China: ಚೀನಾದಲ್ಲಿ 34,000 ಆನ್‌ಲೈನ್‌ ಖಾತೆಗಳು ರದ್ದು

Team Udayavani, Dec 23, 2023, 9:14 PM IST

ನವದೆಹಲಿ: ಸಮಾಜದಲ್ಲಿ ಸುಸ್ಥಿರ ವಾತಾವರಣ ಉಂಟು ಮಾಡಲು, ವದಂತಿಗಳ ಮೇಲೆ ಕಡಿವಾಣ ಹಾಕಲು ಚೀನಾಡಳಿತ ಬಲವಾದ ಕ್ರಮ ತೆಗೆದುಕೊಂಡಿದೆ. ಒಟ್ಟು 34,000 ಆನ್‌ಲೈನ್‌ ಖಾತೆಗಳನ್ನು ರದ್ದು ಮಾಡಿದೆ. ಈ ಸಂಬಂಧ 4,800 ಪ್ರಕರಣಗಳನ್ನು ದಾಖಲಿಸಲಾಗಿದೆ, ಒಟ್ಟು 6,300 ವ್ಯಕ್ತಿಗಳಿಗೆ ಶಿಕ್ಷೆ ನೀಡಲಾಗಿದೆ. ಚೀನಾದ ಸಾರ್ವಜನಿಕ ಭದ್ರತಾ ಸಚಿವ ಲಿ ತಾಂಗ್‌ ಈ ಬಗ್ಗೆ ಮಾಹಿತಿ ನೀಡಿದ್ದಾರೆ. ಮುಂದಿನ ವರ್ಷ ಪೂರ್ಣ ಆನ್‌ಲೈನ್‌ ವದಂತಿಗಳಿಗೆ ಕಡಿವಾಣ ಹಾಕಲು ಕಾರ್ಯಾಚರಣೆ ನಡೆಸಲಾಗುತ್ತದೆ.

ಹಲವಾರು ದಾರಿಗಳ ಮೂಲಕ ಈ ಕಾರ್ಯಾಚರಣೆ ಪರಿಣಾಮಕಾರಿಯಾಗುವಂತೆ ನೋಡಿಕೊಳ್ಳಲಾಗುತ್ತದೆ ಎಂದು ಸಚಿವರು ಹೇಳಿದ್ದಾರೆ. ಚೀನಾದಲ್ಲಿ ಕೊರೊನಾ ಹೆಚ್ಚಾದ ನಂತರ ವದಂತಿಗಳ ಪ್ರಮಾಣವೂ ಜಾಸ್ತಿಯಾಗಿದೆ. ಎಂದಿನಂತೆ ವ್ಯಕ್ತಿಗಳಿಗೆ ಅವಮಾನ ಮಾಡುವುದು, ಅವರ ಖಾಸಗಿ ವಿಚಾರ ಬಹಿರಂಗಗೊಳಿಸುವುದೂ ನಡೆಯುತ್ತಿದೆ. ಇವೆಲ್ಲವನ್ನೂ ಚೀನಾ ಸರ್ಕಾರ ಗಂಭೀರವಾಗಿ ಪರಿಗಣಿಸಿದೆ.