ಚೌಕ್‌ ಠಾಣೆ ಕಾರ್ಯಾಚರಣೆ: 13 ಬೈಕ್‌ ಜಪ್ತಿ

Team Udayavani, Mar 16, 2022, 1:11 PM IST

ಕಲಬುರಗಿ: ವಿವಿಧೆಡೆ ಮೋಟಾರು ಸೈಕಲ್‌ಗ‌ಳನ್ನು ಕಳ್ಳತನ ಮಾಡುತ್ತಿರುವ ಪ್ರಕರಣಗಳನ್ನು ಬೇಧಿಸಿರುವ ಚೌಕ್‌ ಪೊಲೀಸ್‌ ಠಾಣೆ ಪೊಲೀಸರು ಕಳ್ಳರನ್ನು ಬಂಧಿಸಿ, 13 ದ್ವಿಚಕ್ರ ವಾಹನಗಳನ್ನು ವಶಪಡಿಸಿಕೊಂಡಿದ್ದಾರೆ.

ತಾಜಸುಲ್ತಾನಪುರ ರಸ್ತೆಯ ಮೇಲೆ ನಂಬರ್‌ ಪ್ಲೇಟ್‌ ಇಲ್ಲದ ಮೋಟಾರ್‌ ಸೈಕಲ್‌ ಮೇಲೆ ವ್ಯಕ್ತಿಯೊಬ್ಬ ಸಂಶಯಾಸ್ಪದವಾಗಿ ತಿರುಗಾಡುತ್ತಿರುವಾಗ ಪೊಲೀಸರು ವಿಚಾರಿಸಿದರು. ಈ ವೇಳೆ ಭೂಪಾಲ ತೆಗನೂರ ಗ್ರಾಮದ ಭೀಮಾಶಂಕರ ಜೀವಣಗಿ ಮತ್ತು ಆಳಂದ ಚೆಕ್‌ ಪೋಸ್ಟ್‌ ಹತ್ತಿರದ ಅವನ ಗೆಳೆಯರನ್ನು ಹಿಡಿದು ವಿಚಾರಿಸಿದಾಗ ಸುಮಾರು ನಾಲ್ಕು ಲಕ್ಷ ರೂ. ಬೆಲೆ ಬಾಳುವ ಒಟ್ಟು 13 ದ್ವಿಚಕ್ರವಾಹನಗಳನ್ನು ವಶಪಡಿಸಿಕೊಳ್ಳಲಾಗಿದೆ.

ಪೊಲೀಸ್‌ ಆಯುಕ್ತ ಡಾ| ವೈ.ಎಸ್‌. ರವಿಕುಮಾರ, ಉಪ ಪೊಲೀಸ್‌ ಆಯುಕ್ತ ಶ್ರೀನಿವಾಸಲು, ಉಪ ಪೊಲೀಸ್‌ ಆಯುಕ್ತ ಶ್ರೀಕಾಂತ ಕಟ್ಟಿಮನಿ ಸಹಾಯಕ ಪೊಲೀಸ್‌ ಆಯುಕ್ತ ದೀಪನ್‌ ಮಾರ್ಗದರ್ಶನದಲ್ಲಿ ಚೌಕ್‌ ಠಾಣೆಯ ಇನ್ಸಪೆಕ್ಟರ್‌ ರಾಜಶೇಖರ ಹಳಗೋಧಿ ನೇತೃತ್ವದಲ್ಲಿ ದಾಳಿ ನಡೆದು ಪ್ರಕರಣ ಬೇಧಿಸಲಾಗಿದೆ.