ಕಾಂಗ್ರೆಸ್‌ನಿಂದ ಡಿಜಿಟಲ್‌ ಸದಸ್ಯತ್ವ

Team Udayavani, Mar 17, 2022, 12:40 PM IST

ಆಳಂದ: ಕಾಂಗ್ರೆಸ್‌ ಪಕ್ಷದಲ್ಲಿ ಯಾವುದೇ ಹುದ್ದೆ ಪಡೆಯಬೇಕಾದರೆ ಪಕ್ಷದ ಸದಸ್ಯತ್ವ ಪಡೆಯುವುದು ಕಡ್ಡಾಯವಾಗಿದೆ ಎಂದು ಮಾಜಿ ಶಾಸಕ ಬಿ.ಆರ್‌. ಪಾಟೀಲ ಹೇಳಿದರು.

ಪಟ್ಟಣದಲ್ಲಿ ನಡೆದ ಆಳಂದ-ಮಾದನಹಿಪ್ಪರಗಾ ಬ್ಲಾಕ್‌ ಕಾಂಗ್ರೆಸ್‌ ಪಕ್ಷದ ಡಿಜಿಟಲ್‌ ಸದಸ್ಯತ್ವ ಅಭಿಯಾನಕ್ಕೆ ಚಾಲನೆ ನೀಡಿ ಮಾತನಾಡಿದ ಅವರು, ಕಾಂಗ್ರೆಸ್‌ ಪಕ್ಷವು ಜಾತ್ಯತೀತ ಪಕ್ಷವಾಗಿದ್ದು, ದೊಡ್ಡ ರಾಷ್ಟ್ರೀಯ ಪಕ್ಷವಾಗಿದೆ. ಇಲ್ಲಿ ಯಾವುದೇ ಜಾತಿ ಧರ್ಮವಿಲ್ಲ ಎಲ್ಲರನ್ನೂ ಸಮಾನವಾಗಿ ಕಾಣುವ ಪಕ್ಷವಾಗಿದೆ ಎಂದರು.

ದೇಶದಲ್ಲಿ ಪಕ್ಷವನ್ನು ಬಲಪಡಿಸುವ ನಿಟ್ಟಿನಲ್ಲಿ ಡಿಜಿಟಲ್‌ ಸದಸ್ಯತ್ವ ಅಭಿಯಾನಕ್ಕೆ ಚಾಲನೆ ನೀಡಲಾಗಿದೆ. ಇದು ಮಾರ್ಚ್‌ 31ರ ವರೆಗೆ ಇರಲಿದ್ದು, ಭೂತಮಟ್ಟದಲ್ಲಿ ಪಕ್ಷ ಬಲಪಡಿಸಲು ಡಿಜಿಟಲ್‌ ಸದಸ್ಯತ್ವ ಸಹಕಾರಿ ಆಗುತ್ತದೆ. ತಾಲೂಕಿನಲ್ಲಿ 36 ಸಾವಿರ ಸದಸ್ಯತ್ವದ ಗುರಿ ಸಾಧಿಸಬೇಕು ಎಂದರು.

ಕಾಂಗ್ರೆಸ್‌ ಮುಖಂಡರಾದ ಬೀದರ್‌ನ ಆನಂದ ದೇವಪ್ಪ, ಕೃಷಿಕ ಸಮಾಜದ ಅಧ್ಯಕ್ಷ ಗುರುಶರಣ ಪಾಟೀಲ ಕೋರಳ್ಳಿ, ಗಣೇಶ ಪಾಟೀಲ, ಈರಣ್ಣಾ ಝಳಕಿ, ಶರಣಬಸಪ್ಪಾ ಭೂಸನೂರ ರಾಜಶೇಖರ ಪಾಟೀಲ ಇತರರು ಇದ್ದರು.