Bengaluru: ನಗರದಲ್ಲಿ ಅಪಾಯಕಾರಿ ನೈಟ್ರೋಜನ್‌ ಡೈಆಕ್ಸೈಡ್‌!

Team Udayavani, Dec 6, 2024, 2:50 PM IST

ಸಾಂದರ್ಭಿಕ ಚಿತ್ರ

ಬೆಂಗಳೂರು: ನಗರದ ಗಾಳಿಯಲ್ಲಿ ಅಪಾಯಕಾರಿ ಮಟ್ಟ ಮೀರಿ ನೈಟ್ರೋಜನ್‌ ಡೈ ಆಕ್ಸೈಡ್‌ ತುಂಬಿಕೊಂಡಿದೆ. ಈ ವಾಯು ಮಾಲಿನ್ಯವು ಮಾರಣಾಂತಿಕ ಕಾಯಿಲೆಗೆ ಕಾರಣವಾಗುತ್ತವೆ ಎಂಬ ಆತಂಕಕಾರಿ ಅಂಶವು ಗ್ರೀನ್‌ ಪೀಸ್‌ ಇಂಡಿಯಾದ ಇತ್ತೀಚಿನ ವರದಿಯಲ್ಲಿ ಬಹಿರಂಗಗೊಂಡಿದೆ.

ಗ್ರೀನ್‌ ಪೀಸ್‌ ಇಂಡಿಯಾ ಇತ್ತೀಚೆಗೆ ಬೆಂಗಳೂರಿನ ವಿವಿಧೆಡೆ ವಾಯು ಗುಣಮಟ್ಟದ ಕುರಿತು ಅಧ್ಯಯನ ನಡೆಸಿ ವರದಿಯೊಂದನ್ನು ಬಹಿರಂಗಪಡಿಸಿದೆ. ಬೆಂಗಳೂರಿನಲ್ಲಿ ವಾಹನಗಳ ಹೊಗೆಯಿಂದ ಉತ್ಪತ್ತಿ ಯಾಗುವ ವಿಷ ಅನಿಲ ನೈಟ್ರೋಜನ್‌ ಡೈ ಆಕ್ಸೈಡ್‌ ಮಿತಿ ಮೀರಿರುವ ಅಂಶವನ್ನು ವರದಿಯಲ್ಲಿ ಉಲ್ಲೇಖೀಸಲಾಗಿದೆ. ಇದು ವಾಹನಗಳ ಹೊಗೆಯಿಂದ ವಾತಾವರಣಕ್ಕೆ ಸೇರುವ ಬರಿಗಣ್ಣಿಗೆ ಕಾಣದೇ ಇರುವ ವಿಷಕಾರಿ ವಸ್ತುಗಳಾಗಿವೆ. ಬೆಂಗಳೂರಿನ 13 ಆಂಬಿ ಯೆಂಟ್‌ ಏರ್‌ ಕ್ವಾಲಿಟಿ ಮಾನಿ ಟರಿಂಗ್‌ ಕೇಂದ್ರಗಳಲ್ಲಿ ಗಾಳಿಯ ಗುಣಮಟ್ಟ ವಿವಿಧ ಫ‌ಲಿತಾಂಶ ನೀಡಿವೆ. ನಗರದ ಸಿಟಿ ರೈಲ್ವೆ ನಿಲ್ದಾಣದಲ್ಲಿ ಅತ್ಯಧಿಕ ನೈಟ್ರೋ ಜನ್‌ ಡೈ ಆಕ್ಸೈಡ್‌ ಗಾಳಿಯಲ್ಲಿರುವುದು ಪತ್ತೆಯಾಗಿತ್ತು. ಇದು ವರ್ಷದ ಶೇ.80ಕ್ಕಿಂತ ಹೆಚ್ಚು ದಿನ ವಿಶ್ವ ಆರೋಗ್ಯ ಸಂಸ್ಥೆ ಮಾರ್ಗಸೂಚಿಗಳನ್ನು ಮೀರಿದೆ. ಇದಲ್ಲದೆ, ಬಿಟಿಎಂ ಲೇಔಟ್‌ ಮತ್ತು ಸಿಲ್ಕ್‌ ಬೋರ್ಡ್‌ ರಸ್ತೆಯ ವಾಯು ಗುಣಮಟ್ಟ ಮೇಲ್ವಿಚಾರಣಾ ಕೇಂದ್ರ ದಲ್ಲೂ ಕಳಪೆ ವಾಯು ಗುಣಮಟ್ಟ ವರದಿಯಾಗಿದೆ. ಉತ್ತರ ಭಾರತ ಹೊರತುಪಡಿಸಿ ಬೆಂಗಳೂರು ಸೇರಿದಂತೆ ಭಾರತದ 7 ನಗರಗಳಲ್ಲಿ ಅತ್ಯಂತ ಕಲುಷಿತ ವಾತಾವರಣವಿರುವುದು ಪತ್ತೆಯಾಗಿದೆ.

