದ ಅನುಮೋದನೆ ದೊರಕಿದ್ದು, ಅವಿಭಜಿತ ದ.ಕ. ಜಿಲ್ಲೆಯಲ್ಲಿ ಸುಮಾರು 456 ಗೃಹ ರಕ್ಷಕ ದಳ ಸಿಬಂದಿ ಇದರ ಲಾಭ ಪಡೆಯಲಿದ್ದಾರೆ. ಇದೇ ವೇಳೆ ಇತರ ವಲಯಗಳಲ್ಲಿ ಸೇವೆ ಸಲ್ಲಿಸುತ್ತಿರುವ ಗೃಹರಕ್ಷಕ ಸಿಬಂದಿಯ ಅಸಮಾಧಾನಕ್ಕೂ ಇದು ಕಾರಣವಾಗಿದೆ.

ಬೆಂಗಳೂರು ವಲಯದಲ್ಲಿ ಕೆಲಸ ಮಾಡುವ ಸಿಬಂದಿಗೆ 500 ರೂ., ಉಳಿದೆಡೆ 380 ರೂ. ದಿನಭತ್ತೆ ನೀಡಲಾಗುತ್ತಿತ್ತು. ಈಗ ಅದು ಎಲ್ಲರಿಗೂ 750 ರೂ.ಗೇರಿದೆ. ಎಪ್ರಿಲ್‌ನಿಂದಲೇ ಪರಿಷ್ಕೃತ ದಿನಭತ್ತೆ ಜಾರಿಯಾಗಿದೆ. ಮಾಸಿಕ (1 ರಜೆಯ ಹೊರತು) ಸುಮಾರು 21,750 ರೂ. ದಿನಭತ್ತೆ ಸಿಗಲಿದೆ.

ಇತರ ಗೃಹರಕ್ಷಕರು ಕಿಡಿ!
ಅವಿಭಜಿತ ದ.ಕ. ಜಿಲ್ಲೆಯಲ್ಲಿ ಪ್ರವಾಸೋದ್ಯಮ, ಪೊಲೀಸ್‌ ಇಲಾಖೆ ಸೇರಿದಂತೆ ವಿವಿಧ ಕಡೆಯಲ್ಲಿ 1,500 ಗೃಹರಕ್ಷಕ ಸಿಬಂದಿ ದಿನಗೂಲಿ ಆಧಾರದ ಮೇಲೆ ಹಲವು ವರ್ಷಗಳಿಂದ ಸೇವೆ ಸಲ್ಲಿಸುತ್ತಿದ್ದಾರೆ. ಸರಕಾರದ ವೇತನ ತಾರತಮ್ಯ ಅವರು ಕುಪಿತರಾಗಿದ್ದು, ಪೊಲೀಸ್‌ ಇಲಾಖೆ ಹೊರತು
ಅನ್ಯ ಇಲಾಖೆಯಲ್ಲಿ ಕೆಲಸ ಮಾಡಲು ಹಿಂದೇಟು ಹಾಕುತ್ತಿದ್ದಾರೆ.

ದಿನಕ್ಕೆ 380 ರೂ.ಗಳಂತೆ ತಿಂಗಳಪೂರ್ತಿ ದುಡಿದರೆ 9 ಸಾವಿರ ರೂ. ಸಿಗುತ್ತದೆ. ಅನಾರೋಗ್ಯ, ಇನ್ನಾವುದೋ ಕಾರಣಕ್ಕೆ ರಜೆ ಹಾಕಿದರೆ ಕಡಿತವಾಗುತ್ತದೆ. ನಾವು ಜೀವನ ಭದ್ರತೆಗಾಗಿ ಪರದಾಡುವ ಸ್ಥಿತಿ ಬಂದಿದೆ ಎಂದು ಅವರು ಬೇಸರ ವ್ಯಕ್ತಪಡಿಸಿದ್ದಾರೆ.