Chincholi: ಸಾಲದ ಹೊರೆ ತಾಳಲಾರದೇ ಕೀಟನಾಶಕ ಸೇವಿಸಿ ರೈತ ಆತ್ಮಹತ್ಯೆ

Team Udayavani, Nov 9, 2024, 1:06 PM IST

ಚಿಂಚೊಳಿ: ಸಾಲದ ಹೊರೆ ತಾಳಲಾರದೇ ಕೀಟನಾಶಕ ಸೇವಿಸಿ ರೈತನೋರ್ವ ಆತ್ಮಹತ್ಯೆ ಮಾಡಿಕೊಂಡ ಘಟನೆ ತಾಲೂಕಿನ ನರನಾಳ ಗ್ರಾಮದಲ್ಲಿ ನಡೆದಿದೆ.

ನರನಾಳ ಗ್ರಾಮದ ನಿವಾಸಿ ನಾಗಪ್ಪ ಹಣಮಂತ (38) ಮೃತಪಟ್ಟ ರೈತ.

ನಾಗಪ್ಪ ಹಣಮಂತ ಸಾಲದ ಹೊರೆ ತಾಳಲಾರದೇ ಕೀಟನಾಶಕ ಸೇವಿಸಿದ್ದು, ಬಳಿಕ ಆತನನ್ನು ‌ಕಲಬುರಗಿ‌ ಜಿಲ್ಲೆಯ ಜಯದೇವ ಆಸ್ಪತ್ರೆಯಲ್ಲಿ ಚಿಕಿತ್ಸೆಗೆ ದಾಖಲಿಸಲಾಗಿತ್ತು. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಶುಕ್ರವಾರ ಮಧ್ಯರಾತ್ರಿ ಸುಮಾರು 1 ಗಂಟೆಗೆ ಮೃತಪಟ್ಟಿದ್ದಾರೆ ಎನ್ನಲಾಗಿದೆ.

ಪ್ರಸಕ್ತ ಸಾಲಿನಲ್ಲಿ ಮಳೆಯಿಂದಾಗಿ ಹೊಲದಲ್ಲಿ ತೊಗರಿ ಬೆಳೆದು ‌ನಿಂತ ಬೆಳೆ ಹಾನಿಯಾಗಿತ್ತು. ಹಾಗಾಗಿ ಮನನೊಂದು ರೈತ ಖಾಸಗಿ ಸಾಲದಿಂದ ಹೊಲದಲ್ಲಿ ವಿಷ ಕುಡಿದು ಆತ್ಮಹತ್ಯೆಗೆ ಶರಣಾಗಿದ್ದಾರೆ.

ಈ ಕುರಿತು ಪತ್ನಿ ಶ್ರಿದೇವಿ ನರನಾಳ ಅವರು ಚಿಂಚೋಳಿ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.

ಮೃತ ನಾಗಪ್ಪ ಅವರು 8 ವರ್ಷದ ಒಂದು ಹೆಣ್ಣು ಮಗು ಹಾಗೂ 3 ವರ್ಷದ ಗಂಡು ಮಗುವನ್ನು ಅಗಲಿದ್ದಾರೆ. ಖಾಸಗಿ 2 ಲಕ್ಷ ರೂ. ಸಾಲ ಇತ್ತು.