ಸೇಡಂನಲ್ಲಿ 76ಕ್ಕೇರಿದ ಸೋಂಕಿತರ ಸಂಖ್ಯೆ

Team Udayavani, Jun 19, 2020, 2:48 PM IST

ಸೇಡಂ: ಕೋವಿಡ್ ಗೆ ತಾಲೂಕಿನಲ್ಲಿ 8 ಕಂದಮ್ಮ ಒಳಗೊಂಡು ಒಂದೇ ದಿನ 23 ಜನರಲ್ಲಿ ಕಾಣಿಸಿಕೊಳ್ಳುವ ಮೂಲಕ ಸೋಂಕಿತರ ಸಂಖ್ಯೆ 76ಕ್ಕೆ ಏರಿಕೆಯಾಗಿದೆ.

ಕೆಲ ದಿನಗಳ ಹಿಂದೆ ಸೂರವಾರ ಗ್ರಾಮದ 7 ವರ್ಷದ ಮಗವಿನಲ್ಲಿ ಕಾಣಿಸಿಕೊಂಡ ಕೋವಿಡ್ ಈಗ ಮಗುವಿನ ತಾಯಿ, ಸರ್ಕಾರಿ ಸಾರ್ವಜನಿಕ ಆಸ್ಪತ್ರೆಯ ಮೂವರು ಸಿಬ್ಬಂದಿ ಒಳಗೊಂಡು ವಿವಿಧ ಗ್ರಾಮಗಳ 23 ಜನರ ಜೀವ ಹೊಕ್ಕಿದೆ. ಬುಧವಾರ ಒಂದೇ ದಿನ ಇಷ್ಟೊಂದು ಪ್ರಕರಣಗಳು ಬೆಳಕಿಗೆ ಬಂದಿದ್ದು, ಗ್ರಾಮೀಣ ಭಾಗದಲ್ಲಿ ಆತಂಕದ ಛಾಯೆ ಮನೆ ಮಾಡಿದೆ.

ತಾಲೂಕಿನ ಸೂರವಾರ, ಬಟಗೇರಾ, ಬಿಜನಳ್ಳಿ, ದುಗನೂರ ಮತ್ತು ಮಾಧವಾರ ಗ್ರಾಮಗಳಲ್ಲಿ ಕೋವಿಡ್ ಮಹಾಮಾರಿ ಕಾಣಿಸಿಕೊಂಡಿದೆ. ಈ ಪೈಕಿ ಓರ್ವ ತೀವ್ರ ಉಸಿರಾಟದ ತೊಂದರೆ ಅನುಭವಿಸುತ್ತಿದ್ದ, 8 ಜನ ಕ್ವಾರಂಟೈನ್‌ ಕೇಂದ್ರಗಳಲ್ಲಿದ್ದರು. ಇನ್ನುಳಿದವರು ಕ್ವಾರಂಟೈನ್‌ ಕೇಂದ್ರಗಳಿಂದ ಬಿಡುಗಡೆಯಾದವರು ಎಂದು ತಾಲೂಕು ಆರೋಗ್ಯಾಧಿಕಾರಿ ಡಾ. ಸುರೇಶ ಮೇಕಿನ್‌ ತಿಳಿಸಿದ್ದಾರೆ.