Kundapura; ಕಂಚುಗೋಡಲ್ಲಿ ಕಡಲ್ಕೊರೆತ: ಮನೆಗಳು ಅಪಾಯದಲ್ಲಿ

Team Udayavani, Oct 18, 2024, 12:04 AM IST

ಕುಂದಾಪುರ: ವಾಯು ಭಾರ ಕುಸಿತದಿಂದಾಗಿ ಕಡಲ ಅಲೆಗಳ ಅಬ್ಬರ, ಗಾಳಿಯ ತೀವ್ರತೆ ಕಳೆ ದೆರಡು ದಿನಗಳಿಂದ ಜಾಸ್ತಿಯಿದೆ. ಇದರಿಂದ ಹೊಸಾಡು ಗ್ರಾಮದ ಕಂಚುಗೋಡು, ಗುಜ್ಜಾಡಿ ಗ್ರಾಮದ ಸನ್ಯಾಸಿಬಲೆ ಪ್ರದೇಶದಲ್ಲಿ ಕಡಲ್ಕೊರೆತ ತೀವ್ರಗೊಂಡಿದ್ದು, 7-8 ಮನೆಗಳು ಅಪಾಯದಲ್ಲಿವೆ.

ಕಂಚುಗೋಡಿನಲ್ಲಿ ಈ ಮುಂಗಾರು ಋತುವಿನಿಂದ ಈಚೆಗೆ ಸುಮಾರು 500 ಮೀ. ನಷ್ಟು ಕಡಲ್ಕೊರೆತ ಆಗಿದೆ. ಗುರುವಾರವೂ ಕಡಲ್ಕೊರೆತ ತೀವ್ರ ಗೊಂಡಿದ್ದು, ಬುಧವಾರ ರಾತ್ರಿ ಇಲ್ಲಿನ 3 ಮನೆಗಳ ಒಳಗೆ ನೀರು ನುಗ್ಗಿದೆ. ಈ ಪ್ರದೇಶದಿಂದ 20-30 ಮೀ. ದೂರದಲ್ಲಿ ನಾಗರಾಜ ಖಾರ್ವಿ, ಬಿಕ್ಕ ಖಾರ್ವಿ, ಚಂದು ಖಾರ್ವಿ, ಸಂಜೀವ ಖಾರ್ವಿ, ನಾಗೇಶ್‌ ಖಾರ್ವಿ ಹಾಗೂ ಮೋಹನ್‌ ಖಾರ್ವಿ ಅವರ ಮನೆಗಳೂ ಇದ್ದು, ಅವರು ಕೂಡ ಆತಂಕದಲ್ಲಿದ್ದಾರೆ.

ದಡದಲ್ಲಿದ್ದ ದೋಣಗಳಿಗೂ ಅಲೆಗಳು ಅಪ್ಪಳಿಸುತ್ತಿದ್ದು, ಕೆಲವರ ಬಲೆಗಳು ಮರಳಿನಡಿಗೆ ಬಿದ್ದಿವೆ. ದೋಣಿಗಳನ್ನು ಸುರಕ್ಷಿತವಾಗಿ ಇಡುವುದೇ ಸವಾಲಾಗಿದೆ.

ತಡೆಗೋಡೆಯಿಲ್ಲ
ಕಂಚುಗೋಡು ಪ್ರದೇಶದಲ್ಲಿ ಹಲವಾರು ವರ್ಷಗಳಿಂದ ಕಡಲ್ಕೊ ರೆತ ತಡೆಯಲು ತಡೆಗೋಡೆ ನಿರ್ಮಿ ಸುವಂತೆ ಇಲ್ಲಿನ ತೀರ ನಿವಾಸಿಗರು ಒತ್ತಾಯಿಸುತ್ತಿದ್ದಾರೆ. ಅದಕ್ಕೆ ಪೂರಕ ಸ್ಪಂದನೆ ಸಿಕ್ಕಿಲ್ಲ. 2 ವರ್ಷಗಳ ಹಿಂದೊಮ್ಮೆ ಕಡಲ್ಕೊರೆತ ಉಂಟಾದ ಒಂದಷ್ಟು ದೂರದವರೆಗೆ ಕಲ್ಲು ಹಾಕಿದ್ದರು. ಈಗ ಅದು ಸಮುದ್ರ ಪಾಲಾಗಿದೆ ಎನ್ನುತ್ತಾರೆ ಸ್ಥಳೀಯರು.

