ಕ್ಷಮೆ ಕೋರಲು ಅರಣ್ಯಾಧಿಕಾರಿಗೆ ಆಗ್ರಹ

Team Udayavani, Jun 5, 2020, 5:38 AM IST

ಪಿರಿಯಾಪಟ್ಟಣ: ತಾಪಂ ಸಾಮಾನ್ಯ ಸಭೆಯಲ್ಲಿ ಸದಸ್ಯರಿಗೆ ಅಗೌರವ ತೋರಿಸಿದ್ದಾರೆಂದು ಆರೋಪಿಸಿ ಅರಣ್ಯಾಧಿಕಾರಿ ಪೆಮ್ಮಯ್ಯ ವಿರುದ್ಧ ಸದಸ್ಯರು ಆಕ್ರೋಶ ವ್ಯಕ್ತಪಡಿಸಿದರು. ಸದಸ್ಯ ಮಹದೇವ್‌ ಮಾತನಾಡಿ, ಅರಣ್ಯ ಇಲಾಖೆ  ಸಿಬ್ಬಂದಿ ಲಾಕ್‌ಡೌನ್‌ ನೆಪದಲ್ಲಿ ಸಾಮಿಲ್‌ ಮಾಲೀಕರಿಗೆ ಕಿರುಕುಳ ನೀಡುತ್ತಿದ್ದಾರೆ.

ನಾನು ಮರ ತುಂಡು ಮಾಡಿಸಲು ಹೋಗಿದ್ದಾಗ ನನ್ನ ಬಳಿಯೇ ಪೆಮ್ಮಯ್ಯ ಹಾಗೂ ಮತ್ತೂಬ್ಬ ಸಿಬ್ಬಂದಿ 1 ಸಾವಿರ ರೂ. ಲಂಚ ಪಡೆದಿದ್ದಾರೆ ಎಂದು  ಆರೋಪಿಸಿದರು. ಈ ವೇಳೆ ಅರಣ್ಯಾಧಿಕಾರಿ ಪೆಮ್ಮಯ್ಯ, “ನಾನು ಹಣ ಪಡೆದಿಲ್ಲ, ನಿಮ್ಮ ದಾಖಲೆ ಇದ್ದರೆ ಸಾಬೀತು ಪಡಿಸಿ’ ಎಂದು ಸವಾಲು ಹಾಕಿದರು. ಇದರಿಂದ ಆಕ್ರೋಶಗೊಂಡ ಬಹು ತೇಕ ಸದಸ್ಯರು ತಾಪಂ ಸದಸ್ಯರ ಬಳಿ ನೀವು  ಮಾತನಾಡುವ ರೀತಿ ಇದಲ್ಲ. ಕ್ಷಮೆ ಕೋರಬೇಕೆಂದು ಪಟ್ಟು ಹಿಡಿದರು.

ಸದಸ್ಯರ ಬಿಗಿ ಪಟ್ಟಿಗೆ ಮಣಿದ ಪೆಮ್ಮಯ್ಯ ಕ್ಷಮೆಕೋರಿದರು. ಸಾಮಾನ್ಯ ಸಭೆಗೆ ಗೈರಾಗುವ ಅಧಿಕಾರಿಗಳ ವಿರುದ್ಧ ಶಿಸ್ತು ಕ್ರಮ ಕೈಗೊಳ್ಳುವಂತೆ ಇಒ ಶ್ರುತಿಗೆ, ಅಧ್ಯಕ್ಷೆ  ನಿರೂಪಾ ತಾಕೀತು ಮಾಡಿ ದರು. ಉಪಾಧ್ಯಕ್ಷೆ ಜಯಮ್ಮ, ಸಾಮಾಜಿಕ ನ್ಯಾಯ ಸ್ಥಾಯಿ ಸಮಿತಿ ಅಧ್ಯಕ್ಷ ರಂಗಸ್ವಾಮಿ, ಸದಸ್ಯರಾದ ಸುಮತಿ, ಈರಯ್ಯ, ಕುಂಜಪ್ಪ ಕಾರ್ನಾಡ್‌, ಮೋಹನ್‌ ರಾಜ್‌, ಶಿವಮ್ಮ, ಮಾನು, ಶ್ರೀನಿವಾಸ್‌, ಪಂಕಜ,  ಮಲ್ಲಿಕಾರ್ಜುನ, ಪುಷ್ಪಲತಾ, ಶೋಭಾ, ಸುಮಿತ್ರಾ ಇದ್ದರು.