ದುಷ್ಪರಿಣಾಮ: ನೈಟ್ರೋಜನ್‌ ಡೈಆಕ್ಸೈಡ್‌ ನಿರಂತರ ವಾಗಿ ದೇಹ ಸೇರುವುದರಿಂದ ಅಪಾಯಕಾರಿ ಅನಾ ರೋಗ್ಯ ಉಂಟಾಗುತ್ತದೆ. ವೈಜ್ಞಾನಿಕ ಅಧ್ಯಯನಗಳು ಹೇಳುವಂತೆ ಸತತವಾಗಿ ನೈಟ್ರೋಜನ್‌ ಡೈ ಆಕ್ಸೈಡ್‌ ದೇಹ ಸೇರುವುದರಿಂದ ಅಸ್ತಮಾದ ಅಪಾಯ, ಶ್ವಾಸ ಮಾರ್ಗದ ಉರಿಯೂತ, ಉಸಿರಾಟದ ಕಿರಿಕಿರಿ ಕಾಣಿಸು ತ್ತದೆ. ಈಗಾಗಲೇ ಉಸಿರಾಟದ ತೊಂದರೆಗಳು ಇದ್ದರೆ ಮತ್ತಷ್ಟು ಹದಗೆಡಬಹುದು. ಶ್ವಾಸಕೋಶದ ಬೆಳವಣಿಗೆ ದುರ್ಬಲಗೊಳಿಸುತ್ತದೆ. ಅಲರ್ಜಿ, ಉಸಿರಾಟದ ತೊಂದರೆ ಜತೆಗೆ ಹೃದ್ರೋಗ ಮತ್ತು ಶ್ವಾಸಕೋಶದ ಕ್ಯಾನ್ಸರ್‌ ಸಾಧ್ಯತೆಯನ್ನೂ ಹೆಚ್ಚಿಸುತ್ತದೆ. 2019ರ ವರದಿ ಪ್ರಕಾರ, ಬೆಂಗಳೂರಿನಲ್ಲಿ 2,730 ಮಕ್ಕಳಲ್ಲಿ ಕಂಡು ಬಂದಿರುವ ಅಸ್ತಮಾಕ್ಕೆ ವಾತಾವರಣದಲ್ಲಿರುವ ನೈಟ್ರೋ ಜನ್‌ ಡೈಆಕ್ಸೆçಡ್‌ ಮೂಲ ಕಾರಣ ಎಂಬುದು ಕಂಡು ಬಂದಿದೆ.

ವಾಯು ಮಾಲಿನ್ಯವು ಆರೋಗ್ಯಕ್ಕೆ ದೊಡ್ಡ ಮಟ್ಟದಲ್ಲಿ ಹಾನಿ ಮಾಡುತ್ತದೆ. ಇದಕ್ಕೆ ಹೊಸ ಮಾದರಿಯ ಪರಿಹಾರ ಅಗತ್ಯವಾಗಿದೆ. ಈ ಸಮಸ್ಯೆಯನ್ನು ನಿಭಾಯಿಸಲು ಸುಸ್ಥಿರ ಸಾರ್ವಜನಿಕ ಸಾರಿಗೆ ಅಗತ್ಯವಾಗಿದೆ. ●ಆಕಿಜ್‌ ಫಾರೂಕ್‌, ಗ್ರೀನ್‌ ಪೀಸ್‌ ಇಂಡಿಯಾದ ಮೊಬಿಲಿಟಿ ಕ್ಯಾಂಪೇನರ್‌.