Guest Lecturers: ಗೌರವಧನಕ್ಕೆ 3.86 ಕೋ.ರೂ. ಬಿಡುಗಡೆ

Team Udayavani, Feb 4, 2024, 12:43 AM IST

ಉಡುಪಿ: ಸರಕಾರಿ ಪದವಿ ಕಾಲೇಜಿನ ಅತಿಥಿ ಉಪನ್ಯಾಸಕ ರಿಗೆ ಗೌರವಧನ ಹಂಚಿಕೆಯಲ್ಲಿ ಕೊರತೆಯಾದ ಹಿನ್ನೆಲೆಯಲ್ಲಿ ಕಾಲೇಜುಗಳ ಪ್ರಾಂಶುಪಾಲರ ಪ್ರಸ್ತಾವನೆ ಆಧರಿಸಿ ರಾಜ್ಯ ಸರಕಾರ 3.86 ಕೋ.ರೂ. ಬಿಡುಗಡೆ ಮಾಡಿದೆ.

ಬೆಂಗಳೂರು ವಿಭಾಗದ 30 ಕಾಲೇಜು, ಮಂಗಳೂರು ವಿಭಾಗದ 11, ಧಾರವಾಡ ವಿಭಾಗದ 25, ಕಲಬುರಗಿ ವಿಭಾಗದ 33, ಮೈಸೂರು ವಿಭಾಗದ 11 ಹಾಗೂ ಶಿವಮೊಗ್ಗ ವಿಭಾಗದ 13 ಕಾಲೇಜುಗಳ ಅತಿಥಿ ಉಪನ್ಯಾಸಕರಿಗೆ ಮಾಸಿಕ ಗೌರವ ಧನ ನೀಡುವಲ್ಲಿ ಕೊರತೆಯಾದ ಹಿನ್ನೆಲೆಯಲ್ಲಿ ಸರಕಾರವು ಅಗತ್ಯ ಅನುದಾನ ಬಿಡುಗಡೆ ಮಾಡಿದೆ.

ಮಂಗಳೂರು ವಿಭಾಗದ 11 ಕಾಲೇಜುಗಳಲ್ಲಿ ಕೊಡಗಿನ 2, ದ.ಕ.ದ 7 ಹಾಗೂ ಉಡುಪಿಯ 2 ಕಾಲೇಜುಗಳಿಗೆ 19.30 ಲಕ್ಷ ರೂ.

ಬಿಡುಗಡೆ ಮಾಡಲಾಗಿದೆ. ಅನುದಾನವನ್ನು ನಿಯಮಾನುಸಾರ ಅತಿಥಿ ಉಪನ್ಯಾಸಕರಿಗೆ ಪಾವತಿಸಬೇಕು. ಗೌರವಧನ ಪಾವತಿ ವಿಳಂಬ ಆಗದಂತೆ ಎಚ್ಚರ ವಹಿಸಲು ನಿರ್ದೇಶನ ನೀಡಿದೆ.
2023-24ನೇ ಸಾಲಿನ ಅತಿಥಿ ಉಪನ್ಯಾಸಕರ ಗೌರವಧನಕ್ಕಾಗಿ ಸರಕಾರ 196 ಕೋ.ರೂ. ಮೀಸಲಿಟ್ಟಿದೆ. ಈವರೆಗೂ 65 ಕೋ.ರೂ.ಗಳನ್ನು ಕಂತುಗಳಲ್ಲಿ ಬಿಡುಗಡೆ ಮಾಡಲಾಗಿದೆ. ಕೆಲವು ಕಾಲೇಜಿನ ಅತಿಥಿ ಉಪನ್ಯಾಸರಿಗೆ ಗೌರವಧನ ಸಿಗದೇ ಇರುವ ಬಗ್ಗೆ ಬಂದಿ ರುವ ದೂರು, ಕಾಲೇಜುಗಳ ಪ್ರಸ್ತಾವನೆ ಆಧಾರದಲ್ಲಿ ಹೊಸದಾಗಿ ಅನುದಾನ ಬಿಡುಗಡೆ ಮಾಡಲಾಗಿದೆ ಎಂದು ಮೂಲಗಳು ತಿಳಿಸಿವೆ.