Kundapura: ಕಾರು- ದ್ವಿಚಕ್ರ ವಾಹನ ಢಿಕ್ಕಿ: ಸವಾರ ಸಾವು

Team Udayavani, Jul 31, 2023, 9:00 PM IST

ಕುಂದಾಪುರ: ಕಾಳಾವರ ಗ್ರಾಮದ ಶ್ರೀ ಕಟ್ಟೆ ಭಂಡಾರಿ ದೇವಸ್ಥಾನದ ಹತ್ತಿರ ಕಾರು ದ್ವಿಚಕ್ರ ವಾಹನ ಢಿಕ್ಕಿಯಾಗಿ ಸವಾರ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ.

ಸುದೀಪ್‌ ಶೆಟ್ಟಿ ಅವರು ಕಾರನ್ನು ಕೋಟೇಶ್ವರ ಕಡೆಯಿಂದ ಹಾಲಾಡಿ ಕಡೆಗೆ ಚಾಲನೆ ಮಾಡಿಕೊಂಡು ಹೋಗುತ್ತಿದ್ದಾಗ ಪಂಚಾಯತ್‌ ಕಚೇರಿ ಕಡೆಯಿಂದ ನರಸಿಂಹ ಶೆಟ್ಟಿ (65) ಅವರು ದ್ವಿ ಚಕ್ರ ವಾಹನದಲ್ಲಿ ಬಂದು ರಸ್ತೆ ಬದಿ ನಿಲ್ಲಿಸಿದ್ದಾಗ ಢಿಕ್ಕಿಯಾಗಿದೆ.

ದ್ವಿಚಕ್ರ ವಾಹನ ಕಾರಿಗೆ ಏಕಾಏಕಿ ಅಡ್ಡಬರುತ್ತಿದೆ ಎಂದು ಭಾವಿಸಿ ಕಾರು ಚಾಲಕ ದಿಢೀರ್‌ ಬ್ರೇಕ್‌ ಹಾಕಿ, ಕಾರು ನಿಯಂತ್ರಣ ತಪ್ಪಿ ರಸ್ತೆಯ ಬಲಕ್ಕೆ ಸರಿದು ಕಲ್ಲು ಕಂಬವನ್ನು ತುಂಡರಿಸಿ 50 ಅಡಿ ದೂರ ಸಾಗಿ ಒಂದು ಗುಡಿಯ ಕಂಬಕ್ಕೆ ಢಿಕ್ಕಿ ಹೊಡೆದು ನಿಂತಿತ್ತು. ನರಸಿಂಹ ಶೆಟ್ಟಿ ಅವರ ತಲೆಗೆ, ಎರಡೂ ಕಾಲುಗಳಿಗೆ ಹಾಗೂ ದೇಹದ ಇತರೆ ಅಂಗಾಂಗಗಳಿಗೆ ಗಂಭೀರ ರಕ್ತ ಗಾಯವಾಗಿ ಅವರನ್ನು ತತ್‌ಕ್ಷಣ ಆಸ್ಪತ್ರೆಗೆ ಕರೆದೊಯ್ಯಲಾಗಿತ್ತಾದರೂ ಅವರು ಸ್ಥಳದಲ್ಲಿಯೇ ಮೃತಪಟ್ಟಿದ್ದರು. ಸಂಚಾರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.