Padubidri: ಮೊಬೈಲ್‌ ಕೊಡಿಸದ ತಾಯಿ; ಸಾಯಲು ಹೆದ್ದಾರಿಗೋಡಿದ ಮಗ; ಲಾರಿ ಡಿಕ್ಕಿ

Team Udayavani, Dec 29, 2024, 11:38 PM IST

ಪಡುಬಿದ್ರಿ: ಮೊಬೈಲ್‌ ತೆಗೆಸಿಕೊಡುವ ವಿಚಾರಕ್ಕೆ ಸಂಬಂಧಿಸಿ ತಾಯಿಯೊಂದಿಗೆ ಜಗಳ ಮಾಡಿದ ಮಗ ಹೆದ್ದಾರಿಗೋಡಿದ್ದು, ಈ ವೇಳೆ ಆತನನಿಗೆ ಲಾರಿ ಢಿಕ್ಕಿಯಾಗಿ ಗಂಭೀರವಾಗಿ ಗಾಯಗೊಂಡ ಘಟನೆ ಡಿ. 28ರಂದು ಪಡುಬಿದ್ರಿ ಜಂಕ್ಷನ್‌ನಲ್ಲಿ ಸಂಭವಿಸಿದೆ.

ಮುಂಬಯಿನ ಬೋರಿವಿಲಿಯ ಬೇಲಾಡಿಯ ತಾಯಿ ಮನೆಗೆ ಬಂದಿದ್ದ ಕುಶಲಾ ಹಾಗೂ ಅವರ ಪುತ್ರ ಕೌಶಿಕ್‌ (17) ಶನಿವಾರ ಪಡುಬಿದ್ರಿಗೆ ಬಂದಿದ್ದರು. ಪಡುಬಿದ್ರಿಯ ಮುಖ್ಯ ಪೇಟೆಯ ಜಂಕ್ಷನ್‌ನ ನವರಂಗ್‌ ರೆಸ್ಟೋರೆಂಟಿನ ಬಳಿ ಮೊಬೈಲ್‌ ತೆಗೆಸಿಕೊಡುವ ವಿಚಾರದಲ್ಲಿ ತಾಯಿ-ಮಗನ ನಡುವೆ ಮಾತಿಗೆ ಮಾತು ಬೆಳೆದಿದೆ.

ಮೊಬೈಲ್‌ ತೆಗೆಸಿಕೊಡದ ಕಾರಣ ತಾನೇ ಸಾಯುವುದಾಗಿ ಹೇಳಿ ರಾಷ್ಟ್ರೀಯ ಹೆದ್ದಾರಿ 66ರ ಮಧ್ಯೆ ಓಡಿ ಬಂದಾಗ ಲಾರಿಯೊಂದು ಢಿಕ್ಕಿಯಾಗಿ ಗಂಭೀರ ಗಾಯಗಳೊಂದಿಗೆ ಮುಕ್ಕದ ಖಾಸಗಿ ಆಸ್ಪತ್ರೆಗೆ ದಾಖಲಾದ ವಿಚಿತ್ರ ಘಟನೆಯೊಂದು ವರದಿಯಾಗಿದೆ.

ಪಡುಬಿದ್ರಿಗೆ ಶನಿವಾರ ತಾಯಿ ಮಗ ಬಂದಿದ್ದಾಗ ಈ ಘಟನೆ ಸಂಭವಿಸಿದೆ. ಈಗ ಕನ್ನಡಕ ಸರಿ ಮಾಡಿಸೋಣ. ಮೊಬೈಲ್‌ ಬೇಡ ಎಂದು ತಾಯಿ ಕುಶಲಾ ಅವರು ಹೇಳಿದ್ದರು. ಆ ಕೂಡಲೇ ನವರಂಗ್‌ ಬಾರ್‌ ಸಮೀಪದಿಂದ ನೇರವಾಗಿ ಕೌಶಿಕ್‌ ಓಡಿ ಹೆದ್ದಾರಿ ಮಧ್ಯೆ ನಿಂತಾಗ ಮಂಗಳೂರು ಕಡೆಯಿಂದ ಉಡುಪಿಯತ್ತ ಹೋಗುತ್ತಿದ್ದ ಲಾರಿ ಢಿಕ್ಕಿಯಾಗಿದೆ. ಲಾರಿ ಚಾಲಕನ ಅತೀ ವೇಗ ಹಾಗೂ ಅಜಾಗ್ರತೆಯ ಚಾಲನೆಯ ವಿರುದ್ಧ ಪಡುಬಿದ್ರಿ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣವು ದಾಖಲಾಗಿದೆ. ಕೌಶಿಕ್‌ ತೀವ್ರ ನಿಗಾ ವಿಭಾಗದಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾನೆ.