Kota: ನವ ವಿವಾಹಿತೆ ಹತ್ಯೆ ಪ್ರಕರಣ; ಮೃತದೇಹ ಸಂಬಂಧಿಗಳಿಗೆ ಹಸ್ತಾಂತರ

Team Udayavani, Aug 24, 2024, 9:45 PM IST

ಕೋಟ: ಪತಿ-ಪತ್ನಿಯರ ಜಗಳ ಕೊಲೆಯಲ್ಲಿ ಅಂತ್ಯಗೊಂಡ ಘಟನೆ ಸಾಲಿಗ್ರಾಮ ಸಮೀಪದ ಕಾರ್ಕಡದಲ್ಲಿ ಶುಕ್ರವಾರ ಬೆಳಗಿನ ಜಾವ ಸಂಭವಿಸಿತ್ತು. ಬೀದರ್‌ನ ದೋಣಗಾಪುರ ನಿವಾಸಿ ಜಯಶ್ರೀ (31) ತನ್ನ ಪತಿ ಕಿರಣ್‌ ಉಪಾಧ್ಯನಿಂದ ಹತ್ಯೆಯಾಗಿದ್ದಳು. ಮೃತದೇಹವನ್ನು ಶನಿವಾರ ಮನೆಯವರಿಗೆ  ಹಸ್ತಾಂತರಿಸಿದ್ದು ಉಡುಪಿಯಲ್ಲೇ ಅಂತ್ಯಕ್ರಿಯೆ ನೆರವೇರಿಸಲಾಯಿತು.

ಮೃತ ಜಯಶ್ರೀ ಅವರ ಸಹೋದರರು ಹಾಗೂ ಹತ್ತಿರದ ಸಂಬಂಧಿಗಳು ಶನಿವಾರ ಬೆಳಗ್ಗೆ ಮಣಿಪಾಲದ ಶವಾಗಾರಕ್ಕೆ  ಆಗಮಿಸಿದ್ದರು. ಈ ಸಂದರ್ಭ ಉಡುಪಿ ತಹಶೀಲ್ದಾರ್‌ ಅವರ ಸಮ್ಮುಖದಲ್ಲಿ ಮನೆಯವರ ಹೇಳಿಕೆಯನ್ನು ಪೊಲೀಸರು  ದಾಖಲಿಸಿಕೊಂಡರು. ಅನಂತರ ಮರಣೋತ್ತರ ಪರೀಕ್ಷೆ ಮುಂತಾದ ಕಾನೂನು ಪ್ರಕ್ರಿಯೆಗಳನ್ನು ನಡೆಸಿ ಶವವನ್ನು ಹಸ್ತಾಂತರಿಸಲಾಯಿತು.

ಉಡುಪಿಯಲ್ಲೇ ಅಂತ್ಯಕ್ರಿಯೆ:

ಮೃತದೇಹವನ್ನು ದೂರದ ಬೀದರ್‌ಗೆ ಕೊಂಡೊಯ್ಯಲು ಅಸಾಧ್ಯವಾದ್ದರಿಂದ ಉಡುಪಿಯಲ್ಲಿ ಅಂತ್ಯಕ್ರಿಯೆ ನಡೆಸುವುದಾಗಿ ಮನೆಯವರು ತಿಳಿಸಿದರು. ಅದರಂತೆ ಸಮಾಜ ಸೇವಕ ನಿತ್ಯಾನಂದ ಒಳಕಾಡು ಅವರ ಸಹಕಾರದಲ್ಲಿ  ಉಡುಪಿ ಬೀಡಿನಗುಡ್ಡೆ  ರುದ್ರಭೂಮಿಯಲ್ಲಿ ಅಂತ್ಯಕ್ರಿಯೆ ನೆರವೇರಿಸಲಾಯಿತು.

ಆರೋಪಿಯನ್ನು ಕುಂದಾಪುರ ನ್ಯಾಯಾಲಯಕ್ಕೆ ಹಾಜರುಪಡಿಸಿ ಹೆಚ್ಚಿನ ವಿಚಾರಣೆಗಾಗಿ ಪೊಲೀಸ್‌ ಕಸ್ಟಡಿಗೆ ಪಡೆಯಲಾಗಿದೆ.