India-Pak: ತಾಪಮಾನದಿಂದ ಭಾರತ-ಪಾಕ್‌ನ 220 ಕೋಟಿ ಮಂದಿಗೆ ಅಪಾಯ

Team Udayavani, Oct 10, 2023, 9:38 PM IST

ನವದೆಹಲಿ: ಹಾಲಿ ಶತಮಾನದ ಅಂತ್ಯದ ವೇಳೆಗೆ ಜಗತ್ತಿನ ತಾಪಮಾನದಲ್ಲಿ 1.5 ಡಿಗ್ರಿ ಸೆಲ್ಸಿಯಸ್‌ಗಿಂತ ಹೆಚ್ಚು ಏರಿಕೆಯಾದರೆ, ಅದು ಜನರ ಆರೋಗ್ಯದ ಮೇಲೆ ಪ್ರತಿಕೂಲ ಪರಿಣಾಮ ಬೀರಲಿದೆ. ವಿಶೇಷವಾಗಿ ಭಾರತ ಮತ್ತು ಪಾಕಿಸ್ತಾನದ 220 ಕೋಟಿ ಮಂದಿ ಅಪಾಯಕ್ಕೆ ಸಿಲುಕಲಿದ್ದು, ಬಿಸಿಲ ಝಳದಿಂದ ಸಾವು ಅಥವಾ ಹೃದಯಾಘಾತದಿಂದ ಅಸುನೀಗುವ ಪ್ರಮಾಣ ಹೆಚ್ಚಾಗಬಹುದು.
ಪೆನ್‌ ಸ್ಟೇಟ್‌ ಕಾಲೇಜ್‌ ಆಫ್ ಹೆಲ್ತ್‌ ಆ್ಯಂಡ್‌ ಹ್ಯೂಮನ್‌ ಡೆವಲಪ್‌ಮೆಂಟ್‌, ಪರ್ಡ್ಯೂ ಯುನಿವರ್ಸಿಟಿ ಕಾಲೇಜ್‌ ಆಫ್ ಸೈನ್ಸಸ್‌, ಪರ್ಡ್ಯೂ ಇನ್‌ಸ್ಟಿಟ್ಯೂಟ್‌ ಆಫ್ ಸಸ್ಟೈನೆಬಲ್‌ ಫ್ಯೂಚರ್‌ ನಡೆಸಿದ ಅಧ್ಯಯನವು ಈ ಆಘಾತಕಾರಿ ಮಾಹಿತಿ ಹೊರಹಾಕಿದೆ. ತಾಪಮಾನ ಏರಿಕೆಯ ದುಷ್ಪರಿಣಾಮಗಳನ್ನು ತಡೆಯಲು ಮಾನವನ ದೇಹ ಹೊಂದಿರುವ ಸಾಮರ್ಥ್ಯ ಸೀಮಿತ ಪ್ರಮಾಣದ್ದಷ್ಟೇ ಎಂದೂ ವರದಿ ಹೇಳಿದೆ.

ಆ ಮಿತಿಗಿಂತ ಹೆಚ್ಚಾದರೆ ಜೀವ ಅಥವಾ ಆರೋಗ್ಯದ ಮೇಲೆ ಪ್ರತಿಕೂಲ ಪರಿಣಾಮ ಉಂಟಾಗುವ ಅಪಾಯವಿದೆ. ಮೂರು ಸಂಸ್ಥೆಗಳ ಅಧ್ಯಯನದ ಪ್ರಕಾರ ಜಗತ್ತಿನ ತಾಪಮಾನ ಕೈಗಾರಿಕೀರಣದ ದಿನಗಳಿಂತ ಮೊದಲು ಇದ್ದ ಮಟ್ಟಕ್ಕೆ ಇದ್ದಂತೆ 2 ಡಿಗ್ರಿ ಸೆಲ್ಸಿಯಸ್‌ಗೆ ಏರಿಕೆಯಾದರೆ ಚೀನಾದ ಪೂರ್ವ ಭಾಗದಲ್ಲಿರುವ 100 ಕೋಟಿ, ಸಬ್‌-ಸಹರನ್‌ ಆಫ್ರಿಕಾದಲ್ಲಿರುವ 80 ಕೋಟಿ ಮಂದಿಗೆ ಅಪಾಯ ಉಂಟಾಗಲಿದೆ.