Punjab: ಪಂಜಾಬ್‌ಗೆ 2.8 ಲಕ್ಷ ಕೋಟಿ ಸಾಲ- ಅತ್ಯಧಿಕ ಸಾಲ ಹೊಂದಿರುವ ದೇಶದ ಮೊದಲ ರಾಜ್ಯ

Team Udayavani, Oct 3, 2023, 10:00 PM IST

ಚಂಡೀಗಢ: ಪಂಜಾಬ್‌ ಸರ್ಕಾರ 2.8 ಲಕ್ಷ ಕೋಟಿ ರೂ. ಸಾಲವನ್ನು ಹೊಂದಿದೆ ಎಂದು ಸಿಎಂ ಭಗವಂತ ಸಿಂಗ್‌ ಮಾನ್‌ ಹೇಳಿದ್ದಾರೆ. ಜತೆಗೆ ಈ ಮೊತ್ತ ಪ್ರಸಕ್ತ ವಿತ್ತೀಯ ವರ್ಷದ ಮುಕ್ತಾಯದ ವೇಳೆಗೆ ಅದು 3.47 ಲಕ್ಷ ಕೋಟಿ ರೂ.ಗೆ ತಲುಪುವ ಸಾಧ್ಯತೆ ಇದೆ ಎಂದಿದ್ದಾರೆ. ಹೀಗಾಗಿ, ದೇಶದಲ್ಲಿಯೇ ಪಂಜಾಬ್‌ ಅತ್ಯಧಿಕ ಪ್ರಮಾಣದ ಸಾಲ ಹೊಂದಿರುವ ರಾಜ್ಯ ಎಂಬ ಕುಖ್ಯಾತಿಗೆ ಪಾತ್ರವಾಗಿದೆ.

ರಾಜ್ಯಪಾಲ ಭನ್ವರಿಲಾಲ್‌ ಪುರೋಹಿತ್‌ ಅವರು ರಾಜ್ಯ ಸರ್ಕಾರ ಹೊಂದಿರುವ ಸಾಲಗಳ ಬಗ್ಗೆ ವಿವರಣೆ ಕೋರಿ ಪತ್ರ ಬರೆದಿರುವ ಹಿನ್ನೆಲೆಯಲ್ಲಿ ಸಿಎಂ ರಾಜ್ಯಪಾಲರಿಗೆ ಬರೆದಿರುವ ಉತ್ತರದಲ್ಲಿ ಈ ಅಂಶ ಉಲ್ಲೇಖೀಸಿದ್ದಾರೆ.

2022 ಏ.1ರಿಂದ ಪ್ರಸಕ್ತ ವರ್ಷದ ಆ.31ರ ಮುಕ್ತಾಯದ ವರೆಗೆ ರಾಜ್ಯ ಸರ್ಕಾರ 47, 107.6 ಕೋಟಿ ರೂ. ಹೆಚ್ಚುವರಿಯಾಗಿ ಸಾಲವನ್ನು ಹೊಂದಿದೆ. ಅದರಲ್ಲಿ ನಬಾರ್ಡ್‌, ಕೇಂದ್ರ ಸರ್ಕಾರದಿಂದ ಸಾಲ ಪಡೆದು ಕೈಗೊಂಡಿರುವ ಯೋಜನೆಗಳ ಮೊತ್ತವೂ ಕೂಡ ಸೇರಿದೆ ಎಂದು ಸಿಎಂ ಭಗವಂತ ಸಿಂಗ್‌ ಮಾನ್‌ ಹೇಳಿದ್ದಾರೆ.