ಕಷ್ಟದಲ್ಲಿದ್ದರೂ ಅಕ್ಕಿ ಹಂಚಿದ ಮಲ್ಪೆಯ ಶಾರದಕ್ಕ 

Team Udayavani, Apr 23, 2020, 5:40 AM IST

ಮಲ್ಪೆ : ಇಲ್ಲೊಬ್ಬ ಮಹಿಳೆ ತಾನು ಅತೀ ಕಷ್ಟದಲ್ಲಿದ್ದರೂ ತನ್ನಿಂದ ಆದಷ್ಟು ಕೂಡಿಟ್ಟ ಹಣದಿಂದ ನೆರೆಹೊರೆಯ ಸುಮಾರು 140 ಮನೆಗೆ ಅಕ್ಕಿಯನ್ನು ಹಂಚಿ ಮಾನವೀಯತೆಯನ್ನು ಮೆರೆದಿದ್ದಾರೆ.

ಮೀನುಗಾರಿಕೆ ಬಂದರಿನಲ್ಲಿ ಅಲ್ಲೊ ಇಲ್ಲೋ ಸಿಕ್ಕಿದ ಮೀನು, ಮರುವಾಯಿ ಗಳನ್ನು ಮಾರಿ ಪುಟ್ಟ ಗುಡಿಸಲಿನಲ್ಲಿ ಜೀವನ ಸಾಗಿಸುವ ಮಲ್ಪೆ ವಡಭಾಂಡೇಶ್ವರದ ನೆರ್ಗಿ ಸಮೀಪದ ಶಾರದಕ್ಕ ವಡಭಾಂಡೇಶ್ವರ ನೆರ್ಗಿಯಲ್ಲಿ ಯಾವುದೇ ಪ್ರಚಾರ ಬಯಸದೆ ತಲಾ 5ಕೆ.ಜಿ.ಯಂತೆ ಒಟ್ಟು 140 ಮನೆಗಳಿಗೆ ಅಕ್ಕಿಯನ್ನು ಹಂಚಿ ತನ್ನ ಮನೆ ಸೇರಿದ್ದಾರೆ. ವಿಷಯ ತಿಳಿದು ಅವರನ್ನು ಮಾತನಾಡಿಸಿದಾಗ ಕೋವಿಡ್-19 ಬಂದು ಎಲ್ಲರೂ ಕಷ್ಟದಲ್ಲಿದ್ದಾರೆ. ನನಗಿಲ್ಲದಿದ್ದರೂ ತನ್ನ ಕೈಯಿಂದ ಆದಷ್ಟು ಮಂದಿಗೆ ನೀಡಿದೆ, ಮುಂದೆಯೂ ಸಾಧ್ಯವಾದರೆ ಮತ್ತಷ್ಟು ಮಂದಿಗೆ ನೀಡುತೇ¤ನೆ ಎನ್ನುವ ಅವರು ನ್ಯಾಯಬೆಲೆ ಅಂಗಡಿಯಲ್ಲಿ ದೊರೆತ ಅಕ್ಕಿಯನ್ನೂ ಕೂಡ ಮನೆ ವಠಾರದ ಕೂಲಿ ಕಾರ್ಮಿಕರಿಗೆ ಹಂಚಿದ್ದಾರೆ ಎನ್ನಲಾಗಿದೆ. ಪ್ರಚಾರಕ್ಕಾಗಿ ಸೇವೆ ಮಾಡುವವರ ನಡುವೆ ಇಂಥವರು ಸಿಗುವುದು ಬಲು ಅಪರೂಪ.