Tragedy ಬ್ರಹ್ಮಾವರದಲ್ಲಿ ದುರಂತ; ನಾಲ್ವರು ಯುವಕರು ನೀರುಪಾಲು

Team Udayavani, Apr 23, 2023, 10:35 PM IST

ಬ್ರಹ್ಮಾವರ: ಕುಕ್ಕುಡೆಕುದ್ರು ಬಳಿ ರವಿವಾರ ಸಂಜೆ ಸಂಭವಿಸಿದ ದುರ್ಘ‌ಟನೆಯಲ್ಲಿ ನಾಲ್ವರು ಯುವಕರು ಮೃತಪಟ್ಟಿದ್ದಾರೆ.

ಹೂಡೆಯ ಪೈಸಾನ್‌, ಇಬಾದ್‌ ಹಾಗೂ ಅವರ ಸಂಬಂಧಿಕರಾದ ತೀರ್ಥಹಳ್ಳಿಯ ಈರ್ವರು ಮೃತಪಟ್ಟವರು ಎನ್ನಲಾಗಿದೆ. ತೀರ್ಥಹಳ್ಳಿಯ ಇಬ್ಬರು ಶನಿವಾರ ರಮ್ಜಾನ್‌ ಹಬ್ಬಕ್ಕಾಗಿ ಹೂಡೆಗೆ ಆಗಮಿಸಿದ್ದರು.

ಚಿಪ್ಪು ಮೀನು, ಮರುವಾಯಿ ಹಿಡಿಯಲು ದೋಣಿಯಲ್ಲಿ ಹೂಡೆಯಿಂದ 7 ಮಂದಿ ಸ್ವರ್ಣಾ ನದಿಯ ಕುಕ್ಕುಡೆ ಕುದ್ರು ಬಳಿ ಆಗಮಿಸಿದ್ದರು. ನೀರಿನ ಮಟ್ಟ ಹಾಗೂ ಮರಳುಗಾರಿಕೆಯಿಂದ ಆದ ಹೊಂಡ ಅರಿಯದೆ ಮುಳುಗಿದ್ದಾರೆ. ಒಬ್ಬರನ್ನು ರಕ್ಷಿಸಲು ಮತ್ತೂಬ್ಬರು ತೆರಳಿ ನಾಲ್ವರು ನೀರುಪಾಲಾಗಿದ್ದಾರೆ ಎನ್ನಲಾಗಿದೆ. ಮೂವರ ಮೃತದೇಹ ದೊರೆತಿದ್ದು, ಇನ್ನೋರ್ವನಿಗಾಗಿ ಹುಡುಕಾಟ ನಡೆಸಲಾಗುತ್ತಿದೆ. ರವಿವಾರ ಜೋರಾದ ಗಾಳಿ ಬೀಸುತ್ತಿದ್ದುದರಿಂದ ಘಟನೆಗೆ ಕಾರಣವಾಗಿದೆ ಎನ್ನಲಾಗಿದೆ. ಯುವಕರ ಗುಂಪಿನ ಕಿರುಚಾಟ ಕೇಳಿ ಸ್ಥಳೀಯರಿಗೆ ವಿಚಾರ ತಿಳಿದಿದೆ. ಮೂವರು ಈಜಿಕೊಂಡು ದಡ ಸೇರಿದ್ದಾರೆ. ಬ್ರಹ್ಮಾವರ ಪೊಲೀಸರು ಘಟನಾ ಸ್ಥಳಕ್ಕೆ ಭೇಟಿ ನೀಡಿದ್ದಾರೆ.