Bengaluru: ಶೋಕಿಲಾಲನಿಗೆ ನಕಲಿ ಎ.ಕೆ.47 ಕೊಡಿಸಿದ್ದ ವ್ಯಕ್ತಿಗೆ ನೋಟಿಸ್‌

Team Udayavani, Jul 5, 2024, 2:41 PM IST

ಬೆಂಗಳೂರು: ರೀಲ್ಸ್‌ಗಾಗಿ ಚಿತ್ರದುರ್ಗ ಮೂಲದ ಅರುಣ್‌ ಕಠಾರೆಗೆ ನಕಲಿ ಎ.ಕೆ.47 ಗನ್‌ಗಳನ್ನು ಬಾಡಿಗೆಗೆ ಕೊಡಿಸಿದ್ದ ಸ್ಯಾಂಡಲ್‌ವುಡ್‌ನ‌ ಟೆಕ್ನಿಷಿಯನ್‌ ಹಾಗೂ ಮೈಸೂರಿನ ಸಾಹಿಲ್‌ ಗನ್‌ ಮಾಸ್ಟರ್‌ ಮಳಿಗೆ ಮಾಲೀಕ ಅಲೀಂ ಪಾಷಾಗೆ ಕೊತ್ತನೂರು ಠಾಣೆ ಪೊಲೀಸರು ವಿಚಾರಣೆಗೆ ಹಾಜರಾಗುವಂತೆ ನೋಟಿಸ್‌ ಜಾರಿಗೊಳಿಸಿದ್ದಾರೆ.

ಜು.1ರಂದು ಆರೋಪಿ ಅರುಣ್‌ ಕಠಾರೆಯನ್ನು ಪೊಲೀಸರು ಬಂಧಿಸಿದ್ದರು. ಬಳಿಕ ಆತ ತನ್ನ ಗನ್‌ ಮ್ಯಾನ್‌ಗಳಿಗೆ ನೀಡಿದ್ದ ಎ.ಕೆ.47ಗನ್‌ಗಳ ಬಗ್ಗೆ ವಿಚಾರಣೆ ನಡೆಸಿದ್ದರು. ಈ ವೇಳೆ ಅಲೀಂ ಪಾಷಾನ ಬಗ್ಗೆ ಮಾಹಿತಿ ನೀಡಿದ್ದ.

ಈ ಹಿನ್ನೆಲೆಯಲ್ಲಿ ನೋಟಿಸ್‌ ನೀಡಲಾಗಿದೆ. ವಿಚಾರಣೆಗೆ ಬರುವಾಗ ಗನ್‌ಗಳ ಪೂರೈಕೆ ಮಾಡಲು ಸಂಬಂಧಪಟ್ಟ ಪ್ರಾಧಿಕಾರದಿಂದ ಪಡೆದುಕೊಂಡಿರುವ ಅನುಮತಿ ಪತ್ರ, ಜಿಎಸ್‌ಟಿ ಪಾವತಿ ಸರ್ಟಿಫಿಕೇಟ್‌ ಮತ್ತು ಆರೋಪಿ ತಮ್ಮ ಬಳಿ ನಕಲಿ ಗನ್‌ ಪಡೆಯಲು ಮನವಿ ಮಾಡಿಕೊಂಡ ಬಗ್ಗೆ, ಅದಕ್ಕೆ ಆರೋಪಿ ಬಾಡಿಗೆ ಪಾವತಿ ಮಾಡಿರುವುದಕ್ಕೆ ಪೂರಕ ಸಾಕ್ಷ್ಯಗಳು, ಸರಬರಾಜು ಮಾಡಿರುವ ಗನ್‌ಗಳು ಅಸಲಿಯೋ? ನಕಲಿಯೋ? ಎಂಬುದಕ್ಕೆ ತಮ್ಮ ಬಳಿ ಇರುವ ಪೂರಕ ಸಾಕ್ಷ್ಯಧಾರಗಳನ್ನು ತರಬೇಕು ಎಂದು ನೋಟಿಸ್‌ ನಲ್ಲಿ ಉಲ್ಲೇಖೀಸಲಾಗಿದೆ.

ಅಲೀಂ ಪಾಷಾ ಕನ್ನಡದ ಕೆಲವು ಸಿನಿಮಾಗಳಿಗೆ ಶೂಟಿಂಗ್‌ಗಾಗಿ ನಕಲಿ ಗನ್‌ ಗಳನ್ನು ಪೂರೈಸಿದ್ದ. ಆರೋಪಿಯ ವಿರುದ್ಧ ಕಳೆದ ತಿಂಗಳು ಪ್ರಕರಣ ದಾಖಲಾಗಿದ್ದು, ಈ ಆಧಾರದ ಮೇಲೆ ಜುಲೈ 1ರಂದು ಬಂಧಿಸಲಾಗಿತ್ತು.