ಧಾರವಾಡ: ಬೈಕ್ ಕಳ್ಳರ ಬಂಧನ; 17 ಬೈಕ್‌ ಗಳ ವಶ

Team Udayavani, Oct 23, 2020, 9:17 PM IST

ಧಾರವಾಡ: ಅವಳಿ ನಗರದ ವಿವಿಧಡೆ ಬೈಕ್‌ಗಳನ್ನು ಕಳ್ಳತನ ಮಾಡಿದ್ದ ಇಬ್ಬರು ಆರೋಪಿಗಳನ್ನು ಬಂಧಿಸುವಲ್ಲಿ ವಿದ್ಯಾಗಿರಿ ಠಾಣೆಯ ಪೊಲೀಸರು ಯಶಸ್ವಿಯಾಗಿದ್ದಾರೆ. ಬಂಧಿತ ಆರೋಪಿಗಳು ಧಾರವಾಡ ರಾಜೀವಗಾಂಧಿನಗರದ ಅಭಿಷೇಕ ಸಂಗ್ಪಾಳೆ ಹಾಗೂ ಈರನಗೌಡ ಮರಿಗೌಡ ಎಂದು ಗುರುತಿಸಲಾಗಿದೆ ಎಂದು ಎಂದು ಎಸಿಪಿ ಅನುಷಾ ಜಿ. ಅವರು ಹೇಳಿದರು.

ನಗರದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಈ ಇಬ್ಬರು, ಧಾರವಾಡ ವಿದ್ಯಾಗಿರಿ ಪೊಲೀಸ್ ಠಾಣೆ ವ್ಯಾಪ್ತಿಯ ಲಕಮನಹಳ್ಳಿ, ಅರವಿಂದನಗರ, ವೈ.ಎಸ್. ಕಾಲನಿ, ಶಂಕರಮಠದ ಹತ್ತಿರ ಹಾಗೂ ಹುಬ್ಬಳ್ಳಿಯ ಕೇಶ್ವಾಪೂರ ಮತ್ತು ವಿವಿಧ ಬಡಾವಣೆಗಳಲ್ಲಿ ಬಂಧಿತ ಆರೋಪಿಗಳು 17 ಬೈಕ್‌ಗಳನ್ನು ಕಳ್ಳತನ ಮಾಡಿದ್ದಾರೆ. ಠಾಣೆಯ ವ್ಯಾಪ್ತಿಯಲ್ಲಿ ಬೈಕ್ ಕಳೆದುಕೊಂಡವರು ಹಲವು ಜನರು ದೂರು ನೀಡಿದ್ದರು. ಅವುಗಳ ತನಿಖೆ ಕೈಗೊಂಡಾಗ ಇಬ್ಬರು ಆರೋಪಿಗಳನ್ನು ಸೆರೆ ಹಿಡಿಯಲಾಗಿದೆ. ಅವರಿಂದ 17 ಬೈಕ್‌ಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದರು.

ಇನ್ಸಪೆಕ್ಟರ್ ಎಂ.ಕೆ. ಬಸಾಪೂರ, ಪಿಎಸ್‌ಐ ಸಚಿನಕುಮಾರ ದಾಸರೆಡ್ಡಿ, ಪಿಎಸ್‌ಐ ಎಸ್.ಐ. ತೇಗೂರ, ಪಿಎಸ್‌ಐ ಬಿ.ಎಂ. ಅಂಗಡಿ, ಇತರರು ಸುದ್ದಿಗೋಷ್ಠಿಯಲ್ಲಿದ್ದರು.