Udupi: ಕಟಪಾಡಿ-ನಿಟ್ಟೂರು; ಹೆದ್ದಾರಿ ಬದಿ ತ್ಯಾಜ್ಯ ರಾಶಿ

Team Udayavani, Nov 11, 2024, 6:27 PM IST

ಉಡುಪಿ: ಉಡುಪಿ ನಗರದಲ್ಲಿ ತ್ಯಾಜ್ಯ ವಿಲೇವಾರಿ ಒಂದು ಮಟ್ಟಕ್ಕೆ ಸಮಾಧಾನಕರ ಅನಿಸಿದರೂ ಕಟಪಾಡಿಯಿಂದ ನಿಟ್ಟೂರಿನವರೆಗೆ ರಾಷ್ಟ್ರೀಯ ಹೆದ್ದಾರಿ 66ರ ಉದ್ದಕ್ಕೂ ಎಸೆಯಲಾಗಿರುವ ರಾಶಿ ರಾಶಿ ತ್ಯಾಜ್ಯ ಸ್ವತ್ಛ ಉಡುಪಿಯ ಪರಿಕಲ್ಪನೆಯನ್ನು ಅಣಕಿಸುತ್ತಿದೆ.

ಕಟಪಾಡಿಯಿಂದ ನಿಟ್ಟೂರುವರೆಗೆ ಸುಮಾರು 15 ಕಿ.ಮೀ ವ್ಯಾಪ್ತಿಯಲ್ಲಿ ಎಲ್ಲೆಂದರಲ್ಲಿ ತ್ಯಾಜ್ಯ ಎಸೆಯಲಾಗಿದ್ದು, ಅವು ಕೊಳೆತು ಅಸಹ್ಯಕರ ವಾತಾವರಣ ಸೃಷ್ಟಿಯಾಗಿದೆ. ಹೆದ್ದಾರಿಯಲ್ಲಿ ಸಾಗುವಾಗೆಲ್ಲ ದುರ್ವಾಸನೆ ಮೂಗಿಗೆ ಬಡಿಯುತ್ತಿದೆ. ಇದೇ ಪರಿಸರದಲ್ಲಿ ವಾಸವಾಗಿರುವವರ ಗೋಳು ಹೇಳದ ಸ್ಥಿತಿಯಲ್ಲಿದೆ.

ಹಳೆಯ ಬಟ್ಟೆ, ಆಹಾರ ಪೊಟ್ಟಣ, ಚಪ್ಪಲಿಗಳು, ಹಾಳಾದ ಗೃಹ ಬಳಕೆ ಅನುಪಯುಕ್ತ ವಸ್ತು, ಪ್ಲಾಸ್ಟಿಕ್‌ ಬಾಟಲಿ ಹೀಗೆ ಕಸಗಳನ್ನು, ಹಳೆ ಕಟ್ಟಡದ ಅವಶೇಷಗಳನ್ನು ತಂದು ಹೆದ್ದಾರಿ ಬದಿ ಎಸೆದು ಹೋಗುತ್ತಿದ್ದಾರೆ.

ರೋಗರುಜಿನಗಳ ತಾಣ
ನಿಟ್ಟೂರಿನಿಂದ- ಕಟಪಾಡಿ ವರೆಗೆ ಹಲವೆಡೆ ಸಣ್ಣ ತೋಡು ಹರಿಯುತ್ತಿದೆ. ಉದ್ಯಾವರ ಹೊಳೆ, ಇಂದ್ರಾಣಿ ನದಿ, ಸಣ್ಣಪುಟ್ಟ ಕಾಲುವೆಗಳು ತ್ಯಾಜ್ಯ ತುಂಬಿಕೊಂಡು ಕಲುಷಿತಗೊಂಡಿವೆ. ತ್ಯಾಜ್ಯ ಚೀಲಗಳು ತೋಡು, ಕಾಲುವೆಗಳಲ್ಲಿ ಸೇರಿಕೊಂಡು ಪರಿಸರ ಮಾಲಿನ್ಯಕ್ಕೆ ದೊಡ್ಡ ಕೊಡುಗೆ ನೀಡುತ್ತಿವೆ.

ಗಾಳಿ ಬರುವಾಗ ವಾಸನೆ ಬಡಿಯುತ್ತದೆ
ಹೆದ್ದಾರಿ ಬದಿ ತ್ಯಾಜ್ಯ ತಂದು ಹಾಕುವುದರಿಂದ ಅದು ಕೊಳೆತು ದುರ್ವಾಸನೆ ಬರುತ್ತದೆ. ಗಾಳಿ ಬೀಸುವಾಗೆಲ್ಲ ಮೂಗು ಬಿಡಲು ಆಗುವುದಿಲ್ಲ. ರೋಗ ಬರುವುದಕ್ಕೂ ಇದು ಕಾರಣವಾಗುತ್ತಿದೆ.
– ಹೊನ್ನಮ್ಮ, ನಿಟ್ಟೂರು ನಿವಾಸಿ.

ಜಾನುವಾರುಗಳಿಗೆ ದುಷ್ಪರಿಣಾಮ
ಇಲ್ಲಿ ಒಣ, ಹಸಿ ತ್ಯಾಜ್ಯ ಎರಡನ್ನೂ ಎಸೆಯಲಾಗುತಿದ್ದು ಜಾನುವಾರುಗಳು, ಬೀದಿ ನಾಯಿಗಳು ಈ ಆಹಾರವನ್ನು ಸೇವಿಸುತ್ತಿವೆ. ಇದರಿಂದ ಅವುಗಳ ಆರೋಗ್ಯದ ಮೇಲೂ ಪರಿಣಾಮ ಬೀರಲಿದೆ.