ಯುಗಾದಿಗೆ ಬೆಲೆ ಏರಿಕೆ ಬರೆ

Team Udayavani, Apr 2, 2022, 10:11 AM IST

ಹುಬ್ಬಳ್ಳಿ: ಒಂದೆಡೆ ಹಬ್ಬದ ಸಂಭ್ರಮ, ಮತ್ತೂಂದೆಡೆ ಬೆಲೆ ಏರಿಕೆ ಬರೆ, ಇವೆರಡರ ನಡುವೆ ಹೊಸ ವರ್ಷದ ಮೊದಲ ಹಬ್ಬದ ಯುಗಾದಿ ಸ್ವಾಗತಿಸುವ ಸ್ಥಿತಿ ನಿರ್ಮಾಣಗೊಂಡಿದೆ. ಹಬ್ಬದ ಸಂಭ್ರಮದಲ್ಲಿರಬೇಕಾದ ಜನರಿಗೆ ಬೆಲೆ ಏರಿಕೆ ಬರೆ ಬಿದ್ದಿದೆ.

ಹಬ್ಬದ ಸಂಭ್ರಮಕ್ಕೆ ಬೇಕಾಗುವ ಹಣ್ಣು-ಹೂವುಗಳು, ಪೂಜಾ ಸಾಮಗ್ರಿಗಳು ಸೇರಿದಂತೆ ಎಲ್ಲವುದರ ಬೆಲೆ ಏರಿಕೆಯಾಗಿದ್ದು, ಜನರು ಖರೀದಿಗೆ ಹಿಂದೇಟು ಹಾಕುತ್ತಿರುವುದು ಕಂಡು ಬರುತ್ತಿದೆ. ಹೂವು ಒಂದು ಮಾರಿಗೆ 50-70 ರೂ., ಬಾಳೆ ಹಣ್ಣು 40-60 ರೂ., ಸೇಬು ಹಣ್ಣು ಕೇಜಿಗೆ 150-180, ಕಿತ್ತಳೆ 80-100, ಕಲ್ಲಗಂಡಿ 15 ರೂ.ಗೆ ಕೆಜಿ, ಕರಬೂಜ 25-30 ರೂ. ದರವಿವೆ.

ಬೆಲೆ ಏರಿಕೆಯಾಗಿರುವುದರಿಂದ ಜನರು ಮಾರುಕಟ್ಟೆಯತ್ತ ಬರಲೂ ಹಿಂದೆಮುಂದೆ ನೋಡುವಂತಾಗಿದೆ. ಹಬ್ಬದ ನಿಮಿತ್ತ ಗದ್ದಲದಿಂದ ಕೂಡಿರಬೇಕಾಗಿದ್ದ ಮಾರುಕಟ್ಟೆಗಳು ಬಣಗುಡುತ್ತಿದ್ದವು. ದುರ್ಗದ ಬಯಲು, ಜನತಾ ಬಜಾರ, ಹಳೇಹುಬ್ಬಳ್ಳಿ ಸೇರಿದಂತೆ ನಗರದ ಸೂಪರ್‌ ಮಾರುಕಟ್ಟೆಗಳಲ್ಲಿಯೂ ಖರೀದಿ ಅಷ್ಟಕ್ಕಷ್ಟೆ ಇತ್ತು.