ಬೆಳ್ಮಣ್‌: ಉದ್ಘಾಟನೆಗೆ ಮುನ್ನವೇ ಕಣ್ಮುಚ್ಚುವುದೇ ನೀರಿನ ಘಟಕ!

Team Udayavani, Nov 25, 2024, 1:18 PM IST

ಬೆಳ್ಮಣ್‌: ಬೆಳ್ಮಣ್‌ ಗ್ರಾಮ ಪಂಚಾಯತ್‌ ವ್ಯಾಪ್ತಿಯ ಜಂತ್ರ ರಸ್ತೆಯ ಪಕ್ಕದಲ್ಲಿ ಲಕ್ಷಾಂತರ ರೂ. ವ್ಯಯಿಸಿ ನಿರ್ಮಿಸಿದ ಕುಡಿಯುವ ನೀರಿನ ಘಟಕ ಇನ್ನೂ ಉದ್ಘಾಟನೆಗೊಳ್ಳದೆ ನೇಪಥ್ಯಕ್ಕೆ ಸೇರುವ ಎಲ್ಲ ಲಕ್ಷಣಗಳನ್ನು ಹೊಂದಿದೆ.

ಜಿ.ಪಂ.ನ ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್‌ರಾಜ್‌ ಇಲಾಖೆ, ಕಾರ್ಕಳ ತಾ.ಪಂ. ಹಾಗೂ ಬೆಳ್ಮಣ್‌ ಗ್ರಾ.ಪಂ.ಗಳ ಸಹಯೋಗದ ಉಲ್ಲೇಖೀತ ಫಲಕ ಇರುವ ಈ ಯೋಜನೆಯಲ್ಲಿ 2016-17ನೇ ಸಾಲಿನಲ್ಲಿ ನಿರ್ಮಾಣಗೊಂಡಿದೆ ಎಂದು ಬರೆಯಲಾಗಿದೆ. ಆದರೆ, ಉದ್ಘಾಟನೆ ಮಾತ್ರ ಇನ್ನೂ ಆಗಿಲ್ಲ.

ಏನಿದು ಯೋಜನೆ?
ಬೆಳ್ಮಣ್‌ ಜಂತ್ರ ಪರಿಸರದ ಸುಮಾರು 15 ಕೊರಗ ಕುಟುಂಬಗಳ ಕುಡಿಯುವ ನೀರಿಗಾಗಿ ಈ ಯೋಜನೆಯನ್ನು ಉಡುಪಿಯ ಕೆಆರ್‌ಡಿಎಲ್‌ ಅನುಷ್ಠಾನಗೊಳಿಸಿತ್ತು. 2 ರೂ. ನಾಣ್ಯ ಹಾಕಿ ನೀರು ಪಡೆಯುವ ಯೋಜನೆ ಇದು. ಆದರೆ ಇಲ್ಲಿನ ಕೊರಗ ಕುಟುಂಬಗಳ ಮಂದಿ ಇಲ್ಲಿ ಪೂರೈಕೆಯಾಗುವ ನೀರನ್ನು ತಮ್ಮ ಕಾಲನಿಯ ಓವರ್‌ ಹೆಡ್‌ ಟ್ಯಾಂಕ್‌ಗೆ ಹಾಯಿಸಿ
ಬಳಸುತ್ತಿರುವುದರಿಂದ ಈ ಯೋಜನೆ ನನೆಗುದಿಗೆ ಬಿದ್ದಿದೆ. ಇತ್ತೀಚೆಗೆ ಬೆಳ್ಮಣ್‌ ಗೆ ಬಂದ ಪಂಚಾಯತ್‌ ಅಭಿವೃದ್ಧಿ ಅಧಿಕಾರಿಯವರು ಈ ಕಟ್ಟಡದ ಮುರಿದ ಬಾಗಿಲುಗಳನ್ನು ಸರಿಪಡಿಸಿ ದುರಸ್ತಿ ನಡೆಸಿದ್ದರೂ ಈ ಯೋಜನೆಯ ನೀರು ಉಪಯೋಗವಾಗಲೇ ಇಲ್ಲ.

ಗ್ರಾಮ ಸಭೆಯಲ್ಲಿ ಚರ್ಚೆ
ಜಂತ್ರ ಭಾಗಕ್ಕೆ ಅನಾವಶ್ಯಕವಾಗಿರುವ ಈ ಯೋಜನೆಯನ್ನು ಬೆಳ್ಮಣ್‌ ಪೇಟೆಗೆ ವರ್ಗಾಯಿಸಿ ಸದುಪಯೋಗ ಮಾಡುವ ಬಗ್ಗೆ ಸಲಹೆಗಳು ಕೇಳಿ ಬಂದಿದ್ದರೂ ಯೋಜನೆ ಕೊರಗ ಸಮುದಾಯದ ಬಳಕೆಯದಾದ್ದರಿಂದ ಚರ್ಚೆಯೂ ನೇಪಥ್ಯಕ್ಕೆ ಸರಿಯಿತು. ಒಟ್ಟಾರೆಯಾಗಿ ಸಾರ್ವಜನಿಕರ ತೆರಿಗೆ ಹಣ ಈ ರೀತಿಯಲ್ಲೂ ಪೋಲಾಗುತ್ತದಲ್ಲವೇ ಎಂಬ ಅಳಲು ಬೆಳ್ಮಣ್‌ ಭಾಗದ
ಸಾರ್ವಜನಿಕರದ್ದು.

ಸ್ಥಳಾಂತರ ಕಷ್ಟ
ಈ ಯೋಜನೆ ಕೊರಗರಿಗಾಗಿಯೇ ರೂಪಿತವಾಗಿದ್ದು ಸ್ಥಳಾಂತರ ಕಷ್ಟ. ಜಿಲ್ಲೆಯ ಇತರೆಡೆ ಉತ್ತಮವಾಗಿ ಉಪಯೋಗವಾಗುತ್ತಿದೆ.
*ಮಮತಾ ಶೆಟ್ಟಿ,
ಪಿಡಿಒ ಬೆಳ್ಮಣ್‌

ಕ್ರಮ ಕೈಗೊಳ್ಳಿ
ಸದ್ಬಳಕೆಯ ಬಗ್ಗೆ ಪಂಚಾಯತ್‌ ತುರ್ತು ಕ್ರಮ ಕೈಗೊಳ್ಳಬೇಕು. ಅಗತ್ಯ ಬೇಡಿಕೆಯಾಗಿರುವ ನೀರಿನ ಪೂರೈಕೆ ಉತ್ತಮವಾಗಿರಲಿ.
*ಕ್ಸೇವಿಯರ್‌ ಡಿ’ಮೆಲ್ಲೋ,
ತಾ.ಪಂ. ಮಾಜಿ ಸದಸ್ಯರು

*ಶರತ್‌ ಶೆಟ್ಟಿ ಮುಂಡ್ಕೂರು