ನಾಗರ ಹೊಳೆಯಲ್ಲಿ ಔಷಧ ಸಿಂಪಡಣೆ

Team Udayavani, Apr 20, 2020, 6:17 PM IST

ಸಾಂದರ್ಭಿಕ ಚಿತ್ರ

ಹುಣಸೂರು: ಆನೆಗಳ ಶಿಬಿರಗಳು, ಮಾವುತರು-ಕವಾಡಿಗಳು ಇರುವ ನಾಗರಹೊಳೆ ಉದ್ಯಾನವನದಲ್ಲಿ ಕೋವಿಡ್ ತಪ್ಪಿಸಲು ದಾನಿಗಳ ಸಹಕಾರದಲ್ಲಿ ಪ್ರಾಯೋಗಿಕವಾಗಿ ಸಿಟ್ರೋ ಬಯೋಶೀಲ್ಡ್‌ ಆರ್ಗಾನಿಕ್‌ ಔಷಧ ಬಳಕೆ ಮಾಡಲು ಮುಂದಾಗಿದೆ.

ವಿಶ್ವದ ಕೆಲ ವನ್ಯಧಾಮಗಳಲ್ಲಿ ಕೋವಿಡ್ ಅಟ್ಟಹಾಸ ಮೆರೆಯುತ್ತಿದ್ದು, ಮನುಷ್ಯರಿಂದ ಪ್ರಾಣಿಗಳಿಗೂ ಹರಡುವ ಸಾಧ್ಯತೆ ಇದೆ. ಈ ಹಿನ್ನೆಲೆಯಲ್ಲಿ ಸಿಟ್ರೋ ಬಯೋಶೀಲ್ಡ್‌ ಎಂಬ ಪರಿಸರ ಸ್ನೇಹಿ ಕ್ರಿಮಿ ನಾಶಕವನ್ನು ನಾಗರಹೊಳೆ ಉದ್ಯಾನದಲ್ಲಿ ಪ್ರಾಯೋಗಿಕವಾಗಿ ಬಳಸಲಾಗುತ್ತಿದೆ. ಕೋವಿಡ್ ತಪ್ಪಿಸಲು ಸೋಡಿಯಂ ಹೈಪೋ ಕ್ಲೋರೈಡ್‌ ಎಂಬ ರಾಸಾಯನಿಕ ಕ್ರಿಮಿನಾಶಕದಿಂದ ಪರಿಸರ, ಜೀವಿಗಳಿಗೆ ಅಡ್ಡ ಪರಿಣಾಮವಿದೆ. ರಾಸಾಯನಿಕ ಕ್ರಿಮಿನಾಶಕವನ್ನು ಆನೆಗಳ ಶಿಬಿರದಲ್ಲಿ ಬಳಸುವುದರಿಂದ ತೊಂದರೆ ಕಾಣಿಸಿಕೊಳ್ಳುವ ಹಿನ್ನೆಲೆಯಲ್ಲಿ ನಾಗರಹೊಳೆ ಉದ್ಯಾನದಲ್ಲಿ ಪರಿಸರ ಸ್ನೇಹಿ ಆರ್ಗಾನಿಕ್‌ ಔಷಧ ಬಳಕೆಗೆ ದಾನಿಗಳ ನೆರವಿನಿಂದಿಗೆ ಮುಖ್ಯಸ್ಥರು ಮುಂದಾಗಿದ್ದಾರೆ.

ತ.ನಾಡಿನ ಕಂಪನಿ ಸಹಕಾರ: ತ.ನಾಡಿನ ಚೆನ್ನೈ ಮೂಲದ ಸುಗ್ರೋಧನ್‌ ಎಂಬ ಬಯೋ ಕಂಪನಿ ಪರಿಚಯಿಸಿರುವ ಸಿಟ್ರೋ ಬಯೋಶೀಲ್ಡ್‌ ಆರ್ಗಾನಿಕ್‌ ಕ್ರಿಮಿನಾಶಕವನ್ನು ಸಿಎಸ್‌ಆರ್‌ ಫಂಡ್‌ ಮೂಲಕ ಉಚಿತವಾಗಿ ನಾಗರಹೊಳೆ ಆನೆ ಶಿಬಿರದಲ್ಲಿ ಬಳಸಲಾಗುತ್ತಿದೆ. ದಿನಕ್ಕೆ 2 ಬಾರಿ ಸಿಂಪಡಿಸಲಾಗುತ್ತಿದೆ.

ಆರ್ಗಾನಿಕ್‌ ಕ್ರಿಮಿನಾಶಕ ಬಳಕೆಯಿಂದ ತೊಂದರೆ ಇಲ್ಲ. ಮಾವುತರು- ಕವಾಡಿಗಳಿ ಗೂ ಉಚಿತವಾಗಿ ಕಿಟ್‌ ವಿತರಿಸಲಾಗಿದೆ. ಈ ಕ್ರಿಮಿನಾಶಕವನ್ನು ಎಲ್ಲೆಡೆ ಬಳಸಬಹುದು.
● ಡಾ.ಕಾರ್ತಿಕ್‌ ನಾರಾಯಣ್‌, ಬಯೋ ಕಂಪನಿಯ ಮುಖ್ಯಸ್ಥ

ನಾಗರಹೊಳೆಯಲ್ಲಿ ಪರಿಸರ ಸ್ನೇಹಿ ಕ್ರಿಮಿನಾಶಕ ಬಳಸಲು ಮುಂದಾಗಿದ್ದು, ಉದ್ಯಾನದ ಆನೆ ಶಿಬಿರ ಸೇರಿದಂತೆ ಎಲ್ಲೆಡೆ ಕ್ರಿಮಿನಾಶಕ ಬಳಸಲಾಗುವುದು. ಬಳಕೆ ಬಗ್ಗೆ ತರಬೇತಿ
ನೀಡಲಾಗಿದೆ.
● ಮಹೇಶ್‌ಕುಮಾರ್‌, ಮುಖ್ಯಸ್ಥ, ನಾಗರಹೊಳೆ ಉದ್ಯಾನವನ