Bengaluru: ಜಾಗಕ್ಕಾಗಿ ಗಲಾಟೆ: ಜೆಸಿಬಿ ಬಳಸಿ ತಡೆಗೋಡೆ ದ್ವಂಸ

Team Udayavani, Dec 7, 2024, 4:11 PM IST

ಸಾಂದರ್ಭಿಕ ಚಿತ್ರ

ಬೆಂಗಳೂರು: ವೈಟ್‌ಫೀಲ್ಡ್‌ ಪೊಲೀಸ್‌ ಠಾಣಾ ವ್ಯಾಪ್ತಿ ಯಲ್ಲಿ ಜಾಗದ ವಿಚಾರಕ್ಕೆ ಮನೆ ಮಾಲಿಕನೊಂದಿಗೆ ಜಗಳ ಮಾಡಿ ಜೆಸಿಬಿ ತಂದು ಮನೆಯ ಗೋಡೆ ಧ್ವಂಸಗೊಳಿಸಿರುವ ಘಟನೆ ನಡೆದಿದೆ. ವೈಟ್‌ಫೀಲ್ಡ್‌ನ ನಿವಾಸಿ ವಿಶಾಲ್‌ ಬಾಳಿಗ ಮನೆ ಮೇಲೆ ಬಿಲ್ಡರ್‌ ಗೋಪಾಲ್‌ ಜವಹಾರ್‌ ಎಂಬಾತನ ಕಡೆಯವರು ದಾಳಿ ನಡೆಸಿರುವ ಆರೋಪ ಕೇಳಿ ಬಂದಿದೆ.

ಇದೀಗ ವೈಟ್‌ಫೀಲ್ಡ್‌ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಾಗಿದೆ. ವಿಶಾಲ್‌ ಬಾಳಿಗ ಹಾಗೂ ಬಿಲ್ಡರ್‌ ನಡುವೆ ಜಾಗದ ವಿಚಾರಕ್ಕೆ ಜಗಳ ನಡೆದಿತ್ತು. ಈ ಜಗಳ ತಾರಕಕ್ಕೇರಿ ದಾಂಧಲೆ ನಡೆಸಲಾಗಿದೆ ಎಂದು ತಿಳಿದು ಬಂದಿದೆ.

ಕೆಲ ದಿನಗಳ ಹಿಂದೆ ಹತ್ತಾರು ಪುಂಡರು ವಿಶಾಲ್‌ ಬಾಳಿಗೆ ಮನೆಯ ಗೇಟ್‌, ಕಾಂಪೌಂಡ್‌ ಅನ್ನು ಜೆಸಿಬಿಯಲ್ಲಿ ಧ್ವಂಸಗೊಳಿಸಿದ್ದಾರೆ. 2 ಜೆಸಿಬಿ ಬಳಸಿ ಮನೆಯ ಗೋಡೆಗೆ ಗುದ್ದಿಸಿದ್ದಾರೆ. ಮನೆಯ ಆವರಣದಲ್ಲಿ ಕೆಲಕಾಲ ವಾಗ್ವಾದ, ಗಲಾಟೆ ನಡೆದಿದೆ. ಪುಂಡರು ಮನೆ ದ್ವಂಸ ಮಾಡುವ ದೃಶ್ಯ ಸ್ಥಳೀಯ ಸಿಸಿ ಕ್ಯಾಮರಾದಲ್ಲಿ ಸೆರೆಯಾಗಿದೆ. ಸ್ಥಳೀಯರು ಸಹ ಈ ದೃಶ್ಯವನ್ನು ಮೊಬೈಲ್‌ನಲ್ಲಿ ವಿಡಿಯೋ ಮಾಡಿ ಕೊಂಡಿದ್ದು, ವಿಡಿಯೋ ವೈರಲ್‌ ಆಗಿದೆ.