ಬಿಎಸ್ಸೆನ್ನೆಲ್‌ ಗುತ್ತಿಗೆ ಕಾರ್ಮಿಕರ 1 ತಿಂಗಳ ಬಾಕಿ ವೇತನ ಪಾವತಿ

Team Udayavani, Apr 18, 2020, 8:56 AM IST

ಸಾಂದರ್ಭಿಕ ಚಿತ್ರ

ಉಡುಪಿ: ಲಾಕ್‌ಡೌನ್‌ ಸಂಕಟದಿಂದ ತೊಂದರೆಗೆ ಒಳಗಾಗಿದ್ದ ಆವಿಭಜಿತ ದ.ಕ. ಜಿಲ್ಲೆಯ ಬಿಎಸ್ಸೆನ್ನೆಲ್‌ ಗುತ್ತಿಗೆ ಕಾರ್ಮಿಕರಿಗೆ ಸಂಸ್ಥೆಯು ಒಂದು ತಿಂಗಳ ವೇತನವನ್ನು ಎ. 16ರಂದು ಪಾವತಿಸಿದೆ. ಬಿಎಸ್ಸೆನ್ನೆಲ್‌ನಲ್ಲಿ ಗುತ್ತಿಗೆ ಕಾರ್ಮಿಕರಾಗಿದ್ದ ಸಾವಿರಾರು ಮಂದಿಗೆ ಹಿಂದಿನ ಹಲವು ತಿಂಗಳ ವೇತನ ಪಾವತಿಗೆ ಬಾಕಿ ಇತ್ತು. ಮೊದಲೇ ಆರ್ಥಿಕ ಸಂಕಷ್ಟ ಎದುರಿಸುತ್ತಿದ್ದ ಕಾರ್ಮಿಕರು ಲಾಕ್‌ಡೌನ್‌ ಪರಿಣಾಮ ಮತ್ತಷ್ಟು ತೊಂದರೆಗೆ ಒಳಗಾಗಿದ್ದರು. ಕಾರ್ಮಿಕರ ಹಾಜರಾತಿ ಆಧರಿಸಿ ಗುತ್ತಿಗೆದಾರರ ಮೂಲಕ ಹಣ ಹಂಚಿಕೆ ಮಾಡಲಾಗಿದೆ.

670 ಮಂದಿಗೆ ಅನುಕೂಲ
ಮಂಗಳೂರು ಟೆಲಿಕಾಂ ವೃತ್ತದಡಿಯ ದ.ಕ., ಉಡುಪಿ ಜಿಲ್ಲೆಗಳ 500 ಮಂದಿ ಹಾಗೂ ಕಾರವಾರ ಭಾಗದ 170 ಮಂದಿ ಸೇರಿ 670 ಕಾರ್ಮಿಕರಿಗೆ ಹಣ ಪಾವತಿಯಾಗಿದೆ. ಮೊದಲ ಹಂತವಾಗಿ 72 ಲಕ್ಷ ರೂ.ಗಳನ್ನು ತುರ್ತಾಗಿ ಬಿಡುಗಡೆಗೊಳಿಸಿದೆ. ಇನ್ನುಳಿದ ಕಾರ್ಮಿಕರನ್ನು ಎರಡನೇ ಹಂತದಲ್ಲಿ ಪರಿಗಣನೆಗೆ ತೆಗೆದುಕೊಳ್ಳಲಾಗುತ್ತದೆ. ಮುಂದಿನ ದಿನಗಳಲ್ಲಿ ಬಾಕಿ ವೇತನವನ್ನು ಹಂತಹಂತವಾಗಿ ನೀಡುವ ಬಗ್ಗೆ ಬಿಎಸ್ಸೆನ್ನೆಲ್‌ ಸಂಸ್ಥೆಯ ಅಧಿಕಾರಿಗಳು ಭರವಸೆ ನೀಡಿದ್ದಾರೆ.

ಉದಯವಾಣಿಯಲ್ಲಿ ವರದಿ
ಅವಿಭಜಿತ ದ.ಕ. ಜಿಲ್ಲೆ ಮಂಗಳೂರು ಟೆಲಿಕಾಂ ವೃತ್ತ ವ್ಯಾಪ್ತಿಯಲ್ಲಿ 1,100ಕ್ಕೂ ಅಧಿಕ ಮಂದಿ ಗುತ್ತಿಗೆ ಕಾರ್ಮಿಕರಾಗಿ ವಿವಿಧ ಹುದ್ದೆಗಳಲ್ಲಿ ಖಾಯಂ ನೌಕರರಿಗೆ ಸಮನಾಗಿ ಕೆಲಸ ನಿರ್ವಹಿಸುತ್ತಿದ್ದರು. ಬಿಎಸ್ಸೆನ್ನೆಲ್‌ ಆರ್ಥಿಕ ನಷ್ಟಕ್ಕೆ ಒಳಗಾದ ಸಂದರ್ಭ ಈ ವಲಯದ ಗುತ್ತಿಗೆ ಕಾರ್ಮಿಕರಿಗೆ ಕೆಲಸ ನಿರಾಕರಿಸಲಾಗಿತ್ತು. ಆಗ 14 ತಿಂಗಳ ವೇತನ ಬಾಕಿ ಇತ್ತು. ಲಾಕ್‌ಡೌನ್‌ ಬಳಿಕವಂತೂ ಆ ಕಾರ್ಮಿಕರ ಸ್ಥಿತಿ ಶೋಚನೀಯವಾಗಿಪಿತ್ತು. ಈ ಬಗ್ಗೆ ಎ. 16ರಂದು ಉದಯವಾಣಿ ಕಾರ್ಮಿಕರ ಸಂಕಷ್ಟದ ಬದುಕಿನ ಬಗ್ಗೆ ಚಿತ್ರಣದ ವರದಿ ಪ್ರಕಟಿಸಿತ್ತು. ಸುದ್ದಿ ಪ್ರಕಟಗೊಂಡ ಮರುದಿನವೇ ಕಾರ್ಮಿಕರಿಗೆ ವೇತನ ಪಾವತಿಯಾಗಿದೆ. ಕಾರ್ಮಿಕರು ಕಷ್ಟ ಕಾಲದಲ್ಲಿ ವೇತನ ದೊರಕಿರುವುದಕ್ಕೆ ಹರ್ಷ ವ್ಯಕ್ತಪಡಿಸಿದ್ದಾರೆ.