ಕರೆ ಮಾಡಿದರೂ ಬರಲಿಲ್ಲ
ಬುಧವಾರ ರಾತ್ರಿಯಿಂದ ನಾವು ಸಂಕಷ್ಟದಲ್ಲಿದ್ದೇವೆ. ರಾತ್ರಿಯಿಂದ ಗುರುವಾರ ಬೆಳಗ್ಗಿನವರೆಗೂ ಜನ ಪ್ರತಿನಿಧಿಗಳು, ಅಧಿಕಾರಿಗಳು, ರಾಜಕಾರಣಿಗಳೆಲ್ಲರಿಗೂ ನಾವು ಕರೆ ಮಾಡಿ ತಿಳಿಸಿದ್ದೆವು. ಆದರೆ ಯಾರೂ ನಮ್ಮ ಸಮಸ್ಯೆಯನ್ನು ಆಲಿಸಲು ಬರಲಿಲ್ಲ. ಕಡಲ್ಕೊರೆತ ಇದೇ ರೀತಿ ಮುಂದುವರಿದರೆ ಏನು ಮಾಡುವುದು ಅನ್ನುವ ಭಯ ಮೂಡಿದೆ ಎನ್ನುತ್ತಾರಿ ಸ್ಥಳೀಯರು.

ಅರಬ್ಬಿ ಸಮುದ್ರದಲ್ಲೂ ತೂಫಾನ್‌
ಬಂಗಾಲಕೊಲ್ಲಿಯಲ್ಲಿ ಉಂಟಾಗಿ ರುವ ವಾಯು ಭಾರ ಕುಸಿತದ ಜತೆಗೆ ಅರಬ್ಬಿ ಸಮುದ್ರದಲ್ಲೂ ಬುಧವಾರದಿಂದ ಸಣ್ಣ ರೀತಿಯ ತೂಫಾನ್‌ ಆರಂಭವಾಗಿದೆ ಅನ್ನುವ ಮಾಹಿತಿಯಿದೆ. ಕೇರಳದಿಂದ ಆರಂಭ ವಾಗಿ ಕರ್ನಾಟಕದ ಕರಾವಳಿ, ಗೋವಾ, ರತ್ನಾಗಿರಿಯವರೆಗೂ ಇದರ ಪರಿಣಾಮವಿದೆ. ಇನ್ನೆರಡು ದಿನ ಇದು ಮುಂದು ವರಿಯುವ ಸಾಧ್ಯತೆಯೂ ಇದೆ.

ದೋಣಿಗಳು ಬಂದರಿಗೆ
ಕೆಲವು ದೋಣಿಗಳು ಮೀನುಗಾರಿಕೆಗೆ ತೆರಳಿದ್ದರೂ, ಸಮುದ್ರದ ಆಳದಲ್ಲಿ ಅಲೆಗಳ ಅಬ್ಬರ, ಗಾಳಿಯ ತೀವ್ರತೆ ಜಾಸ್ತಿ ಇದ್ದುದರಿಂದ ಅರ್ಧದಲ್ಲೇ ಮರಳಿ ಸಮೀಪದ ಬಂದರುಗಳಿಗೆ ಬಂದಿವೆ. ಮರವಂತೆ, ಗಂಗೊಳ್ಳಿ, ಉಪ್ಪುಂದ, ನಾವುಂದ, ಶಿರೂರು ಭಾಗದ ಬಹುತೇಕ ದೋಣಿಗಳು ಅವರವರ ಬಂದರಿಗೆ ಹೋಗಲು ಸಾಧ್ಯವಾಗದೆ, ಮರವಂತೆಯ ಹೊರಬಂದರಿಗೆ ಬಂದು ಲಂಗರು ಹಾಕಿವೆ.

ಕಂಚುಗೋಡಿನಲ್ಲಿ ಕಡಲ್ಕೊರೆತ ತಡೆಗಾಗಿ ಶಾಶ್ವತ ಪರಿಹಾರ ವಾಗಿ ಕಾರ್‌ಲ್ಯಾಂಡ್‌ ಯೋಜನೆಯಡಿ ಸಮುದ್ರ ದಂಡೆ ಹಾಗೂ ತಡೆಗೋಡೆ ನಿರ್ಮಾಣ ಮಾಡಬೇಕೆಂಬ ಬೇಡಿಕೆಯನ್ನು ಸರಕಾರಕ್ಕೆ ಸಲ್ಲಿಸಿದ್ದೇವೆ. ಆದರೆ ಸರಕಾರ ಅನುದಾನ ಇಲ್ಲ ಅನ್ನುವ ಕಾರಣ ನೀಡಿದೆ. ಇಂತಹ ತುರ್ತು ಸಂದರ್ಭದಲ್ಲಾದರೂ ಸ್ಪಂದಿಸುವ ಕಾರ್ಯ ಮಾಡಲಿ. ದುರಂತ ಸಂಭವಿಸುವ ಮುನ್ನ ಬೇಡಿಕೆ ಈಡೇರಿಸುವ ಪ್ರಯತ್ನವನ್ನು ಸರಕಾರ ಮಾಡಲಿ.
– ಗುರುರಾಜ್‌ ಗಂಟಿಹೊಳೆ, ಬೈಂದೂರು ಶಾಸಕರು