Bengaluru: ಪ್ರತಿ ಸೋಮವಾರ ಮುಂಜಾನೆ 4.15ರಿಂದಲೇ ಮೆಟ್ರೋ ಸೇವೆ

Team Udayavani, Jan 11, 2025, 12:53 PM IST

ಬೆಂಗಳೂರು: ದೂರದ ಊರುಗಳಿಂದ ನಗರಕ್ಕೆ ಹಿಂತಿರುಗುವ ಪ್ರಯಾಣಿಕರಿಗೆ ಸಂಪರ್ಕ ಕಲ್ಪಿಸಲು ಅನುಕೂಲವಾಗುವ ನಿಟ್ಟಿನಲ್ಲಿ ನಮ್ಮ ಮೆಟ್ರೋ ರೈಲು ಸಂಚಾರವನ್ನು ಪ್ರತಿ ಸೋಮವಾರ ಮುಂಜಾನೆ 4.15 ರಿಂದ ಆರಂಭಿಸಲು ನಿಗಮ ಮುಂದಾಗಿದೆ.

ಅದರಂತೆ ಜ.13 ರಿಂದಲೇ ಅಧಿಕೃತವಾಗಿ ಮೆಟ್ರೋ ಸಂಚಾರ ಸೇವೆ ಆರಂಭವಾಗಲಿದೆ. ಈ ಹಿಂದೆ ನಮ್ಮ ಮೆಟ್ರೋ ಸಂಚಾರ ಪ್ರತಿ ದಿನ ಮುಂಜಾನೆ 5 ಗಂಟೆಯಿಂದ ಆರಂಭವಾಗುತ್ತಿತ್ತು. ಇನ್ನು ಮುಂದೆ ಪ್ರತಿ ಸೋಮವಾರ ಮುಂಜಾನೆ 5 ಗಂಟೆ ಬದಲಾಗಿ 4.15 ರಿಂದಲೇ ಸಂಚಾರವಿರಲಿದೆ.

ಉಳಿದ ದಿನಗಳಲ್ಲಿ ಸಮಯದಲ್ಲಿ ಯಾವುದೇ ವ್ಯತ್ಯಾಸವಿರುವುದಿಲ್ಲ. ಸಿ.ಟಿ. ರೈಲು ನಿಲ್ದಾಣ ಹಾಗೂ ಬಸ್‌ ನಿಲ್ದಾಣಗಳಿಗೆ ಸೇವೆ ಲಭ್ಯವಾಗಲಿದ್ದು ಸಾರ್ವಜನಿಕರು, ಮೆಟ್ರೋ ಪ್ರಯಾಣಿಕರು ಇದರ ಸದುಪಯೋಗಪಡಿಸಿಕೊಳ್ಳುವಂತೆ ಬಿಎಂಆರ್‌ಸಿಎಲ್‌ ಪ್ರಕಟಣೆಯಲ್ಲಿ ತಿಳಿಸಿದೆ.